1 Nadoma 19

1Te naba Ahab yele a pɔga Yezebel Eliya n eŋɛ sɛla woo la la en kɔrom nɔtɔgɔheba la se'em. 2Bala te Yezebel tom Eliya zen'an yeti, Dekɛ yɛ'a beere wana ma'an, mam han ka eŋɛ ho vom wo hom eŋɛ ba ayena ayena vom se'em la, yena wa tulugɛ mam. 3Dabeem kɛn' Eliya, te a ihege zɔ a vom zuo, zɔ na paɛ Beerseba teŋa n boe Yuda teŋa poan la, bahɛ a yameŋa bilam, 4ge keŋɛ dabaherɛ munɛ kɛn' pɔgɔtia poan ha. A wa'ana paɛ sɔɔrɔ tia, zin'ire ka teŋa, sohɛ kum bo a mɛŋa. A sohɛ yeti, Na'ayenɛ, mam nyɛ sɛla la seke ya. Dekɛ n vom wa. Mam ka nyane n yaabdoma. 5A nya gan'arɛ tia la teŋa zɛɛ gɔɔm. Te Yenɛ soŋora wa'ana na kalom en yeti, Ihege di. 6A behɛ kae, te boroboro n pagɛ bugum saana zuo la ko'om la lenka zɛ'a a zuin bɔba. Te a di ge nyu', ge lebe gan'anrɛ. 7Na'ayenɛ soŋora la le lebe boyi' poan na kalom en yeti, Ihege di ge ho tare la sɔrɔɔ woko. 8Te a ihege di ge nyu'. Te dia la bo en paŋa te a keŋɛ dabeha pihinaahe, yu'uŋɔ la wontɛɛŋa na paɛ Horeb n de Yenɛ zoore la. 9Bilam te a kɛn' taŋa yoko poan gan'arɛ yu'uŋɔ la. Te Na'ayenɛ yele en yeti, Ho ete la bem ka'lam, Eliya? 10Te a lerege yeti, Mam ba' mɔ'ɛ la nini la Na'ayenɛ Pɛɛntɛɛnreba Yenɛ la yele. Se'ere n sɔe la, Israeldoma wa zagahɛ ho nɔbiŋere la mɛ, wɔnrɛ ho kaanbegɔ zen'enhe la, ge kɔrom ho nɔtɔgɔheba la zan'an. Mam ma'an n gee, te ba zegera te ba ko mam me. 11Na'ayenɛ yele en yeti, Yehe na keŋɛ ta ze'ele zoore wa zuo ha n nɛŋan, ge n wan doohe tole. Te sabeeo kantɛ wa'ana aanhom zɔya la, wɔnrɛ tanhe Na'ayenɛ nɛŋan, ge Na'ayenɛ ka boe sabeeo la poan. Te sabeeo la n tole, te teŋmiiŋɔ miim, ge Na'ayenɛ ka boe teŋmiiŋɔ la poan. 12Te teŋmiiŋɔ la n tole, te bugum wa'ana, ge Na'ayenɛ ka boe bugum la poan. Te bugum la n tole, te sabeeo man'aherɛ lɔbera baanlam. 13Eliya n wom ko lɔbega la, te a ve'e a fuwoko la pin' a nɛŋa, nya yehe yoko la nɔɔrɛn na zɛ'a. A yeti a behɛ te konkore soke en yeti, Ho ete la bem ka'lam, Eliya? 14Te a lerege yeti, Mam ba' mɔ'ɛ la nini la Na'ayenɛ Pɛɛntɛɛnreba Yenɛ la yele. Se'ere n sɔe la, Israeldoma wa zagahɛ ho nɔbiŋere la mɛ, ge wɔnrɛ ho kaanbegɔ zen'enhe la, ge kɔrom ho nɔtɔgɔheba la zan'an. Mam ma'an n gee, te ba zegera te ba ko mam me. 15Na'ayenɛ yele en yeti, Lebe dekɛ sɔrɔɔ seko te ho doohe wa'ana la lebe Damaskus pɔgɔtia la poan. Ho han paɛ bini, ho sɔ' Hazael la kaam, te a dɛna Aram teŋa naba. 16Ge me sɔ' Nimsi dayɔa Yehu la kaam te a dɛna Israel naba, ge sɔ' Abel Mehola boraa Sapat dayɔa Elisa la kaam te a ta soe ho dɛna nɔtɔgɔha. 17Yehu wan ko se'em woo n peɛn Hazael so'a, te Elisa me ko se'em woo n peɛn Yehu so'a. 18Ge la bala zan'an, mam tare nɛreba tuha ayopɔe Israel teŋa wa poan n ka na'ahe Baal, te ba nu'o ka gin' en. 19Te Eliya bahɛ bilam ge keŋɛ ta nyɛ Sapat dayɔa Elisa, te a yɔgɛ la lɔlehe pia la seyi' kɔɔra, vɛ'ɛra se'ehe n pa'ahɛ pia la seyi' la. Eliya keŋɛ paɛ en dekɛ a fuwoko la pagalɛ en. 20Elisa bahɛ lɔlehe la, ge zɔta dɔla Eliya yɛta te, Bahɛ te n paɛ nyɛ n sɔ la n ma, ge keehe ba ge wa'ana doohe ho. Te Eliya yele en yeti, Lɛbera. Mam eŋɛ ho la bem? 21Te Elisa lebe, ta nyɔkɛ enŋa n tare lɔlehe se'ehe seyi' kɔɔra la kɔrom, ge wɛgɛ niikuunre la n de dɔɔrɔ la dogɛ nɛnɔ la bo nɛreba te ba obe. Te a nya yehe dɔla Eliya dɛna a soŋora bɔna a nɛŋan.

will be added

X\