1 Nadoma 13

1Yenɛ tontona n wa ze'ele Yuda wa'an Betel na la Na'ayenɛ yelehom, saŋsɛka te Yeroboam zɛ'a kaanbegɔ zen'an la te a kaanbɛ la. 2Tontona wa dekɛ Na'ayenɛ yelehom la porɛ bahɛ kaanbegɔ zen'an la zuo yeti, Kaanbegɔ zen'kana wa! Na'ayenɛ yeti, ba wan dɔgɛ bodibila naba David yire poan, te ka yu'urɛ yi'ira Yosia. Ba wan kɔrom baga kaanbereba wa n nyɔ'anre nyuŋo soŋɔ zun'uhe ho zuo wa biŋe ho zuo. Nɛreba kɔnba n wan nyɔ' ho zuo. 3De daarɛ mea te Yenɛ tontona wa pa'alɛ Yeroboam yeti, Danlehom bona te Na'ayenɛ pa'alɛ. Kaanbegɔ zen'an wa wan tanhɛ boyi' te tampegelom sebo n gan' ka zuo la ka'ahɛ na. 4Naba Yeroboam n wom Yenɛ tontona la n porɛ yelese'a bahɛ kaanbegɔ zen'an la n boe Betel teŋa la, te a zɛnkɛ a nu'o kaanbegɔ zen'an la zuo ha nɛɛhom boraa la na yeti, Nyɔkɛ ya en na! Te a nu'o seko te a tɛɛn nɛɛhom boraa la na la baanlom te a kan le ta'an yunre ko. 5Kaanbegɔ zen'an la me tanhɛ boyi', te tampegelom la n gan' ka zuo la ka'ahɛ na, doohe la Yenɛ tontona la n pa'alɛ Na'ayenɛ yelehom la se'em la. 6Naba wa yele Yenɛ tontona la yeti, Ŋmɛ' nu'po'ɔ bo Na'ayenɛ ho Yenɛ la, ge sohɛ bo mam te n nu'o wa lebehe eŋɛ som. Te Yenɛ tontona wa ŋmɛ' nu'po'ɔ a zuo, te naba wa nu'o la lebehe eŋɛ som, ana wo kon daa pon ana se'em la. 7Naba la yele Yenɛ tontona wa yeti, Doohe mam kule ta nyu' ko'om, ge te n bo ho sɛla. 8Ge Yenɛ tontona wa yele naba la yeti, Ho han pon poregɛ hom lɔgɔrɔ zenzemɔ bo mam, mam kan doohe ho keŋɛ bii n nyu' ko'om bii n di dia ka'lam. 9Na'ayenɛ yelehom yele mam mɛ te n da ta nyu' ko'om bii di dia bii n le doohe sɔrɔɔ seko te n doohe keŋɛ la lebe na. 10Bala zuo te a tee sore deyema lɛbɛra kula, ge ka le doohe en doohe sɔrɔɔ seko wa'an Betel teŋa na la. 11Nɔtɔgɔha koroga kayema n boe Betel teŋa poan, te ka dayɔɔhe yele en Yenɛ tontona la n eŋɛ sɛla woo Betel teŋa poan de daarɛ la, ge yele ba sɔ la yetɔgom sebo te boraa la tɔgɛ bo naba la. 12Ba sɔ soke ba yeti, Ka doohe la sore dene? Te ba pa'alɛ en Yenɛ tontona la n yehe Yuda teŋa na la n doohe sose'ere lɛbera la. 13Te a yele a dayɔɔhe la yeti, Bagɛ ya boŋa bo mam. Te ba bagɛ boŋa bo en ba'ahɛ, te a zom, 14nya dɔla Yenɛ tontona wa poore. Ta paɛ en te a zin' tikantɛ teŋa, soke en yeti, Hom n de Yenɛ tontona ze'ele Yuda teŋa na la? Te a yeti, Ɛɛn, mam bala. 15Nɔtɔgɔha yele en la yeti, Doohe la mam te to lebe kule te ho ta nyu' ko'om. 16Yenɛ tontona yele en yeti, N kan ta'an doohe la ho lebe bii n nyu' ko'om bii di dia ka'lam. 17Na'ayenɛ yelehom yele mam mɛ yeti, da ta nyu' ko'om bii di