1 Nadoma 6

1Naba Solomon pɔhɛ Yenɛ Yire la mɛta la Ziv ŋmarega la n de yuunɛ ŋmarehe seyi' la poan. Saŋkaŋa n de Solomon na'am dia yuuma anaahe, te Israeldoma n ze'ele Mizraim teŋa yehe na la yuuma kɔbehe senaahe la yuuma pihinii poan. 2Yenɛ Yire la te Solomon mɛ' bo' Na'ayenɛ la woko dela santira pihiyoobe te de yaleŋa dɛna santira pihiyi' te de saazuo woko dɛna santira pihitan'. 3Bɔpaka la n toŋe Yenɛ Yire la nɔɔrɛn la woko dela santira pihiyi' dɔla la Yenɛ Yire la yaleŋa la, ge te ka poan ko'olom Yenɛ Yire la nɛŋan na dɛna santira pia. 4En mɛ' Yenɛ Yire la bahɛ takɔla pegehe de zuin ha. 5A me mɛ' dangoone kae Yire la Saraa la bɔ' pooren la, mɛ bɔbibihe lamenɛ dangoone la kae. 6Deto seto n boe teŋa na la yaleŋa dela santira anuu, te seto n togolom pa'ahɛ boyi' la yaleŋa dɛna santira ayoobe, te seto n boe zuin la me yaleŋa dɛna santira ayopɔe. A mɛ taatɛ kae yeŋa dangoone la, te yuunhe la da ta pagalɛ yire la dangoone la zuo. 7Ba keŋɛ la kuga n boe zen'an, ta kerehɛ kuga, maalɛ a bilam tare na mɛta Yenɛ Yire la. Ban mɛte zen'an la, zan'anɛ bii kerehega bii kuto lɔgɔrɔ la n tare ŋmata kuga la voole la ka pɔnre bilam. 8Koleŋa sɛka n dole kɛn'ɛra teŋa deto la lebehe la yire la zuɔ bɔba, te kura ze'ele bilam zɔna yɛ'a deto seto n togolom boyi' la ze'ele bilam yɛ'a seto n boe zuin ha la. 9En mɛ yire la ba'ahɛ se'em n bala, ŋma dɔɔsonɔ yuunhe pu de zuin la zan'an ge bɔgɛ dɔɔ mɔlɔsonɔ dɔlama lahɛ dɛ. 10Lɔgɔrɔ biŋere deto la en mɛ kae yire la woko dela santira anuu anuu, kae te ba dekɛ dɔɔ mɔlɔsonɔ kpa' tɔ naɛ la Yenɛ Yire la. 11Na'ayenɛ tɔgɛ bo Solomon yeti, 12Yire wa te ho mɛta wa yelehom n wana. Ho han wan dɔla mam malema la mam nɔze'elego la ge dɔla mam bo'ore n nɔɔrɛ se'em la, n wan doohe ho poan tom mam pon biŋe n nɔɔrɛ la ho sɔ David se'em la. 13N wan bɔna la Israeldoma wa, kan malom zagahɛ n nɛreba Israel wa. 14Solomon n mɛ Yenɛ Yire la ba'ahɛ se'em n bala. 15A nya dekɛ dɔɔ mɔlɔsonɔ maalɛ Yire la poan dangoone la, ze'ele teŋa ta paɛ de zuin, ge dekɛ dɔɔ peela te'e de teŋa la. 16A aan Yire la poan santira pihiyi', maalɛ bilam me la dɔɔ mɔlɔsonɔ ma'an ze'ele teŋa ta paɛ zuin, beŋe bilam te la dɛna Saraa n de toolom zen'an. 17Bɔ'paka la mɛŋa n boe Saraa wa pooren na la yaleŋa dɛna santira pihinaahe. 18Yire wa poan zan'an dɛna dɔɔ mɔlɔsonɔ dangoone la kae te kugure ka nyɛta, te ba golɛ wama la puuro n tanhɛ lamenɛ. 