1 Pɩyɛɛrɩ 1

1Mam Peter se'em n de Yesu Krista tontoneba la ayema la n golehɛ gɔŋɔ wa. N golehɛ bɔ'ɔra la Na'ayenɛ nɛresɛba te a loe te ba yeregɛ dɛna saama bɔna teŋse'ehe poan la. Teŋse'ehe te ba bɔna la dela teŋse'ehe n boe Pontus, la Galatia, la Kapadosia, la Asia, la Bitinia teŋhe poan. 2To Sɔ' Na'ayenɛ daa loe ya mɛ yɛhera la enŋa mea n daa tɛn'ɛhɛ se'em. A Sea la n daa bahɛ te ya dɛna sɛba n boe bo enŋa Na'ayenɛ ma'an ge me nana Yesu Krista ge te Yesu ziim la me daa duuhe ya be'em la. Na'ayenɛ wan eŋɛ ya som ge bahɛ ya te ya tara sunma'ahom. 3Bahɛ ya te to bo Na'ayenɛ fara se'em n de to Daana Yesu Krista Sɔ wa. Na'ayenɛ n zote to ninbɔn'ɔn la zuo n sɔe te a bahɛ tɔ te to tee to potɛn'ɛra to yelebe'ero poan ka bɔna bɔŋsɛka taaba te to daa bɔna la. To ana bala yɛhera la n bahɛ te Yesu Krista vo'e a kum la poan la. Te dena wa n bahɛ tɔ te to sakɛ to suunre poan gura sɛla n de yelemɛŋɛrɛ. 4Bala, to behere mɛ te daarɛ deyena, to wan ta to'e sɛla te Na'ayenɛ dekɛ biŋe gura a nɛreba la. Wana wa me boe la a zen'en saazuo ha ge gura to. Bilam ha la kan pɔn'ɛn bii la sagom bii la di' teŋa zeem. 5Ba dela ya mam sɛba n sakɛ bo Yesu la denɛ. Na'ayenɛ paŋa me wa gu' ya soŋa soŋa gura vom sebo n ka tare ba'ahegɔ a zen'en te ya yete ya ta tara teŋa ba'ahegɔ daarɛ la. 6Daanse'ere, la sone te ya suunre sagom dabeha fiin wa yan nyɛte namehe seto woo la zuo. Ge bala zan'an, tare ya popeelom la yele dena wa. 7Yele ana wa woo bote la pa'alɛ te ya sakerɛ Yesu sore dɔlɔga la poan la dela yelemɛŋɛrɛ. Sanlema dela sɛla n sagom ne. Ge bala zan'an ba ne dekɛ bo eŋɛ bugum poan te ba behɛ bon wan ana se'em. Dene poan ya sakerɛ Yesu sore dɔlɔga la poan la n nyane sanlema, la sontii Na'ayenɛ makerɛ de behɛ te ya wan ta'an nyaŋɛ ŋmibe de poan. Bala te ya wan nyɛ' pɛnka, la na'ahegɔ, la daanse'ere daarɛ te Yesu Krista ta nɛɛra na la. 8Yan ka nyɛ' Yesu la ya nini wa, ge ya nɔŋɛ en. La yan kelom ka nyɛ' en nananawa, ge ya kelom sakɛ bo en mɛ. Bala, tara ya popeelom n ka tare tɛka. 9Se'ere n sɔe la, ya yeti ya to'e la sɛla te ya sakerɛ Yesu sore dɔlɔga poan la yeti la bahɛ ya te ya nyɛ' la. Ya wan nyɛ' faanrɛ se'em n bala. 10La yuun dela faanrɛ dena wa zuo te nɔtɔgɔheba la yuun ma'ɛn ba mɛhe soŋa soŋa te ba ɛ behɛ de zuo. Te ba yuun ɛ bala la, ba yuun soolom doohe zo'ohogɔ sebo te Na'ayenɛ yeti a bo ya la. 11Ba yuun eere zegera te ba baŋɛ se'em ma'an te dena wan eŋɛ se'em. Te la yuun daa dela bala mea ma'an te Krista Sea la n yuun bo la ba la yuun pa'alɛ ba wo Sea la mea n yuun yele te Krista wan ŋmibe namehe seto woo te a yeti a nyɛ' la, ge la a nya nyɛ' pɛnka pooren. 