1 Nadoma 20

1Aram teŋa naba Ben Hadad ta lagahɛ a pɛɛntɛɛnreba zan'an te ba dɛna nadoma pihitan' la bayi' la ba zaba yiri la i toroto, te a yehe te gum Samaria teŋa, zabɛ la ka. 2A tom nɛreba Israel naba Ahab zen'an teŋa poan yeti, Ben Hadad yeti, 3ho sanlenpeelega la ho sanlema la zan'an dela mam denɛ, te ho pɔgɔse'ehe woo n ane soŋa la ho kɔma sɛba woo n ane soŋa dɛna mam denɛ. 4Israel naba la lerege yeti, N daana naba n yele se'em la, lan bala. Mam la n tare sɛla woo dela ho denɛ. 5Nɛreba la le ta lebena yeti, Ben Hadad n yele se'em n wana. Mam tom ne na yeti ho sanlenpeelega la ho sanlema la ho pɔgɔba la ho kɔma dela mam denɛ. 6Ge beere wana ma'an n yeti n tom la n nɛreba te ba wa'ana ɛ hon naba yire la poan la ho nɛreba la woo yiya poan vaɛ sɛla woo n tare zuo keŋɛ. 7Israel naba wa yi' teŋa la poan keendoma zan'an na yele ba yeti, Behɛ ya boraa wa n eere n daaŋɔ se'em. Enŋa n tom na te a fan' mam pɔgɔba la n kɔma la n sanlenpeelega, la n sanlema la, mam ka zagahɛ. 8Keendoma la teŋa la nɛreba la zan'an lerege en yeti, Da kɛleha en bii ho sakɛ bo enŋa n bote se'em la. 9Bala te a lerege Ben Hadad n tom sɛba na la yeti, Ta yele ya n daana naba yeti, ho yameŋa la wan nyaŋɛ hom yele ne se'em yia la. Ge nananawa yele la, n kan nyaŋɛ denɛ. Te ba tare leregere la ta bo Ben Hadad. 10Ben Hadad nya tom sɔɔleŋa kayema le bo Ahab ha yeti, Yena wa tulugɛ mam, ba bahɛ te la bi'e mam gaŋɛ bala, mam nɛreba wa han kɛn' Samaria teŋa wa poan na te teŋa la puhugo gee wan vaɛ paɛ kunkute kunkute. 11Israel naba lerege yeti, Ta yele ya en yeti, se'em n nan yɛ a zaba lɔgɔrɔ kan ta'an ŋmɛ'ɛra a nyɔn'ɔn wo se'em n ze'ele zaberɛ lebena yɛ'ɛha a zaberɛ lɔgɔrɔ la. 12Ben Hadad la nadoma la ta bɔna la tiiheŋɔ zen'an la nyuura ge wom leregere wa. Te a bo a boraahe la nɔɔrɛ yeti, Maahom ya ta zabɛ. Bala te ba maahom te ba ta zabɛ la teŋa la. 13Ge bala ma'an la te nɔtɔgɔha me wa'an Israel naba Ahab mɔɔlɛ yeti, Na'ayenɛ n yele se'em n wana. Ya nyɛ pɛɛntɛɛnreba wa n zo'e se'em wa? N wan dekɛ ba eŋɛ ya nu'uhen zina, te ya wan baŋɛ te mam n de Na'ayenɛ. 14Te Ahab soke, Ane? Nɔtɔgɔha la yeti, Na'ayenɛ n yele se'em n wana. Pɛɛntɛɛnreba bonbilipaalehe la n nan dole zaba nɛŋadoma la poore la ma'an n pon yeti ba tom dɛ. Te Ahab soke yeti, Ane n wan pɔhɛ zaberɛ la? Te nɔtɔgɔha la yeti, Hom. 15Bala te Ahab lagahɛ a pɛɛntɛɛnreba bonbilipaalehe la n dole kpɛ'ɛndoma la poore la na, te ba zan'an kanlɛ dɛna boraa kɔbehe seyi' la pihitan' la bayi'. Te a kan'ahɛ Israel sɛba n gee la, te ba dɛna nɛreba tuha ayopɔe. 