1 Nadoma 11

1Ge Naba Solomon wa nɔŋɛ la sateŋhe pɔgɔhe, naba Faro pɔyɔa la pooren. Moab la Ammon la Edom la Sidon la Hiti teŋhe pɔgɔhe pa'ahɛ mɛ. 2Teŋse'ehe te Na'ayenɛ daa yele Israeldoma la yeti, Da dite ya ba ge ba wan ba'ahom ŋmɛregɛ ya potɛn'ɛra keŋɛ ba yena la poan la. Ge la bala zan'an, Naba Solomon suunre kɛn' ba mɛ te a nɔŋɛ ba. 3A tare la pɔgɔba kɔbehe seyopɔe n de nadoma pɔyɔɔhe, ge tare pɔgɔbɔ'ɔrenhe me n de kɔbehe setan'. Te a pɔgɔba wa bahɛ te a tue. 4Solomon n ta korogɛ la, a pɔgɔba wa nyaŋɛ ŋmɛregɛ a potɛn'ɛrɛ mɛ te a dɔla baga, te a suunre la zan'an ka le dekɛ bo Na'ayenɛ a Yenɛ la, wo a sɔ David suunre n yuun ane se'em la. 5Naba Solomon dole la Astoret pɔgom bagarɛ la dɛna Sidondoma bagarɛ la Milkom bagarɛ n de Ammondoma toonfɛn'ɛrɛ la. 6Te Solomon tom be'em Na'ayenɛ nɛŋan, ka doohe Na'ayenɛ la suunre zan'an wo a sɔ David n doohe se'em la. 7Zoore n boe Yerusalem teŋa dapɔya bɔba ha, te Solomon ta mɛ kaanbegɔ zen'enhe bini bo Kemos yenɛ la n de Moabdoma toonfɛn'ɛhere la Molek yenɛ la n de Ammondoma toonfɛn'ɛherɛ la. 8A doohe mɛ kaanbegɔ zen'enhe la bala bo a sateŋhe pɔgɔba la woo ne nyɔ'anre bonganraha ge kaanbera bɔ'ɔra se baga la. 9Na'ayenɛ suunre nyie la Solomon, la en ŋmɛregɛ a suunre yehe Na'ayenɛ Israel Yenɛ zen'an n nɛɛ a mɛŋa sugumnɔɔren boyi' pa'alɛ en la. 10Na'ayenɛ n daa bo en nɔɔrɛ yele dena wa poan te a da dɔla yena a se'a la, ge Naba Solomon ka doohe Na'ayenɛ n bo en nɔɔrɛ la. 11Na'ayenɛ yele Solomon yeti, Hom eŋɛ yele dena wa ge ka doohe mam potɛn'ɛre la malema la, n wan seren to'e sɔ'ɔlom la ho nu'uhen bo ho yameŋa. 12Ge la kan eŋɛ bala ho sɔ David zuo, n kan eŋɛ wana ho saŋa wa poan, n wan ta to'e sɔ'ɔlom wa la ho dayɔa nu'uhen. 13Ge n kan to'e sɔ'ɔlom la zan'an a nu'uhen, n wan aan bo yizuo deyena sɔ'ɔlom bo ho dayɔa la, mam yameŋa David la Yerusalem teŋa wa te mam mɛŋa loe ka la zuo. 14Na'ayenɛ nya bo dima paŋa te a zabera la Solomon. A dela Edom nɛra Hadad dɛna Edom naditeba buuri poan la. 15Saŋa kayema poan ha, te naba David n daa ta zabɛ la Edomdoma wa, te Yoab n de a zaba nɛŋadaana la kɛn' teŋa la poan te a ta pin' kum la, te a daa ko boraahe la woo Edom teŋa la poan mɛ. 16Yoab wa la Israel pɛɛntɛɛnreba la daa yee Edom teŋa wa poan la ŋmarehe seyoobe, doohe ko Edom teŋa boraahe zan'an. 17Ge Hadad n nan de bia saŋkaŋa poan la, daa zɔ la Edom kpɛ'ɛndoma basɛba n de a sɔ yamehe loŋɛ Mizraim teŋa. 18Ba daa ze'ele la Midian teŋa ta paɛ Paran teŋa, loe boraahe bilam pa'ahɛ, keŋɛ Mizraim naba Faro zen'an, te Faro daa bo Hadad yire la zen'an ge bɔ'ɔra en dia. 19Faro wa suunre daa kɛn' Hadad, te a dekɛ a mɛŋa pɔga Tapenes yebega bo en te a di. 20Tapenes yebega daa dɔgɛ bodibila te ka yu'urɛ yi'ira Genubat. Te Tapenes daa to'e Genubat uge en te a ta zo'e naba yire poan. Genubat daa boe la bilam la naba Faro kɔma. 21Hadad n boe la Mizraim teŋa, a wom te David kule paɛ a yaabdoma, te zaba nɛŋadaana Yoab me ki. A nya yele Faro la yeti, Bo mam sore te n lebe n teŋa. 22Faro soke en yeti, Bene en koŋere ho ka'lam te ho bɔta te ho lebe ho teŋa? Te a yeti, Aai, la dagɛ bala, yeen bo mam sore te n lebe! 23Na'ayenɛ me maahom dima ayema me te a zabɛ la Solomon. Enŋa me dela Eliada dayɔa