1 Pɩyɛɛrɩ 2

1Dene poan, yehe ya mɛhe be'em yelese'ere woo poan. Da me parone ya bii ya pan'ahɛ ya mɛhe te yamam dela sɛla te ya dagana. Ya me da nyuuna bii sagona nɛreba yu'ura. 2Magahɛ wo bilɛɛhe n mɔgɔrɛ bin'ihom se'em daarɛ woo la, bala me, yamam me sontii ya tɔ'ɔha Na'ayenɛ yetɔgom la me daarɛ woo ya suunre poan. Te bala te ya wan zo'e soŋa soŋa ya faanrɛ la poan. 3Ge ba golehɛ Yenɛ gɔŋɔ yeti, ya wa'ana lɛm nyɛ, Na'ayenɛ ane soŋa mɛ. 4Wa'an ya to Daana Yesu se'em n vɔe wa zen'en na. A ane wo kuguse'ere te nɛreba zagahɛ dɛ ge dekɛ dɛ te de ka tare vɔnrɛ la. Ge Na'ayenɛ dekɛ en te a tara vɔnrɛ. 5Yamam me tare vom mɛ. Bala, Na'ayenɛ dekɛ ya mɛ wo kuga mɛ' yire bo a mea la. Bilam te ya wan tona bɔ'ɔra Na'ayenɛ wo toolom malema daandoma n tare kaanbegɔ bo'olom sebo n tegere Na'ayenɛ nini doohe Yesu Krista poan. 6Ba le golehɛ Yenɛ gɔŋɔ la poan yeti, N biŋere la n ɛnberɛ Zion poan. Ɛnberɛ n de kugukɛ'ɛŋa ɛnberɛ. Te hom se'em n dekɛ ho mɛŋa delom dɛ sɛla kan daan hɔ. 7Bala, Krista tare vɔnrɛ bo yamam n sakɛ bo en la mɛ, ge sɛba n ka sakɛ bo en la, kuguse'ere te mɛteba zagahɛ la, n nya denɛ n ta dɛna ɛnberɛ kugure. 8A wan dɛna kugure n lobere nɛreba, dɛna taŋa te nɛreba sɛrɔna luta. Ban lute la dela ban ka nam yelehom la. Na'ayenɛ sunboolom n me n de se'em n bala. 9Ge la han dɛna yamam, ya dela buuri se'ere te Na'ayenɛ loe, ya dela Naba la malemadoma, ya dela toolom teŋa, ya dela Na'ayenɛ mɛŋa nɛreba. A loe ya te ya mɔɔlɛ la enŋa Na'ayenɛ yelekerehe tooma la bo nɛreba. A yi' ya la lika poan te ya wa'an a mɛŋa nɛɛhom sebo n ka tare makerɛ la poan na. 10Te dabeha daa boe ha te ya daa nan dagana Na'ayenɛ nɛreba, ge ya nya dela a nɛreba. Dabeha daa boe ha te ya daa nan ka mina Na'ayenɛ n zote ninbɔn'ɔn bɔ'ɔra nɛreba n ane se'em, ge nananawa, a zɔ' ya ninbɔn'ɔn. 11N zɔdoma wa, n yeti ya mɛ la ninmɔ'ɔrɛ wo saama n keŋɛ ta bɔna teŋa kayema teŋa wa zuo la, yehe ya ya mɛhe koŋkoma'ahom yooro poan. Se'ere n sɔe la, yele ana koore ya mɛ daarɛ woo. 12La sontii ya eta sɛla n ane soŋa sɛba n ka sakɛ bo Yesu la zen'en. Bala, te ba han ta yɛta te ya dela sɛba n tone be'em, ba me wan le nyɛ' te ya tone la sɛla ane soŋa. Bilam, te ba wan pɛngɛ Na'ayenɛ daanse'ere daarɛ te Yesu ta lɛbera na la. 13To Daana Yesu zuo, de ya sɛba n wan nana nɛra se'em woo n de zuodaana sɔna behera. Nane ya nakantɛ la n sɔe zan'an zan'an behera la, bii 14teŋbeheradoma te enŋa nakantɛ la tom ba te ba namehɛ nɛresɛba n tom be'emtooma ge pɛngɛ sɛba me n tone sɛla n ane soŋa la. 15Te Na'ayenɛ n bote se'ere dela dena wa, a bote ya bɔna la bɔŋsɛka taaba n an soŋa. Te bɔŋkaŋa taaba n wan ta'an bahɛ te nɛregɔɔnɔ nɔya la ma'ɛn. 16Boe ne ya yan fai. Da yele ya te lan de bala la, ya ta'an dekɛ bilam poan tona sɛla n de be'em, ge ton bone ya wo ya dela Na'ayenɛ yamehe la. 17Bo'ore ya nɛra woo na'ahegɔ ge me tara nɔŋerɛ bo yamam la sɛba n lagom sakɛ bo Yesu la. Na'ahe ya Na'ayenɛ ge me bo'ore ya nakantɛ la na'ahegɔ. 18Yamam sɛba n de yamehe sontii ya nana ya doma ge bɔ'ɔra ba na'ahegɔ. Da bo'ore ya la sɛba ma'an n ete ya soŋa ge me ka daana ya ma'an na'ahegɔ, ge lagom bo'ore ya sɛba n daane ya la me na'ahegɔ. 19Ya han nyɛ' namehe seko n ka sone te ya namehɛ, ge ŋmibe de poan yan mi' Na'ayenɛ yɛla la zuo, Na'ayenɛ wan kan' kan'somɔ bo ya de poan. 20Ya han tom sɛla n dagɛ ma'an ge te ba ŋmɛ' ya de zuo te ya ŋmibe de, nɛra kan pɛngɛ ya de zuo. Ge ya han ŋmibe namehegɔ poan la yan tom la sɛla n de ma'an la zuo, Na'ayenɛ wan kan' kan'somɔ bo ya de zuo. 21La dela dena wa mea zuo te Na'ayenɛ yi' ya na. Se'ere n sɔe la, Yesu Krista mea me daa namehɛ mɛ yamam zuo te la de'a sɛla te yamam me wan behɛ dɔla. Bala te ya wan tɔgɔha sɛla te a daa eŋɛ la. 22Yesu daa ka tom be'em la fiin me, bii ponpɔrɔŋɔ ze'ele a nɔɔrɛn na. 23Ban daa toore en la, a me daa ka lebehe toora ba. N daa nyɛte namehegɔ la, a daa ka yeti a wan lerege a saanɛ. Ge a daa ton sakɛ la a potɛn'ɛrɛ poan gura la Na'ayenɛ n de tontɔɔ gankera la. 24Yesu Krista daa ki' punpuuredɔɔ zuo te tomam da le ki' to be'em poan. Bala nananawa, la ka le sona te to tona be'em, ge to dɛna yelemɛŋɛrɛdoma. A fuula la poan te Na'ayenɛ tebɛ tɔ. 25Ya daa ane me wo piihe n bɔregɛ la. Ge nananawa, Na'ayenɛ tare ya lebena te ya dɔla Yesu se'em n ane wo duŋkeena n gure ya te sɛla kan daan ya la.

will be added

X\