1 Nadoma 1

1Naba David n ba' korogɛ mɛ te a yuuma zo'e gaŋɛ, te ba ne pile en la futebeha ge te ɔɔrɔ kelom kɛn'ɛra en. 2Te a yamehe yele en yeti, Bahɛ te to ɛ pɔgɔsa'a kanherɛ na, te de bɔna la hɔ, behera hɔ gan'an ho zen'an, te la ana hɔ wam. 3Bala te ba ɛ Israel sɔ'ɔlom la poan zan'an, ta nyɛ pugula en som, te ka yu'urɛ yi'ira Abisag, dɛna Sunem teŋa pɔka, tare na bo naba. 4Pugula wa som ka tara makerɛ, bɔna naba David nɛŋan behera en, ge naba wa ka tabelɛ baŋɛ ka. 5Te Adoniya se'em ma n de Hagit la, zɛnkɛ a mɛŋa yeti, Mam yeti n dɛna naba. A nya maahom yiri toroto la yiri la boraahe pihinuu te se bɔna a nɛŋa. 6Enŋa wa dɛna bia la, a sɔ naba David ka tabelɛ gɛnregɛ a yɛla poan bii a soke en yeti, Bene zuo te ho eta wana? Adoniya wa som mɛ, enŋa te ba dɔgɛ tagalɛ Absalom poore. 7Adoniya wa nya naɛ la Zeruiah bia Yoab la malemadaana Abiatar te ba pa' a poore. 8Ge malemadaana Zadok la Yehoiada dayɔa Benaiah la nɔtɔgɔha Natan la Simei la Arei la David pɛɛntɛɛnreba la ka sakɛ pa' Adoniya poore. 9Adoniya nya kɔrom piihe la nii la lɔlehe Zohelet kugure n lɛm En Arogel teŋa la. A nya yi' a sɔɔnrɔ la woo n de naba dayɔɔhe la naba kpɛ'ɛndoma la woo n boe Yuda teŋa la. 10Ge a ka yi' nɔtɔgɔha Natan bii Benaiah bii naba David pɛɛntɛɛnreba la bii a sɔɔn Solomon. 11Natan nya yele Solomon ma Batseba yeti, Hom ka wom te Hagit dayɔa Adoniya n de naba ge te to daana David ka mina? 12Bala, bahɛ te n pa'alɛ hɔ, te ho fan' ho mɛŋa la ho dayɔa Solomon vom bahɛ. 13Kɛn' naba zen'an nananawa ta soke en yeti, N daana naba, hom ka pɔ' bo mam ho yameŋa wa mɛ yeti, ho dayɔa Solomon n wan ta sɔe ho na'arɛ dɛna naba zin'an hom na'am gɔŋɔ wa zuo? Te la eŋɛ la wane te Adoniya sɔe dɛna naba? 14Hom ta bɔna bini tɔgɔra la naba la, n wan kɛn' na la n pa'alɛ te hom yeti se'ere la dela sɛra. 15Te Batseba keŋɛ ta kɛn' naba degan'aregɔ la poan. Saŋkana wa poan la te Sunem teŋa pugula Abisag wa n boe a nɛŋan behera en. 16Batseba wa paɛ dɔnbelɛ naba wa nɛŋan po'ohɛ en, te naba soke en yeti, Ho bote la bem? 17A yeti, N daana, hom mɛŋa n ze'ele Na'ayenɛ ho Yenɛ wa yu'urɛ poan pɔ' bo mam ho yameŋa wa yeti, mam bia Solomon n wan ta sɔe ho na'arɛ dɛna naba zin'an ho na'am gɔŋɔ wa zuo. 18Ge behɛ, Adoniya n lebege naba, te hom n daana wa pon ka mina. 19A pon keŋɛ ta kaanbɛ la nii la lɔlehe la piihe zo'e zo'e, nya yi' ho kɔma zan'an la malemadaana Abiatar la Yoab n de zaba nɛŋadaana la ge ka yi' ho dayɔa Solomon. 20N daana naba, Israel zan'an nini behere la hom te ho pa'alɛ ba se'em n wan sɔe ho na'arɛ zin'ire ho na'am gɔŋɔ wa zuo. 21Han dagɛna, hom n daana wa han ta kule paɛ ho sɔdoma daarɛ, ba wan eŋɛ mam la n bia Solomon wa wo to dela nayigehe la. 22En boe bini tɔgɔra la naba la, te nɔtɔgɔha Natan n bala kɛn' na. 23Te ba yele naba David yeti, Nɔtɔgɔha Natan n kɛn' na. Te Natan paɛ naba la nɛŋan, pɔnrɛ na'ma na'ahɛ en ba'ahɛ. 24Natan nya yeti, Naa naba, hom yeti Adoniya n wan ta sɔe hom n daana wa na'arɛ dɛna naba zin'an ho na'am gɔŋɔ wa zuo? 25Zina wa, a keŋɛ mɛ ta kaanbɛ nii la lɔlehe la la piihe zo'e zo'e, nya yi' ho dayɔɔhe la zan'an la zaba nɛŋadoma la malemadaana Abiatar. Te ba zin'an a nɛŋan ha nananawa, dita ge nyuura, ge na'aha en te, naa naba, Adoniya, hom sɔe zan'an. 26Ge a ka yi' mam ho yameŋa wa bii malemadaana Zadok bii Yehoiada dayɔa Benaiah bii ho dayɔa Solomon. 27Hom n daana naba wa n bahɛ te yele dena wa eŋɛ ge te ho me ka tabelɛ pa'alɛ ho yamehe wa se'em n wan ta sɔe ho zin'ire ho na'am gɔŋɔ wa zuo. 28Te Naba David yeti, Yi' ya Batseba bo mam na. Te ba yi' en na te a paɛ na ze'ele naba nɛŋan. 