1 Korẽntɩ 8

1Tɔ. Nananawa yan wan eŋɛ disɛka te ba dekɛ kaanbɛ baga se'em n wana. To mi' te la de sera te nɛra woo tare mi'ilom mɛ wo nɛreba n yele se'em la. Mi'ilom bona wa bahere te nɛra n zɛnkera ba mea saazuo. Ge, nɔŋerɛ dela sɛla n tare soŋorɛ kena na. 2Te nɛra se'em n tɛn'ɛhe te enŋa mi' mɛ dela se'em n seren ka mi' sɛla te a sona te a mina. 3Ge, nɛra se'em n nɔŋɛ Na'ayenɛ, enŋa daana te Na'ayenɛ me mina. 4Dene poan, to wan eŋɛ se'em yɛhera disɛka te ba dekɛ kaanbɛ baga dela dena wa. To mi' te Na'ayenɛ deyena ma'an n boe. 5Ge nɛreba basɛba han ta behere la sɛba te ba yi'ire yena. Yelemɛŋɛrɛ, yena wa la sɛba te ba behera te bama n de ba doma bo mɛ kekeko. Bala, bana wa han pon bɔna la saazuo ha, bii teŋa wa zuo, 6to mi' te to tare la Na'ayenɛ deyena ma'an se'em n de to Sɔ'. Enŋa n de se'em n naam sɛla woo, gee te enŋa mea zuo te to vɔna wa. To le mina te Yesu Krista n de to Daana ma'an te to tara. La daa dela enŋa poan te Na'ayenɛ daa naam sɛla woo. La me le kelom de'a la enŋa poan te to vɔna wa. 7Ge dagɛ nɛra woo n mi' sɛla te yamam mina wa yɛhera baga yɛla. Ge nɛreba basɛba ba' dɔla baga wa mɛ zo'e zo'e. Bala, nɛrebana la n dole Yesu sore wa han di' disɛka te ba dekɛ kaanbɛ baga, ba kelom tɛn'ɛha mɛ te dia la dela baga dia. Dena wa daane la ba potɛn'ya. Te la de'a la bala n ne bahɛ ba te ba han di' baga dia ba tɛn'ɛha te ba ganlom la ba mɛhe. 8Dia kan ta'an bahɛ tɔ te to lɛm Na'ayenɛ. To han ka di' baga dia, dagɛ la to wan koŋe la sɛla. To me han di' dagɛ sɛla te to wan nyɛ' pa'ahɛ. 9Tare ya ya mɛhe soŋa soŋa yɛhera yan ta'an eŋɛ sɛla woo te ya bɔta la. Han dagana bala, ya bɔŋa la poan wan bahɛ te sɛba n nan ka sɛ' ze'ele soŋa soŋa ba sakerɛ Yesu sore dɔlɔga la poan tom be'em. 10Nɛra se'em te dena wa daana a potɛn'ɛrɛ han nyɛ' hon se'em n tare mi'ilom bona wa te ho bɔna deseko te baga bɔna la dita dia, la wan bahɛ en te a keŋɛ ta di' disɛka te ba dekɛ kaanbɛ baga. 11Bala, ho mi'ilom wan bahɛ te ho sɔɔn se'em n ka sɛ' ze'ele soŋa soŋa te Krista lagom ki' bo en wa nyɛ' sagaŋɔ. 12Dene poan, ho wan nyɛ' to ho tone la be'em bɔ'ɔra Krista yɛhera hon tone be'em bɔ'ɔra ho sɔɔnrɔ, gee me bahera te dena wa daana ba potɛn'ya la. 13Dene poan, mam han mina te dia kayema bo ha te n han yete n di' la wan bahɛ te n sɔɔn tom be'em, mam ye kan di' ka. Bala, te n kan ta'an bahɛ te n sɔɔn tom be'em.

will be added

X\