1 Nadoma 18

1Te la ta yuue paɛ yuuma atan', te Na'ayenɛ yele Eliya yeti, Tare ho mɛŋa ta pa'alɛ naba Ahab, te n bahɛ te saa ni bo teŋa wa. 2Te Eliya keŋɛ te a ta dekɛ a mɛŋa pa'alɛ naba Ahab. Lan eŋɛ bala la, kom la ba' sige Samaria teŋa poan. 3Te naba Ahab yi' Obadia n behere naba yire la, te Obadia wa dela se'em zote Na'ayenɛ. 4Se'em ma'an te Yezebel n ta koora Na'ayenɛ nɔtɔgɔheba la, Obadia wa tare la nɔtɔgɔheba kɔbega ta sogɛ ba tanhe yogoro toyi' poan, ba pihinuu woo poan, bɔ'ɔra ba dia la ko'om. 5Ahab ta yele Obadia yeti, Doohe kae teŋa wa poan bɔgɔhe la bɔn'ɔrɔ woo poan behɛ, to wan nyɛ yaama bo to yiri wa la to yiribonhe wa te to da kɔrom to dunhe wa yoo. 6Te ba tɔnrɛ teŋa la te ba wan kae ka se'em la, te naba Ahab yɛ'a ke', te Obadia me yɛ'a ke'. 7Obadia n kaare la, te Eliya ta to'ohɛ en. Obadia baŋɛ en, dɔnbelɛ teŋa ge yeti, Hom bala, n daana Eliya? 8A yeti, Ɛɛn, ta yele ho daana la te Eliya boe ka'lam. 9Obadia soke yeti, N tue la dene te ho dekera mam ho yameŋa tu'ula la Ahab te a ko mam wa? 10Mam pɔ' la Na'ayenɛ ho Yenɛ wa yeti, teŋa bii sɔ'ɔlom ka boe te mam daana wa ka tom nɛra bini te a ta ɛ hɔ. Teŋa bii sɔ'ɔlom sebo han ne yeti ba ka nyɛ hɔ bini, a ne bahɛ te ba pɔ mɛ te ba seren ka nyɛ hɔ. 11Ge hom nyɛta mam nananawa te n ta yele n daana wa te Eliya boe ka'lam wa. 12N me ka mi' mam wan bahɛ ka'lam te Na'ayenɛ sea paŋa dekɛ hɔ keŋɛ zen'an. Mam han keŋɛ ta yele Ahab, te a ka nyɛ hɔ, a wan ko mam. Ge te mam ho yameŋa wa me kɔ'ɔn na'aha Na'ayenɛ mɛ n bilomen ha. 13N daana, hom ka wom Yezebel n ta koora Na'ayenɛ nɔtɔgɔheba la te mam eŋɛ se'em? Mam vaɛ Na'ayenɛ nɔtɔgɔheba wa mɛ kɔbega, ta sogɛ ba tanhe yogoro toyi' poan pihinuu pihinuu, bɔ'ɔra ba dia la ko'om. 14Ge nananawa hom yele mam se'em te n ta yele n daana wa te Eliya boe ka'lam la. A yeti a ko mam mɛ. 15Te Eliya yeti, N pɔ' la Pɛɛntɛɛnreba Na'ayenɛ te mam tona bɔ'ɔra en wa yeti n wan dekɛ en mɛŋa pa'alɛ Ahab zina. 16Bala te Obadia keŋɛ Ahab zen'an ta yele en. Te Ahab ihege to'oha Eliya na. 17En ta nyɛ Eliya la, a yele en yeti, Hom bala, Israel daandaana wa? 18Eliya lerege yeti, Mam ka daam Israel. La dela hom la ho sɔ yire la. Yamam zagahɛ Na'ayenɛ n bo ya a nɔɔrɛ la mɛ, ge dɔla Baal baga. 19Nananawa, lagahɛ Israel nɛreba la zan'an te ba to'ohɛ mam Karmel zoore la zuo na. Te ho tare Baal bagarɛ nɔtɔgɔheba kɔbehe senaahe la pihinuu la na la Aserah bagarɛ nɔtɔgɔheba kɔbehe senaahe la te ba woo n dite Yezebel tebole zuo la na. 20Te Ahab tom sɔɔleŋa bo Israel zan'an, ge lagahɛ nɔtɔgɔheba la zan'an Karmel Zoore la zuo. 21Eliya tole ze'ele nɛreba la nɛŋan yeti, Wane ma'an te to wan bahɛ to bo'a wa? Na'ayenɛ n han dɛna Yenɛ, dole ya en. Baal n han dɛna Yenɛ, dole ya en. Te nɛreba la yee suram. 22Eliya nya yele ba yeti, Mam ma'an n de Na'ayenɛ nɔtɔgɔha yee, ge Baal tare la nɔtɔgɔheba kɔbehe senaahe la pihinuu. 23Bahɛ te ba ɛ lɔlehe seyi' bo to. Bahɛ te ba mɛŋa loe bama n bote sebo, la ba ŋma bɔ pagalɛ dɔɔrɔ zuo, ge da toorɛ bugum. Mam me wan eŋɛ boyema la me bala pagalɛ dɔɔrɔ zuo ge da toorɛ bugum. 24Te ya yi' ya yenɛ la, te mam me yi' n Na'ayenɛ la. Te se'em n lerege na la bugum enŋa n de Yenɛ. Te nɛreba la zan'an yeti, Hom yele se'em la n de sera. 25Eliya yele Baal nɔtɔgɔheba la yeti, Loe ya nahɔ la boyema maalɛ yia, yamam pon zo'e mɛ. La ya yi' ya yenɛ la ge da toorɛ bugum. 