16Ba yehe wontɛɛŋa yɛ'a, ge te Ben Hadad la nadoma pihitan' la bayi' la n naɛ la en la bɔna ba tiiheŋɔ zen'an bugura. 17Israel pɛɛntɛɛnreba bonbilipaalehe wa n dole kpɛ'ɛn kanra poore la deŋɛ nɛŋa. Te Ben Hadad wa me tom te ba wa'ana yele en yeti, Nɛreba n ze'ele Samaria kena na. 18A yele ba yeti, Ba han yehe mɛ la sunma'ahom na, nyɔkɛ ya ba voto. Ba han le yehe la zaberɛ na, nyɔkɛ ya ba voto. 19Te pɛɛntɛɛnreba bonbilipaalehe la naɛ taaba yehe na, te pɛɛntɛɛnreba la nya bɔna ba pooren, 20te ba ayena woo kɛ'ɛra a nɛra a nɛra lɔbera. Te Aramdoma eŋɛ zoa, te Israeldoma la digera ba. Te Aram naba Ben Hadad zom a yiri zɔ peɛn, enŋa la a yiri ban'areba basɛba. 21Israel naba dige yiri la la i toroto la, ko Aramdoma la gaŋɛ. 22Pooren te nɔtɔgɔha wa'an na yele Israel naba wa yeti, Kpemehe ho mɛŋa, la ho behɛ sɛla n sone tom. Se'ere n sɔe la, sapɔlɔgɔ beere, Aram teŋa naba wa wan le zabɛ la hɔ. 23Bala ma'an la te Aram teŋa naba kpɛ'ɛndoma la kan'an en mɛ yeti, Israeldoma yena la dela zɔya zuo yena. Bala n sɔe te ba kpe'em ne la tɔ bala la. Ge to han zabɛ la ba paberɛ poan, to wan nyaŋɛ ba. 24Eŋɛ yele dena wa yia. Yehe nadoma la woo ba kpe'eŋo la poan, ge tee kpɛ'ɛndoma basɛba ze'ele ba zen'enhe la. 25Ge me ɛ pɛɛntɛɛnreba tee ze'ele sɛba n ki la na'arɛ, ge tee yeho bii yiri toroko woo, te la zona la la sɛla woo n ka doohe lebe na la tee ze'ele, te to ta'an zabɛ la Israeldoma wa paberɛ poan. La han eŋɛ bala, tomam wan kpe'em gaŋɛ ba. Te naba la sakɛ bo ba, ge eŋɛ bama n bote se'em la. 26Te sapɔlɔgɔ ta paɛ, te Ben Hadad kan'ahɛ Aram teŋa pɛɛntɛɛnreba wa te ba keŋɛ Apek te ba ta zabɛ la Israeldoma. 27Israeldoma la kan'ahɛ ba mɛhe ba'ahɛ, la ba zaba lɔgɔrɔ yehe na te ba to'ohɛ ba. Israeldoma la tiihom ba nɛŋan ha ana wo piihe bii boohe n kaahom taaba la, ge te Aramdoma la perɛ bɔn'ɔn la zan'an. 28Na'ayenɛ nɛra wa tɔgɛ bo Israel naba yeti, Na'ayenɛ n yele se'em n wana. Aramdoma wa n yeti mam Na'ayenɛ wa dela zoore zuo yenɛ ge dagana paberɛ poan yenɛ la zuo, n wan dekɛ ba pɛɛntɛɛnreba kooŋɔ wa eŋɛ ho nu'uhen, te ho baŋɛ te mam n de Na'ayenɛ. 