19A maalɛ Saraa la poan te a dekɛ Na'ayenɛ nɔbiŋere daka la ze'ele bini. 20Saraa wa poan woko dela santira pihiyi', te ka yaleŋa dɛna santira pihiyi', te ka saazuo woko dɛna santira pihiyi'. Te ba dekɛ sanlema ma'an takɛ ka poan, ge dekɛ dɔɔ mɔlɔsonɔ maalɛ ko'ɛnka daka la. 21Te Solomon dekɛ sanlema takɛ Yire la poan, dekɛ sanlema zɔntɔ yule Saraa la n takɛ la sanlema ma'an la nɛŋan na. 22A takɛ Yenɛ yire la zan'an la sanlema se'em n bala, ge takɛ ko'ɛnka daka sɛka n boe Saraa la poan la la sanlema. 23Saraa la poan ha la, a dekɛ la kaam tia dɔɔrɔ maalɛ kelompagehedoma bayi', te ba woko dɛna santira pia. 24Kelompagehedoma wa ayema kelompaka kayema dela santira anuu, te kayema dɛna santira anuu, te a kelompagehe seyi' la zan'an dɛna santira pia. 25Kelompagehedoma ayema la me kelompagehe seyi' la me woko dɛna santira pia. Ba bayi' la zan'an dela boyena, ba woko la ba naanɛ poan. 26Kelompagehedoma wa ayema woko dela santira pia, te ayema me woko dɛna bala mea, te ba bayi' la dɛna boyena ba wɔnhom la ba woko poan. 27Te a dekɛ ba ze'ele Saraa la poan, te ba kelompagehe la yeregɛ. Te ayema kelompaka kayema du'ura Saraa la dangoone deyema, te ayema kelompaka kayema me du'ura Saraa la dangoone deyema la me ha. Te ba kelompaka sɛka n gee tɔɔra deo la teŋasoka na la, kalona taaba. 28A dekɛ sanlema takɛ kelompagehedoma bayi' wa. 29A golɛ la kelompagehedoma la kpa'kpa' tiihe la puuro n tanhere lamenɛ Saraa la poan la ka yeŋa dangɔɔma se'a n boe poan na la. 30Ge te a takɛ Saraa la teŋa, poan la yeŋa, la sanlema. 31A dekɛ kaam tia dɔɔrɔ maalɛ koleŋa sɛka n dole kɛn'ɛra Saraa la poan la, te dɔɔrɔ seto n tare koleŋa tara loga anuu. 32A kagɛ kelompagehedoma la kpa'kpa' tiihe la puuro n tanhere lamenɛ dɔɔrɔ toyi' wa, nya ŋmɛ' sanlema lamenɛ doohe ba. 33A me dekɛ kaam tia dɔɔrɔ maalɛ dɔɔseto n tare koleŋa sɛka n dole kɛn'ɛra bɔ'pooren na la te to tara loga anaahe. 34A dekɛ dɔɔ peela maalɛ kolehe seyi' n tan' pɔgɔla, te nɔɔrɛ deyena woo tara kolehe seyi'. 35Te a kagɛ kelompagehedoma la kpa'kpa' tiihe la puuro n tanhere eŋɛ se poan, ŋmɛ' sanlema lamenɛ doohe ba, kolehe la poan. 36Ge a dekɛ kuga te ba kerehe mɛ mɛɛhe setan' zenzaka kae, dekɛ dɔɔ mɔlɔsonɔ te ba magahɛ ŋma, nya toŋe mea kayena pa'ahɛ. 37Na'ayenɛ Yire wa ɛnberɛ biŋe la Solomon na'am dia yuuma anaahe poan Ziv ŋmarega la poan. 38Yuuma pia la deyena poan, ŋmarehe senii la n yi'ire Bul ŋmarega la poan, te Yire la sɛla woo la dene sone te de ana se'em la woo la mɛ ba'ahɛ. Solomon dekɛ la yuuma ayopɔe mɛ Yenɛ Yire la.

will be added

X\