26Te ba loe lɔlega wo n yele se'em la, maalɛ ka. Ba nya pɔhɛ yi'ira Baal bolika tara tara te wontɛɛŋa ta bɔna zuo teŋasoka. Ba nyabera yeti, Baal, lerege to na! Ge lebehegɔ la koyena me ka boe. Te ba wa'ara kaara kaanbegɔ zen'an la te ba maalɛ la. 27Bɔna bɔna wontɛɛŋa, Eliya pɔhɛ ba ɛnregerɛ yɛta yeti, Nyabere ya mɛ ge a seren dela bagarɛ! Daanse'ere a nan tɛn'ɛhere mɛ bii a nini n mɔ'ɛ la toonse'ere bii a keŋɛ la zen'an. Daanse'ere a gan' ginha, te la dɛna ya nɛɛ en. 28Te ba wa nyabera, ge ŋma ba mɛhe la so'ahe la kana wo ba malema la n de se'em la, te ziim ta ka'ara. 29Wontɛɛŋa ta tole te ba yirige la ba porega la te la ta yɛ'a zanɔɔrɛ kaanbegɔ saŋa, ge lebehegɔ ka boe, leregere ka boe, sɛla ka kelehe ba. 30Eliya nya yele nɛreba la yeti, Lagahɛ ya n zen'an na. Te ba paɛ a zen'an na, te a malom maalɛ Na'ayenɛ kaanbegɔ zen'an la n sagom la. 31Eliya dekɛ la kuga pia la ayi', wo Israel yizuto la kanlɛ n de se'em ze'ele Yakob se'em te Na'ayenɛ yele en yeti, Ho yu'urɛ wan yi'ira la Israel la. 32A dekɛ kuga la mɛ kaanbegɔ zen'an bo Na'ayenɛ yu'urɛ la, tun' boko kantɛ kae zen'an la, te boko la wan nyaŋɛ to'e ko'om la wama kanra anii. 33A maalɛ dɔɔrɔ la, ŋma lɔlega la zɔnra zɔnra bagalɛ dɔɔrɔ la zuo. A nya yele ba yeti, Ankɛ ya ko'om yɔya anaahe na ka'ahɛ eŋɛ bo'olom wa la dɔɔrɔ la zan'an zuo. 34A le yele ba yeti, Le eŋɛ ya bala, te ba eŋɛ. Te a yeti, Le eŋɛ ya pa'ahɛ botan'. Te ba eŋɛ pa'ahɛ botan'. 35Ko'om la ɔkɛ kaanbegɔ zen'an la ta perɛ boko la. 36La paɛ zanɔɔrɛ kaanbegɔ saŋa, te nɔtɔgɔha Eliya nya tole na nya sohɛ yeti, Na'ayenɛ, Abraham la Isaak la Israel Yenɛ, bahɛ te ba baŋɛ zina te hom n de Yenɛ Israel wa poan, te mam dɛna ho yameŋa, ge me tom toon ana wa woo doohe la hom bo mam nɔɔrɛ se'em la. 37Na'ayenɛ, lerege mam te nɛreba wa baŋɛ te hom Na'ayenɛ n de Yenɛ, ge me baŋɛ te ho ŋmɛregere la ba sunya lɛbera na le yɛ'ɛha. 38Te Na'ayenɛ bugum lu na, di kaanbegɔ la dɔɔrɔ la kuga la tentɔnɔ la, ge me di kaanbɛ ko'om n boe boko la poan. 39Nɛreba la n nyɛ wana la, ba zin'ire mɛ pɔnrɛ na'ma ge kaahɛ yeti, Na'ayenɛ n de Yenɛ! Na'ayenɛ n de Yenɛ! 40Eliya nya bo nɛreba la nɔɔrɛ yeti, Nyɔkɛ ya Baal nɔtɔgɔheba wa, da bahɛ ya te ba ayena peɛn! Te nɛreba la n nyɔkɛ ba, te Eliya bahɛ te ba tare ba sige Kison Bɔn'ɔn la poan ta kɔrom ba bilam. 41Eliya yele Ahab yeti, Keŋɛ ta di ge nyu' te saakantɛ damɛ ya. 42Te Ahab keŋɛ te a ta di, ge nyu', ge te Eliya zom Karmel zoore la zuin ha, ta zin'ire dekɛ a zuo kpa'a a duma. 43A yele a yameŋa yeti, Keŋɛ ta behɛ ko'kantɛ wa bɔba ha. Te a yameŋa keŋɛ ta behɛ ge yeti, Sɛla ka boe. Sugumnɔɔren boyopɔe te Eliya yele en te a lebe ta behɛ. 44Boyopɔe poan la a yameŋa wa'ana yeti, Saŋgbanɛ n zone la nɛra nu'o en zone na. Te Eliya yele en yeti, Keŋɛ ta yele Ahab yeti, maahom ho yiri toroko sige ge te saa la paɛ na. 45Bala ma'an te saŋgbanɛ nya sobege mɛ la saa saŋgbana, te sabeeo vukura, te saakantɛ ka'ara, te Ahab zom a toroko la yɛ'a Yezreel. 46Na'ayenɛ paŋa sige Eliya zuo, te a dekɛ a sɛganɛ lo' a fuwoko, zɔ gaŋɛ Ahab ta paɛ Yezreel teŋa.

will be added

X\