dia bini bii ho le doohe sɔrɔɔ seko te ho doohe keŋɛ la lebe na. 18Nɔtɔgɔha koroga wa yele en yeti, Mam me dela nɔtɔgɔha wo hom de se'em wa, te Yenɛ soŋora dekɛ Na'ayenɛ yelehom yele mam yeti, keŋɛ ta tare nɛra wa te a doohe la hɔ kule na nyu' ko'om ge di dia. Ge nɔtɔgɔha wa parom mɛ. 19Te Yenɛ tontona wa ŋmɛregɛ doohe la en lebe, ta nyu' ko'om, ge di dia a yire. 20Ban zin' dita la, te Na'ayenɛ yelehom wa'an nɔtɔgɔha koroga la n doohe ta tare Yenɛ tontona wa lebe na la zen'an na. 21Te a yele Yenɛ tontona wa n yehe Yuda teŋa na la yeti, Na'ayenɛ n yele se'em n wana. Ho kperɛ toba la Na'ayenɛ yelehom la mɛ, ge ka doohe Na'ayenɛ ho Yenɛ nɔɔrɛ la n bo ho la. 22Ho lebe mɛ na nyu' ko'om ge di dia zen'sɛka te a yele ho yeti da ta nyu' ko'om bii di dia ka poan la. Bala zuo ba kan pin' ho ho sɔdoma yɔɔ poan. 23Yenɛ tontona wa n ta di ba'ahɛ la, te nɔtɔgɔha koroga la n tare en lebe na la bagɛ boŋa bo en. 24En lɛbɛra kula, te gbegenɛ to'ohɛ en sore ko en te a iŋa la gan'an sore la zuo, te boŋa la la gbegenɛ la zɛ'a lɛm kum la. 25Nɛreba basɛba dɔla tɔla ge nyɛ kum la n gan' sore zuo, te gbegenɛ zɛ'a bini. Te ba nya wa'an teŋsɛka poan te nɔtɔgɔha koroga la bɔna la na yele. 26Nɔtɔgɔha koroga wa n doohe ta tare Yenɛ tontona wa lebe na la n wom dela, a yeti, La dela Yenɛ tontona la n kperɛ toba la Na'ayenɛ yelehom la n bala. Na'ayenɛ n dekɛ en bo gbegenɛ la, te de aanhom en, wo Na'ayenɛ yelehom la n yele en se'em la ninmɔ'ɔrɛ la. 27Nɔtɔgɔha wa nya yele a dayɔɔhe la yeti, Lo ya boŋa bo mam na. Te ba eŋɛ bala. 28A nya keŋɛ ta paɛ te kum la gan' sore zuo, te boŋa la gbegenɛ zɛ'a lɛm kum la. Gbegenɛ la ka obe kum la bii de daam boŋa la. 29Te nɔtɔgɔha wa dekɛ Yenɛ tontona wa iŋa la pagalɛ boŋa la zuo, tare lebe a teŋa la poan na te a kele en, ge pin' en. 30Te a tare en ta pin' a mɛŋa yɔɔ poan, te ba kɛla yeti, To sɔɔn, wooo, to sɔɔn! 31Ban pin' en ba'ahɛ la, a nya yele a dayɔɔhe la yeti, Mam me han ta ki, ya tare mam ta pin' yɔɔ seko te n pin' Yenɛ tontona wa ko poan la. Dekɛ mam gan'arɛ lɛm en. 32Se'ere n sɔe yelehom la te Na'ayenɛ bahɛ te a porɛ bahɛ kaanbegɔ zen'en la n boe Betel teŋa la baga kaanbegɔ zen'enhe n boe kuŋkuma zuto Samaria teŋhe poan la woo seren wa'ana tom. 33Ge yele ana wa n tom la, Yeroboam ka ŋmɛregɛ a mɛŋa yehe a be'em sɔya la poan, ge ton malom lɔɔha sɛba n dagɛ Levidoma te ba dɛna malemadoma bɔna kaanbegɔ zen'enhe la woo poan. 34Yele dena wa n de Yeroboam yire be'em, tare ba ta lobɛ ta sagom a yire la teŋparɛ wa zuo woo ta ba'ahɛ.

will be added

X\