1 Nadoma 16

1Te Na'ayenɛ yelehom wa'an Hanani dayɔa Yehu te a porɛ bahɛ naba Baasa zuo yeti, 2Mina te mam dekɛ ho la puhugo poan na, tebegɛ hɔ te ho dɛna mam nɛreba Israel wa nɛŋadaana. Ge ho dole la Yeroboam sɔya la, bahɛ te mam nɛreba Israel wa tom be'em nyiihe mam sunsunya la ba be'em la. 3Bala zuo, mam maahom te n di Baasa la a yire zan'an mɛ. N wan eŋɛ ho yire la wo Nebat dayɔa Yeroboam yire la. 4Baahe wan obe Baasa yire nɛresɛba n wan ki teŋa poan, te niihe di sɛba n wan ki mɔen ha. 5Baasa saŋa tooma a se'a la n eŋɛ se'em la sɛla woo te a nyaŋɛ eŋɛ n golehɛ eŋɛ la Israel nadoma yɛla gɔŋɔ la poan. 6Te Baasa kule paɛ a sɔdoma, te ba pin' en Tirza teŋa, te a dayɔa Elah sɔe dɛna naba. 7Nɔtɔgɔha Yehu n de Hanani dayɔa porɛ bahɛ Baasa la a yire zan'an zuo doohe la a be'em la te a tom Na'ayenɛ nɛŋan la. A nyiihe Na'ayenɛ suunre mɛ doohe la en sagom Yeroboam yire te nɛra ka yee wan di na'am la. A yire la me wa'ana ba'ahɛ la bala mea. 8Yuda naba Asa na'am gɔŋɔ zuo yuuma pihiyi' la ayoobe poan, te Baasa dayɔa Elah sɔe dɛna Israel naba Tirza teŋa behɛ Israel teŋa yuuma ayi'. 9Elah kpɛ'ɛndoma ayema Zimri n sɔna yiri toroto la porogerɛ, beha kae naba wa pooren. Te Elah n boe la Tirza, ta buge la Arza n gure naba yire la yire. 10Zimri wa'ana ko' en. Yuda naba Asa na'am dia yuuma pihiyi' la ayopɔe poan en bala. Zimri sɔe dɛna Israel naba. 11N zin'ire na'am gɔŋɔ la zuo ba'ahɛ pɔhɛ te a behɛ teŋa la, a ko Baasa yire nɛreba la zan'an. A ka bahɛ la boraa kayena me n de zɔ bii a sɔɔn. 12Zimri n sagom Baasa yire se'em n bala, te la doohe la Na'ayenɛ yelehom la te nɔtɔgɔha Yehu porɛ bahɛ Baasa, 13be'em sebo te Baasa la a dayɔa Elah tom bahɛ te Israel zan'an tue nyie Na'ayenɛ suunre la ba baga la zuo. 14Naba Elah saŋa tooma a se'a la en eŋɛ sɛla woo la golehɛ eŋɛ la Israel nadoma yɛla gɔŋɔ la poan. 15Yuda naba Asa na'am dia yuuma pihiyi' la ayopɔe poan, te Zimri behɛ Israel la dabeha ayopɔe Tirza teŋa. Bala ma'an te Israel pɛɛntɛɛnreba la tiihom Gibeton n de Pilistia teŋa la poan. 16Israeldoma la n boe tiiheŋɔ la poan la n ta wom te Zimri yehe naba la pooren mɛ ge ko en la, te ba zan'an bobe Omri n de zaba nɛŋadaana ba naba de daarɛ mea tiiheŋɔ la poan. 17Omri la sɛba woo n boe la en la nya bahɛ Gibeton ge lebe ta gum Tirza teŋa te ba zabɛ la ka. 18Zimri n ta baŋɛ te ba nyaŋɛ teŋa la mɛ la, te a kɛn' naba yire la teŋasoka ha ge laŋɛ yire la la bugum kae a mɛŋa bahɛ teŋasoka. N ki se'em n bala 19a be'em sebo te a tom la, tona be'em Na'ayenɛ nɛŋan, dɔla Yeroboam sɔya la a be'em sebo te a tom bahɛ te Israel zan'an tue la zuo. 20Zimri saŋa tooma a se'a la a tobekperega tooma la te a tom la golehɛ eŋɛ la Israel nadoma yɛla gɔŋɔ la poan. 21Te Israel nɛreba la nya yelege boyi', te sɛba dɔla Ginat dayɔa Tibni te enŋa dɛna naba, te sɛba me dɔla Omri. 22Ge Omri nɛreba la kpe'em gana Ginat dayɔa Tibni nɛreba la. Te Tibni ki, te Omri dɛna naba. 23Yuda naba Asa na'am gɔŋɔ zuo yuuma pihitan' la deyena poan, te Omri di Israel na'am behɛ Israel yuuma pia la ayi', yooma ayoobe Tirza teŋa. 24A da' Samaria teŋa zoore, sanlenpeelega bɔɔrehe ayi' Semer zen'an, mɛ teŋa zoore la zuo, dekɛ ka segɛ Semer se'em n sɔe zoore la yi'ira ka Samaria. 25Ge Omri wa tom be'em Na'ayenɛ nɛŋan, tom be'em gana sɛba woo n deŋɛ a nɛŋa na la. 26A dole la Nebat dayɔa Yeroboam sɔya la te a bahɛ te Israel tue, nyiihe Na'ayenɛ Israel Yenɛ la suunre la ba yeleyooro la zuo. 27Omri saŋa yɛla a se'a la, en eŋɛ sɛla la en nyaŋɛ eŋɛ yelese'a la golehɛ eŋɛ la Israel nadoma yɛla gɔŋɔ la poan. 28Omri kule paɛ a sɔdoma, te ba pin' Samaria, te a dayɔa Ahab sɔe dɛna naba. 29Yuda naba Asa na'am gɔŋɔ zuo yuuma pihitan' la anii poan, te Omri dayɔa Ahab sɔe a sɔ na'arɛ dɛna Israel naba, bɔna Samaria teŋa beha Israel zan'an yuuma pihiyi' la ayi'. 30Omri dayɔa Ahab wa tom be'em Na'ayenɛ nɛŋan gaŋɛ sɛba woo n deŋɛ a nɛŋa na la. 31En tom Nebat dayɔa Yeroboam be'em la woo la, la ka seke, ge a keŋɛ ta di Sidondoma naba Etbaal pɔyɔa Yezebel, nya pɔhɛ tona bɔ'ɔra ba bagarɛ Baal ge na'ahera dɛ. 32A maalɛ kaanbegɔ zen'an Baal bagarɛ wa kaanbegɔ deo la te a mɛ Samaria teŋa poan la. 33A me sɛ Aserah bagarɛ dɔɔ, tom tooma zo'e nyiihe Na'ayenɛ Israel Yenɛ la suunre, gaŋɛ Israel nadoma la woo n deŋɛ a nɛŋa na la. 34Ahab saŋa la poan, te Betel boraa Hiel n malom mɛ Yeriko teŋa. A ɛɛnbɛ zen'an la mɛ la a dayɔkeema Abiram vom, ta mɛ ka nayahe la la a dayɔbila Segub vom, wo Na'ayenɛ yelehom la te Nun dayɔa Yosua porɛ se'em la.

will be added

X\