1 Nadoma 12

1Arehoboam keŋɛ Sekem teŋa. Se'ere n sɔe la, Israeldoma la zan'an lagahɛ la bilam te ba ta bobe en na'am. 2La ta lu Nebat dayɔa Yeroboam toban Mizraim teŋa zen'an te a le'ehɛ Naba Solomon zen'en ta bɔna la te a ze'ele Mizraim teŋa la lebe na. 3Te ba tom yi' Yeroboam na te enŋa la Israel nɛreba keŋɛ Arehoboam zen'an mɛ yele en yeti, 4Ho sɔ yuun bahɛ te la wona to mɛ. Bala yolohe zeero seto te a dekɛ ziile to la te to bɔna ho nu'uhen. 5Te Arehoboam yele ba yeti, Lebe ya dabeha atan' poan na. Te nɛreba la yeregɛ. 6Te Naba Arehoboam zin'ire la keendoma sɛba n yuun tone bɔ'ɔra a sɔ Solomon n yuun nan boe la. A nya soke ba yeti, N wan kan'an nɛreba wa yeti bo? 7Te ba yele en yeti, Ho han wan dɛna nɛreba wa yameŋa, tona bɔ'ɔra ba ge lebehe yelesonɛ bo ba, ba wan dɛna ho yamehe wuuha. 8Ge Arehoboam ka to'e keendoma la kan'aŋɔ la, ge ton to'e la bonbilipaalehe la te enŋa la bama lagom zo'e na te ba tona bɔ'ɔra en la zen'an. 9A nya soke ba yeti, Yamam kan'aŋɔ dela kone? To wan lerege nɛreba wa en yele mam yeti, yolohe to zeero wa te ho sɔ dekɛ ziile to wa la wane? 10Te bonbilipaalehe wa te enŋa la bama lagom zo'e na wa yele en yeti, Yele nɛresɛba n yele ho yeti ho sɔ dekɛ la zeero ziile to, ge yolohe to zeero la bahɛ la yeti, mam nu'dibila kanregɛ gana mam sɔ sea mɛ. 11Mam sɔ bo' ya la zeero en tebegɛ, mam wan bahɛ te to tebegɛ gaŋɛ bala. Mam sɔ feebe ya mɛ la kafɛɛbehe, ge mam wan feebe ya la naŋhe. 12Te Yeroboam la nɛreba la zan'an lebe dabeha atan' daarɛ la na wo naba la n yele ba se'em yeti lebe ya dabeha atan' daarɛ na la. 13Naba wa lerege nɛreba la bora bora, zagahɛ kan'aŋɔ seko te keendoma la bo en la, 14ge dekɛ bonbilipaalehe la n bo en kan'aŋɔ seko la yeti, Mam sɔ bo ya la zeero n tebegɛ, ge mam wan bahɛ te to tebegɛ gaŋɛ bala. Mam sɔ feebe ya mɛ la kafɛɛbehe, ge mam wan feebe ya la naŋhe. 15Naba wa n ka kelehe nɛreba wa se'em n bala. Se'ere n sɔe la, yele ana wa pon ze'ele la Na'ayenɛ zen'an na, te la doohe la yelehom la te Silon teŋa nɛra Ahiya tɔgɛ bo Nebat dayɔa Yeroboam la. 16Israel nɛreba la zan'an n nyɛ te naba la ka kelehe ba la, te ba yele naba la yeti, To tɔntɛ dela dene David yire wa poan? To tare la bem Yesse dayɔa wa poan? To Israeldoma lebe ya kule. David, behera ho mɛŋa yire! Te Israeldoma wa kule. 17Ge Israeldoma sɛba n kɛn'ɛre Yuda teŋhe la poan la, Arehoboam n de bama naba. 18Te Naba Arehoboam ta tom Adoniram, se'em n sɔe tontoneba beha la, te Israeldoma la zan'an lobe en la kuga ko. Naba Arehoboam nyaŋɛ zom yiri toroko zɔ peɛn keŋɛ Yerusalem. 19Israel n ka sakɛ bo David yire wa se'em n bala wa'ana paɛ zina. 20Israeldoma zan'an n wom te Yeroboam lebe na la, te ba yi' en, ta bobe en na'am te a sɔna Israel zan'an beha. Yuda buuri la ma'an n boe David yire nu'uhen. 21Arehoboam n ta paɛ Yerusalem teŋa na la, a lagahɛ la Yuda la Benyamin yizuto la zan'an na, ganhɛ pɛɛntɛɛnreba tuha kɔbega la tuha pihinii, te ba zabɛ la Israel, la ba lebehe to'e teŋa la zan'an bo enŋa Solomon dayɔa Arehoboam. 22Ge yelehom bona ze'ele Semaiah n de Yenɛ tontona la zen'an na yeti, 23Yele Solomon dayɔa Arehoboam wa n de Yuda teŋa naba wa la Yuda la Benyamin yizuto la nɛreba la zan'an yeti, 24Na'ayenɛ n yele se'em n wana. Da keŋɛ ya ta zabɛ la ya sɔɔnrɔ Israeldoma wa. Nɛra woo kule a yire, ge mam n bahɛ te la eŋɛ bala. Te ba nam Na'ayenɛ yelehom la, te nɛra woo kule a yire wo Na'ayenɛ n yele se'em la. 25Yeroboam nya mɛ Sekem teŋa la n boe Epraim zoore teŋa la, nya kɛn'ɛra bilam. A boe la bilam ge mɛ Peniel teŋa. 26Yeroboam ta tɛn'ɛhɛ bo a mɛŋa yeti, sɔ'ɔlom wa ta'an ta lebe David yire. 27Nɛreba wa han kelom kena kaanbera Na'ayenɛ Yire Yerusalem poan, ba wan le ta dekɛ ba mɛhe bo ba daana Arehoboam n de Yuda naba la. Ba wan ko mam ge lebe naba Arehoboam zen'an. 28Te naba wa to'e kan'aŋɔ pa'ahɛ, nya maalɛ sanlema nagabibihe seyi', lagahɛ nɛreba la na yele ba yeti, La tɔe mɛ te ya kena Yerusalem. Behɛ ya, ya baga n wana, Israeldoma, baga se'a n tare ya ze'ele Mizraim teŋa yehe na la. 29A tare deyema ta ze'ele Betel teŋa, tare deyema ta ze'ele Dan teŋa. 30Yele dena wa dɛna yelebe'o, te nɛreba wa ne keŋɛ Betel la Dan teŋa zaan zaanrɛ ha ta na'ahɛ bagarɛ se'ere n boe bilam ha la. 31Yeroboam mɛ kaanbegɔ zen'enhe kuŋkuma zuto, loohe malemadoma nɛresɛba woo te a bɔta poan, ge te ba dagana Levidoma la. 32A bahɛ te ba dɛ'ɛna de'eŋɔ yuunɛ woo ŋmarehe senii dabeha pia la anuu daarɛ, wo Yudadoma de'eŋɔ la, te a nya ne kaanbera kaanbegɔ zen'an la. A ete la bala Betel teŋa, kaanbera nagabibihe la te a maalɛ la. A me loohe malemadoma biŋe kaanbegɔ zen'se'ehe woo te a maalɛ Betel poan la. 33Ŋmarehe senii dabeha pia la anuu daarɛ, enŋa mɛŋa n loe dabahese'a n bala, te a ne kaanbɛ kaanbegɔ zen'sɛka te a mɛ dɛ Betel teŋa la. Enŋa n eŋɛ de'eŋseko bo Israeldoma n bala, nya ne keŋɛ ta kaanbɛ a bo'olom.

will be added

X\