29Te naba nya yeti, Mam pɔ' la Na'ayenɛ wa n boe wuuha wa, fan' mam n daaŋɔ woo poan bahɛ wa yeti, 30mam daa seren ze'ele Na'ayenɛ Israel Yenɛ wa nɛŋan pɔ' bo ho yeti ho bia Solomon wan ta sɔe mam na'arɛ dɛna naba zin'an mam na'am gɔŋɔ wa zuo la. N wan eŋɛ dɛ zina wa. 31Te Batseba dɔnbelɛ teŋa na'ahɛ naba David ge yeti, La eŋɛ te n daana Naba David vɔna wuuha. 32Naba David yeti, Yi' ya malemadaana Zadok la nɔtɔgɔha Natan la la Yehoiada dayɔa Benaiah bo mam na. Te ba yi' ba, te ba paɛ a nɛŋan na. 33A yele ba yeti, Vaɛ ya mam ya daana yamehe wa, bahɛ te n dayɔa Solomon yagelɛ mam mɛŋa yehoboŋa la zuo, te ya tare en sige Gihon kolega. 34Te malemadaana Zadok la nɔtɔgɔha Natan ta sɔ' en la kaam bilam te a dɛna Israel teŋa wa naba. Ta peebe ya tentanɛ la ge sakɛ yeti, Naba Solomon, sɔna zan'an! 35Nya doohe la en na paɛ, te a kɛn' zin'ire mam na'am gɔŋɔ la zuo, la a sɔe mam na'arɛ dɛna naba. Mam n loe en te a dɛna Israel la Yuda teŋhe zan'an naba. 36Yehoiada dayɔa Benaiah lerege naba yeti, Taarɛ! Na'ayenɛ mam daana naba Yenɛ la bahɛ te la dɛna bala. 37Wo Na'ayenɛ n daa boe la mam daana naba se'em wa la, a wan bɔna la Solomon bala, ge bahɛ te Solomon na'am la yalegɛ pa'ahɛ gana mam daana Naba David! 38Bala te malemadaana Zadok la nɔtɔgɔha Natan la Yehoiada dayɔa Benaiah la Keret doma la Pelet doma la ihege, te Solomon ban' Naba David yehoboŋa, te ba dɔla a poore yɛ'a Gihon kolega. 39Malemadaana Zadok ta dekɛ iilɛ la kaam Sogorɛ la poan sɔ' Solomon la kaam. Te ba peebe tentanɛ, te nɛreba la zan'an voole yeti, Naba Solomon, n sɔe zan'an! 40Te nɛreba la zan'an nya bilige dɔla Solomon poore lɛbera, ge pɛɛbera taletehe, ge nyeena, te voole la bahɛ te teŋa la miim zigi zigi. 41Adoniya la a nɛreba la n boe a de'eŋɔ la poan la, wom bala. Yoab n wom tentana la peebego la, a soke yeti, Bene te teŋa wa taɛ vɔɔla bala? 42En boe bini tɔgɔra la, te malemadaana Abiatar dayɔa Yonatan paara na. Te Adoniya yele en yeti, Kɛn' na. Ho dela toolom nɛra, ho tare la yelesoma kena na. 43Yonatan lerege en yeti, Aai, la dagɛ yelesonɛ! To daana Naba David dekɛ la Solomon lebege naba. 44Naba dekɛ la malemadaana Zadok la nɔtɔgɔha Natan la Yehoiada dayɔa Benaiah la Keretdoma la Peletdoma la, te ba bahɛ te Solomon ban' naba mɛŋa yehoboŋa la. 45Ba keŋɛ Gihon kolega, te Zadok la Natan ta sɔ' en la kaam bilam te a dɛna naba. Ba yehe la bilam yoona la popeelom, te teŋa la zan'an taɛ la voole la. Voole dena en bala te ya wom la. 46Sɛla n pa'ahɛ dela, Solomon pon zin'an la na'am gɔŋɔ la zuo. 47Te naba la kpɛ'ɛndoma la wa'an po'ohɛ to daana Naba David, yeti, Ho Yenɛ la bahɛ te Solomon yu'urɛ gana hom yu'urɛ, te a na'am wa yalegɛ gana hom na'am la! Te naba pɔnrɛ na'ma a gɔrɔgɔ zuo, 48ge yeti, Pɛnka dela Na'ayenɛ Israel Yenɛ la n bahɛ te mam nyɛ se'em wan sɔe mam na'arɛ zin'ire na'am gɔŋɔ wa zuo zina wa la denɛ. 49Adoniya nɛreba la zan'an nɔya yalegɛ, te ba ihege yerom digi digi. 50Te dabeem kɛn' Adoniya, Solomon zuo, te a zɔ kɛn' Sogore la poan ta gin' kaanbegɔ daka la iila la tara. 51Te ba yele Naba Solomon yeti, Dabeem n kɛn' Adoniya ho zuo, te a kɛŋɛ ta gin' daka la iila la tara, ge yeti, Naba Solomon pɔ' te a kan kɔrɔgɛ mam a yameŋa wa. 52Solomon yeti, A han wan dɛna nɛresoŋɔ, a zuo zoŋko koyena me kan lu teŋa. Ge be'em han bɔna a poan, a ba'ahom kiira mɛ. 53Naba Solomon bahɛ te nɛreba keŋɛ ta tare en kaanbegɔ daka la zen'an wa'ana, te a paɛ na pɔnrɛ na'ma Naba Solomon nɛŋan, te Solomon yele en yeti, Kula ho yire.

will be added

X\