1 Nadoma 5

1Tire teŋa naba Hiram la n ta wom te ba sɔ' Solomon la kaam te a tee ze'ele a sɔ na'arɛ te a dɛna naba la, te a tom a yamehe a zen'an na. Se'ere n sɔe la, naba Hiram la naba David yuun pon dɛna la zɔtɔ. 2Te Solomon le tom sɔɔleŋa bo Hiram yeti, 3Ho mi' te mam sɔ David daa ka nyaŋɛ mɛ Yire bo Na'ayenɛ a Yenɛ la doohe la enŋa daa boe zaba se'a n daa kae en zen'an woo la, te Na'ayenɛ mɛŋa ta bahɛ te a nyaŋɛ a diŋdoma wa. 4Nananawa, Na'ayenɛ mam Yenɛ la nya bo mam vo'ohogo zen'an woo, n ka tare dima bii daaŋɔ zen'an. 5Bala te n maahom mɛ te n mɛ' Na'ayenɛ n Yenɛ wa Yire, wo en yuun yele mam sɔ David se'em yeti, Ho dayɔsɛka te mam wan ta tee ka zin'ire ho na'am gɔŋɔ la zuo la n wan mɛ' Yire bo mam. 6Bo nɔɔrɛ te ba ŋma Lebanon mɔlɔsomɔ tiihe la bo mam na. N wan bahɛ te n tontoneba wa'ana pa'ahɛ hom tontoneba poan te ba ŋma tiihe la. N wan yɔ hɔ tontoneba la hom bote n yɔ ba se'em woo. Ho mi' te tomam ka tare sɛba n mi' tiihe lobega wo Sidondoma wa. 7Hiram n wom Solomon sɔɔleŋa wa la, a poorɛ pee mɛ, te a yeti, Pɛnka dɛna Na'ayenɛ denɛ zina la enŋa n bo David yamdaana te a beha a teŋkantɛ wa la. 8Te Hiram tom nɔɔrɛ bo Solomon yeti, N to'e ho sɔɔleŋa la te ho bo mam na la. N wan eŋɛ hom bote se'em la bo ho dɔɔ mɔlɔsonɔ la dɔsonɔ la. 9Mam nɛreba wan ŋma ba Lebanon, bilom ba ta bahɛ ko'kantɛ la nɔɔrɛn na, lo ba ta' taaba pugule ko'om la poan te to paɛ hom wan pa'alɛ zen'an la na. N wan bahɛ te n nɛreba lorom ba bilam, te ho vaara ge te hom me bɔ'ɔra mam dia na. 10Hiram n ŋmate dɔɔ mɔlɔsonɔ la dɔsonɔ la te Solomon bɔta la bɔ'ɔra en se'em n bala. 11Solomon me bɔ'ɔra Hiram ki dogorɔ kanra tuha pihiyi' la kaam somɔ dogorɔ pihiyi' yuunɛ woo te la dɛna a yire la poan dia. 12Na'ayenɛ bo Solomon yam wo n biŋe nɔɔrɛ la n se'em la. Te sunma'ahom bɔna Hiram la Solomon teŋasoka, te ba bayi' la eŋɛ nɔɔrɛ la taaba. 13Naba Solomon bahɛ te ba doohe Israel teŋa la woo poan luguhe tontoneba, te ba paɛ boraahe tuha pihitan'. 14Te a porɛ ba nɛre tuha pia, tuha pia te ba sɔɔhena taaba kena Lebanon teŋa ŋmarega woo, te ba ne keŋɛ ta bɔna Lebanon teŋa ŋmarega, ge lebe yire na bɔna ŋmarehe seyi'. Adoniram dɛna tontoneba wa kpɛ'ɛma. 15Solomon tara tontoneba sɛba n ziire tuha pihiyopɔe, ge tara sɛba me en ŋmate kuga tuha pihinii, te ba bɔna zɔya zuto, 16ge tara kpɛ'ɛndoma tuha atan' la kɔbehe setan' te ba beha toonɛ la ge pa'ala tontoneba la. 17Naba Solomon bo ba nɔɔrɛ te ba ŋma kugusoma dekɛ aŋa biŋe Yenɛ Yire la ɛnberɛ. 18Solomon la Hiram lɔgɔ maaleba la Gebal teŋa boraahe n ŋmate ge maala dɔɔrɔ la la kuga la te ba mɛ Yenɛ Yire la.

will be added

X\