1 Nadoma 14

1Saŋkaŋa mea poan te naba Yeroboam dayɔa Abiya lu ban'an. 2Yeroboam yele a pɔga yeti, Behɛ, eŋɛ ho mɛŋa te nɛra da baŋɛ te mam pɔga la n bala. La ho keŋɛ Silo teŋa. Nɔtɔgɔha Ahiya, se'em n yuum porɛ bo mam te n wan dɛna nɛreba wa naba la kɛn'ɛre la bilam. 3Tara boroboro pia, la dia, la seerom leŋka ta bo en. A wan pa'alɛ hɔ bia wa ban'an wa n wan ana se'em. 4Te Yeroboam pɔga wa eŋɛ wo n yele en se'em la, keŋɛ Ahiya yire, Silo teŋan. Bala ma'an la te Ahiya ka le nyɛta. A fɔ mɛ doohe la n korogɛ se'em la. 5Ge Na'ayenɛ pon yele Ahiya mɛ yeti, Yeroboam pɔga n ye'ehe ho zen'an na te a soke a bia ban'an yele. Ka bɛn'ɛnre mɛ, yele n wana. A han paɛ na, a wan parom enŋa a mɛŋa wo nɛra yoo la. 6Ahiya ta wom la a kiŋkima a koleŋa nɔɔrɛn, yeti, Kɛn' na Yeroboam pɔga wa. Bene te ho nigina wo la dagɛ la hom? Na'ayenɛ tom mam mɛ ho zen'an na la sunsagaŋɔ yele. 7Lebe ta yele Yeroboam yeti, Na'ayenɛ Israel Yenɛ la n yele se'em n wana. Mam bo ho zuo ho nɛreba poan, eŋɛ hɔ te ho dɛna mam nɛreba Israeldoma wa naba. 8Mam to'e sɔ'ɔlom la David yire poan bo ho. Ge la bala zan'an, ho ka ane wo mam yameŋa David n dole mam nɔɔrɛ la la a suunre zan'an, tona sɛla n de ma'an mam ninin la. 9Hom n de se'em n tom be'em gana sɛba woo n deŋɛ na ge bo ho la. Ho dekɛ la kuto maalɛ baga, nyiihe mam sunsunya, ka dekɛ mam yi' sɛla. 10Bala la, mam ma'ahom te n tare la nɔyalegerɛ na bahɛ Yeroboam yire poan. N wan ko' boraa wa woo n de da'aberɛ bii dagɛ da'aberɛ Israel teŋa wa poan. N wan uunhɛ bugum Yeroboam yire wo nɛra n uunhɛ bugum la nagombeto. 11Baahe wan obe se'em woo n de' Yeroboam nɛra ki teŋa poan, te niihe di a nɛresɛba woo n ki sɛnkan. Na'ayenɛ yele se'em n bala. 12Ge hom, ihege lebe kule. Ho na'arɛ n ta nɛɛra ho teŋa la poan la, bia la kum saŋa en bala. 13Israel zan'an wan kele bo ka, ge pin' ka. Kaŋa ma'an n de Yeroboam yire nɛra n wan nyɛ yɔɔ poan pin'an. Kaŋa ma'an n boe Yeroboam yire la poan te Na'ayenɛ Israel Yenɛ la nyɛ sɛla soŋa ka poan. 14Na'ayenɛ wan zɛnkɛ naba kayema bo a mɛŋa te ka sɔe beha Israel. Ge a wan ŋmaɛ Yeroboam buuri zan'an bahɛ. Dabaherɛ la dela zina, nananawa! 15Na'ayenɛ wan vɛngelom Israel teŋa wa wo mɔɔ te ko'om tara vɛngelena la. A wan voen Israel buuri wa teŋsoŋa wa te a dekɛ bo ba sɔyaabdoma la poan bahɛ, ge yeregɛ ba bahɛ Kolaa wa yakenɛ ha. Se'ere n sɔe la, ba nyiihe la Na'ayenɛ sunsunya la ban sɛɛre Aserah bagarɛ dɔɔrɔ la. 16A wan dekɛ Israel bo ba diŋdoma, doohe la be'em sebo te Yeroboam tom ge bahɛ te Israel ganlom ba mɛŋa la bo la zuo. 17Yeroboam pɔga nya ihege, keŋɛ na paɛ Tirza. A na'arɛ n ta nɛɛra a yire zanɔɔren la, te bia la me luta. 18Te ba pin' ka, te Israel zan'an kele ka, wo Na'ayenɛ n tɔgɔ se'em doohe a yameŋa nɔtɔgɔha Ahiya poan se'em la. 19Yeroboam toonse'a woo n gee la, en zabɛ zaba se'a la en behɛ teŋa la se'em la woo la golehɛ bɔna la gɔŋɔ seko n yi'ire Israel nadoma yɛla gɔŋɔ la poan. 20Yeroboam behɛ Israel teŋa la yuuma pihiyi' la ayi', ge kule paɛ a yaabdoma, te a dayɔa Nadab sɔe dɛna naba. 21Solomon dayɔa Arehoboam dɛna Yuda naba. A dela yuuma pihinaahe la deyena ge dɛna Yuda naba. A behɛ Yuda teŋa la yuuma pia la ayopɔe Yerusalem poan, teŋsɛka te Na'ayenɛ gaŋɛ ka Israel buuri la zan'an poan, te a Yu'urɛ pota ka poan la. A ma yu'urɛ dela Naama, dɛna Ammon buuri. 22Yudadoma tom be'em Na'ayenɛ nɛŋan, te ba be'em la te ba tona la nyie Na'ayenɛ suunre gaŋɛ ba sɔyaabdoma n daa ete se'em la. 23Bama me mɛ baga kaanbegɔ zen'enhe, sɛ kaanbegɔ kuga la Aserah bagarɛ dɔɔrɔ, zɔya la tia woo tilin. 24Te baga kaanbegɔ zen'enhe boraahe n tone yalomtooma bɔna teŋa la poan. Te nɛreba la dekɛ ba mɛhe tona toonfɛn'ɛha se'a woo te teŋhe la nɛreba tona te Na'ayenɛ dige se nɛreba Israeldoma wa ninin bahɛ la. 25Naba Arehoboam na'am dia yuuma anuu poan, te Mizraim naba Sisak wa'ana zabɛ la Yerusalem teŋa, 26vae Na'ayenɛ Yire la poan lɔgɔrɔ la naba yire lɔgɔrɔ zan'an, degehɛ zaba te'elehe se'ehe te Solomon kure la keŋɛ, te sɛla ka gee. 27Te naba Arehoboam tee maalɛ nyɔgom te'elehe, dekɛ eŋɛ kpɛ'ɛndoma sɛba n gure sɛba n gure naba yire nayaŋa la nu'uhen. 28Naba ne han yɛ'a Na'ayenɛ Yire la na, guruba la ne zanla ba la bala gu' en na, ge le ta zi ba ta biŋe guruba deo la poan. 29Naba Arehoboam toonse'a n gee la en eŋɛ sɛla woo, la golehɛ eŋɛ la Yuda teŋa nadoma yɛla gɔŋɔ poan. 30Zaba boe Arehoboam la Yeroboam teŋasoka la bala saŋa woo. 31Te Arehoboam daarɛ ta paɛ, te ba pin' en a sɔdoma yɔɔ poan David Teŋa poan. A ma yu'urɛ dela Naama, dɛna Ammon buuri la pɔka. A dayɔa Abiya n sɔe dɛna naba.

will be added

X\