29Dabeha ayopɔe te ba tiihom beha taaba. Yopɔe daarɛ la te zaberɛ la pɔhɛ. Israeldoma ko Aram pɛɛntɛɛnreba sɛba n kene teŋa, tuha kɔbega de daarɛ. 30Ge te Aram pɛɛntɛɛnreba sɛba n gee la woo zɔ ta saa Apek teŋa, te teŋa la dangoone lu di' ba, ko nɛre tuha pihiyi' la ayopɔe, ge te Ben Hadad zɔ kɛn' teŋa la poan ta sogɛ saraa poan. 31Naba wa kpɛ'ɛndoma la yele en yeti, Behɛ, tomam wom te Israel nadoma la dela ninbɔn'zɔteba. Bahɛ te to dekɛ sunsagaŋɔ futo wooe to sɛɛhe, ge dekɛ mi'inhe lo to zuto keŋɛ naba la zen'an, daanse'ere a wan bahɛ hɔ. 32Te ba dekɛ sunsagaŋɔ futo wooe ba sɛɛhe ge dekɛ mi'inhe lo ba zuto keŋɛ Israel naba ta yeti, Ho yameŋa Ben Hadad yeti a belone ho mɛ ho bahɛ en. Te naba la lerege ba yeti, A kelom vɔna mɛ? A dela mam sɔɔn. 33Boraahe la kɔ'ɔn zɛɛ de kalam te de dela yelesone yeti, Ɛɛn, ho sɔɔn Ben Hadad! Te naba la yeti, Keŋɛ ya ta tare en na. Ben Hadad n paɛ na la te Ahab bahɛ te a zom a yiri toroko zuo na. 34Ben Hadad yeti, Mam wan lebehe teŋse'ehe woo te mam sɔ to'ohe hom sɔ zen'an la, ge te ya tara ya da'a Damaskus teŋa wo mam sɔ n tare se'em Samaria la. Te Ahab yeti, Ho han wan biŋe nɔɔrɛ, n wan bahɛ hɔ. Te a biŋe nɔɔrɛ, te Ahab nya bahɛ en te a keŋɛ. 35Doohe Na'ayenɛ yelehom, nɔtɔgɔha ayema porɛ yele a tadaana yeti, Dekɛ sɛla pɔgɔlom mam na. Te a zagahɛ. 36Te a yele en yeti, Hom ka nam Na'ayenɛ la zuo, ho han bahɛ ka'lam, gbegenɛ wan ko hɔ. Boraa la n ta keŋɛ la, gbegenɛ n seke n ko en. 37A le ta nyɛ boraa kayema yeti, Pɔgɔlom mam na. Te boraa la kɛ' en pɔgɔlom. 38A nya keŋɛ ta zɛ'a sore gura naba la, ge pin' a nini na la tanɛ. 39Naba la n tɔla, te nɔtɔgɔha yi' en yeti, Ho yameŋa wa kɛn' ne la zaberɛ la poan poan ha, te nɛra ayema nyɔkɛ nɛra bo mam yeti, beha nɛra wa ge ka han bɔregɛ ho wan tee dekɛ ho vom yɔ a vom bii ho yɔ sanlenpeelega bɔɔrega. 40Ho yameŋa wa n mɔ'ɛ nini eta ka'lam la ke' la, te boraa la bɔregɛ. Israel naba la yeti, Ho yɔɔrɛ n bala. Ho mɛŋa la n yi' yɔɔrɛ la bahɛ ho zuo. 41Nɔtɔgɔha la pilige tanɛ la a nɛŋan la kalam, te Israel naba la baŋɛ en te a ze'ele la nɔtɔgɔheba la poan na. 42A yele naba la yeti, Na'ayenɛ n yele se'em n wana. Hom bahɛ la nɛra se'em te mam maahom te a ki. Bala ho kum n wan tee a kum, te ho nɛreba tee a nɛreba. 43Israel naba la uke la sunsunya kule a yire Samaria poan.

will be added

X\