Arezon, se'em n le'ehɛ zɔ ge bahɛ a daana Hadadezer n de Zoba teŋa naba la. 24A kan'ahɛ la nɛreba pa'ahɛ a mɛŋa, nya dɛna tobekperegadoma nɛŋadaana, se'em ma'an te naba David keŋɛ ta sagom Zoba teŋa pɛɛntɛɛnreba la zan'an la. Te boraa wa la ka nɛreba la zɔ loŋe Damaskus teŋa ta zin'ire bilam sɔna zen'an la. 25Arezon dɛna Israel dima Solomon vom yuuma zan'an poan, ta pa'ahɛ la Hadad daaŋɔ la woo poan. Arezon n de naba Aram teŋa poan se'em bala, tona Israel toonfɛn'ɛha. 26Te Nebat dayɔa Yeroboam me ta kae Naba Solomon pooren. A dela Solomon kpɛ'ɛndoma la ayema, dɛna Epraim nɛra yehe Zereda teŋa, te a ma yu'urɛ yi'ira Zerua, dɛna pɔkɔɔnrɛ. 27Se'ere n sɔe te a kae Naba Solomon pooren la dela, Solomon daa palahɛ mɛ kae teŋa dangoone la, le'era yoko en gan' a sɔ David Teŋa dangoone la poan. 28Yeroboam dela ya'anɛ daana, te Solomon n nyɛ te boraa wa mɔ'ɛ nini tona se'em la, te a yehe en bahɛ te a dɛna kpɛ'ɛma, sɔna tontoneba la sɛba woo n de Yosef yaahe la. 29Te Yeroboam wa ta ze'ele Yerusalem poan yɛhera, te nɔtɔgɔha Ahiya n de Silon teŋa nɛra la yɛ a fupɔlɔgɔ to'ohɛ en sore zuo. Te bama bayi' la ma'an bɔna teŋa la bɔn'en ha, 30te Ahiya gin' a fupɔlɔgɔ la te a yɛ la aanhom kɔ sugumnɔɔren pia la boyi'. 31A nya yele Yeroboam yeti, To'e tana pia. Se'ere n sɔe la, Na'ayenɛ Israel Yenɛ la yeti, behɛ, n yeti n aan sɔ'ɔlom wa mɛ yehe Naba Solomon nu'uhen, dekɛ yizuto pia eŋɛ hom nu'uhen. 32Ge mam yameŋa David la Yerusalem teŋa wa te mam loe ka Israel wa woo poan la zuo, a wan sɔna yizuo deyena behera. 33Mam to'ore sɔ'ɔlom la a nu'uhen mɛ bama n zagahɛ mam ge na'aha Sidondoma pɔgom yenɛ Astoret la Moabdoma yenɛ Kemos la Ammondoma yenɛ Milkom la. Ba ka dole mam sore la, ka tona sɛla te mam bɔta ka dɔla mam malema la nɔze'elego la wo David n de Solomon sɔ la n daa dole se'em la. 34Ge n kan to'e sɔ'ɔlom la zan'an Solomon nu'uhen. Mam eŋɛ en la naba a vom dabeha poan zan'an, n yameŋa David zuo. Mam n loe David te a me dɔla mam nɔɔrɛ la mam malema la. 35N wan ta to'e sɔ'ɔlom la a dayɔa nu'uhen, dekɛ yizuto pia bo ho. 36N wan dekɛ yizuo deyena bo a dayɔa la, te mam yameŋa David tara a dayɔa te a dɛna naba saŋa woo Yerusalem teŋa wa te mam loe te n yu'urɛ bɔna ka poan wa poan. 37Ge han dɛna hom, n wan dekɛ hɔ te ho sɔna ho suunre n bote zen'sɛka woo beha. Ho wan dɛna Israel zan'an naba. 38Ho han wan nana mam bo'ore ho nɔse'ere se'ere la, dɔla mam sore la, eta sɛla n ane soŋa mam nɛŋan, dɔla mam malema la mam nɔɔrɛ la wo mam yameŋa David n eŋɛ se'em la, n wan bɔna la hɔ. N wan sɛ ho ze'ele te ho yuura wo mam sɛ David se'em la, la n wan dekɛ Israel teŋa eŋɛ ho nu'uhen. 39Ba yena kaanbegɔ wa zuo te n wan sigehe David yaahe wa, ge la kan bɔna bala wuuha. 40Te Naba Solomon zegɛ te a ko Yeroboam. Ge Yeroboam zɔ loŋe Mizraim teŋa poan naba Sisak zen'an, ta yee bɔna bilam te Naba Solomon ta ki. 41Naba Solomon yelese'a woo n gee la a tooma la a yam la yɛla zan'an golehɛ bɔna la gɔŋɔ seko n yi'ire Solomon tooma gɔŋɔ la poan. 42Solomon kɛn'ɛre la Yerusalem dɛna Israel zan'an naba yuuma pihinaahe. 43En daarɛ ta paɛ te ba pin' en a sɔ David Teŋa la poan te a kule paɛ a sɔyaabdoma, te a dayɔa Arehoboam sɔe dɛna Israel naba.

will be added

X\