1 Nadoma 17

1Tisbe teŋa boraa Eliya ze'ele Tisbe teŋa n boe Gilead teŋa poan la, yele naba Ahab yeti, Na'ayenɛ Israel Yenɛ wa, Yenɛ wa te mam tona bɔ'ɔra wa, yeti, Yuuma se'a n kene na wa, mɛgelom kan bɔna bii saa ni, han dagana mam mɛŋa n ta yeti la eŋɛ bala. 2Te Na'ayenɛ nya ta yele Eliya yeti, 3Bahɛ ka'lam ge ŋmɛregɛ lebe dapɔya bɔba ha ta sogɛ ho mɛŋa Kerit Kolaa la n boe Yordan Kolaa dapoore bɔba la. 4Ho wan nyuura la bɔka la poan, te n bo goɔnrɔ nɔɔrɛ te to bɔ'ɔra ho dia bilam. 5Te Eliya eŋɛ Na'ayenɛ n bo en nɔɔrɛ se'em la, keŋɛ Kerit Kolaa la n boe Yordan Kolaa dapoore bɔba la ta bɔna bilam. 6Goɔnrɔ tara dia la nɛnɔ kena bolika na, tara dia la nɛnɔ kena zanɔɔrɛ na, ge te a nyuura bɔka la poan. 7Pooren te bɔka la ta keenhɛ, saa n ka ni teŋa la poan la zuo. 8Na'ayenɛ nya yele Eliya yeti, 9Ihege keŋɛ Zarepat teŋa n boe Sidon teŋa poan la nananawa ta bɔna bilam. N bo pɔkɔɔnrɛ n boe bini nɔɔrɛ te de bɔ'ɔra hɔ dia. 10Te a ihege keŋɛ Zarepat teŋa la poan. En ta paɛ teŋa la nayaŋa nɔɔrɛn la, pɔkɔɔnrɛ n ze' bini pin'iha dɔɔrɔ. Te a yi' en yeti, Ho kan tare ko'om fiin na bo mam te n nyu? 11En kanbele yɛ'a la, te a yi' en yeti, N belone ho mɛ, ta tare boroboro fiin wa pa'ahɛ na bo mam. 12Pɔka la lerege en yeti, Mam pɔ' la Na'ayenɛ ho Yenɛ, mam ka tare dia la fiin wa me. Zom kunkute ma'an n boe kumpin'o poan ha, la kaam fiin wa n boe dugula poan ha. Mam lagahere la dɔɔrɔ wa fiin wa, te n tare ta dekɛ eŋɛ sɛla te mam la n bibodibila di ge ki. 13Eliya yele en yeti, Da bahɛ te ho yam yɔ'ɔra. Kule ta eŋɛ hom tɛn'ɛhɛ se'em la. Ge yia, ta tɔnbegɛ hom tare sɛla la maalɛ man'aherɛ peka na bo mam, ge eŋɛ sɛla bo ho mɛŋa la ho bia la. 14Na'ayenɛ Israel Yenɛ la n yele se'em n wana. Zom kan malom ba'ahɛ kumpin'o la poan, te kaam la me kan malom ba'ahɛ dugula la poan, gura daanse'ere daarɛ te Na'ayenɛ wan bahɛ te saa ni teŋa wa poan la. 15Pɔka la keŋɛ ta eŋɛ Eliya n yele en se'em la. Te dia bɔna daarɛ woo bo Eliya la pɔka la ka nɛreba. 16Se'ere n sɔe la, kumpin'o la poan zom la ka malom ba'aha, te dugula la poan kaam la ka malom ba'aha wo Na'ayenɛ yelehom la te Eliya yele se'em la. 17Pooren te pɔkɔɔnrɛ la dayɔa la ta bɛn'ɛnra. Te ban'an la malom gaŋera, te a ka le ta vɔ'ɔha. 18Pɔka wa yele Eliya yeti, N tuure dela dene la hɔ Yenɛ nɛra wa? Hom wa'ana te ho tɛɛn mam mɛ n be'em n de se'em ge ko mam bia wa? 19Eliya yeti, Tare bia la na. A nya to'e bia la pɔka la nu'uhen tare ka zom saazuo bɔ'ɔ la te a gan'an la, ta dekɛ bia la gan'anrɛ a soŋɔ zuo. 20A nya kaahɛ bo Na'ayenɛ yeti, Na'ayenɛ n Yenɛ wa, ho tare la nɔyalegerɛ wa'an pɔkɔɔnrɛ wa te mam kɛn'ɛra la de wa zuo na, doohe la hom ko ka bia wa. 21A sure a mɛŋa bia la zuo sugumnɔɔren botan' ge kaahɛ bo Na'ayenɛ yeti, Na'ayenɛ n Yenɛ wa, bahɛ te bodibila wa vom lebe ka poan na. 22Na'ayenɛ nya wom Eliya kaahega la, te bodibila wa vom la lebe ka poan na, te ka vo'e. 23Eliya nyɔkɛ bia la bɔ'ɔ la poan lebe yire la poan na bo ka ma la ge yeti, Behɛ ho bia la vo'e ya! 24Pɔka la nya yele Eliya yeti, Nananawa, mam mi' te ho dela Yenɛ nɛra, te Na'ayenɛ yelehom sebo n ze'ele ho nɔɔrɛn na la dɛna sera.

will be added

X\