12Na'ayenɛ yuun nɛɛ pa'alɛ a nɔtɔgɔheba la te ba ka tone bɔ'ɔra la ba mɛhe som zuo. Ge, ba tone la yamam som zuo wo ban yuun tɔgɔre yɛhera yelese'a te ya wom nananawa la. Ya me wom sɛla nananawa la dela yelesoma la te Na'ayenɛ tontoneba mɔɔlɛ bo ya la. La daa dela Na'ayenɛ Sea la n ze'ele a zen'an na la n daa bahɛ ba te ba mɔɔlɛ bo ya la. Yele ana wa dela sɛla te Na'ayenɛ soŋoreba la wan bote ne te ba bɔkɛ. 13Dene poan, da gan' ya ginha. Tare ya ya mɛhe soŋa soŋa ge bahɛ ya te yan sakɛ sɛla gura ya potɛn'ɛre poan la kɔ'ɔn tɛn'ɛha la som sebo te Na'ayenɛ yeti a eŋɛ bo ya daanse'ere daarɛ te Yesu Krista nɛɛra a mɛŋa na la. 14Nane ya Na'ayenɛ ge da le bahɛ ya te ya potɛn'ɛra le tɛn'ɛhɛ ya te ya bɔta te ya bɔna bɔŋsɛka taaba te ya daa nan ka sakɛ bo Yesu gee daa bɔna yia saŋa la, 15ge dene ya toolom nɛreba sɛla woo poan te ya eta wo Na'ayenɛ se'em n yi' ya na la n de fa'a se'em la. 16Ba golehɛ Yenɛ gɔŋɔ la yeti, Dene ya toolomdoma se'ere n sɔe mam Na'ayenɛ ya Yenɛ la dela fa'a. 17Ya han ne soha Na'ayenɛ, ya ne yi' en te ya Sɔ'. Enŋa n me de se'em n gankere nɛra woo boyena yɛhera sɛla te nɛra woo tom. Bala, la sontii ya bɔ'ɔra na'ahegɔ bala gura ya kum. 18Te ya mi' Na'ayenɛ n daa yɔ' yɔse'ere to'e ya bɔŋsɛka taaba n ka tare vɔnrɛ te ya daa tɔgɔhɛ ya sɔyaabdoma bɔna la. Sɛla te a daa dekɛ yɔ' to'e ya bahɛ la daa dagɛ la sɛla n kan bɔna wuuha wo sanlenpeelega bii sanlema. 19La dela toolom kaanbegɔ seko te Yesu Krista yuun dekɛ a ziim kaanbe wo pebila te sɛsɛla ka eŋɛ ka te yuun koora bɔ'ɔra Na'ayenɛ ba yelebe'ero zuo la. 20Na'ayenɛ daa pon loe Yesu mɛ gee baŋɛ naam teŋa wa zuo. Te nananawa, a bahɛ en te a nɛɛ teŋa ba'ahegɔ dabeha wa poan yamam zuo. 21Enŋa Yesu zuo te ya sakɛ bo Na'ayenɛ se'em n daa bahɛ en te a vo'e a kum poan la ge daa bahɛ en te a nyɛ' pɛnka la. Bala, te ya potɛn'ɛra wan kɔ'ɔn bɔna Na'ayenɛ zen'en yɛhera ya sakerɛ Yesu sore dɔlɔga la poan la sɛla te ya sakɛ ya suunre poan gura la. 22Nananawa, ya nya dela yelemɛŋɛrɛdoma yɛhera yan nane yetɔgom sebo n de yelemɛŋɛrɛ la. Ya me nya le baŋɛ te ya tare yelemɛŋɛrɛ nɔŋerɛ bo hon la se'em n lagom sakɛ bo Yesu n ane se'em. Bala, tara ya nɔŋerɛ ya suunre poan bo taaba. 23Te la dela Na'ayenɛ yetɔgom sebo n bahere te nɛreba nyɛta vom ge me bɔna wuuha la n bahɛ te ya dɛna nɛrepaalehe. Ya dela Na'ayenɛ se'em n kɔ'ɔn bɔna wuuha la kɔma. 24Ge ba golehɛ Yenɛ gɔŋɔ la poan yeti, Asaala woo dela mɔɔ te ba soŋa dɛna puuro. Mɔɔrɔ wan ku'ɛ te puuro wan suuɛ. 25Ge Na'ayenɛ yelehom boe la wuuha. Na'ayenɛ yelehom dela yelesoma wa te to mɔɔla bɔ'ɔra ya wa.

will be added

X\