1 Korẽntɩ 7

1Nananawa, yelese'a te ya golehɛ bo mam na la yele n wana. Mam potɛn'ɛrɛ poan, la wan ana soŋa te boraa da di pɔga. 2Ge yalomtooma la n zo'e la zuo, la wan ana soŋa te boraa woo di a pɔga, ge te pɔka woo me ele a sera. 3Ge boraa la dela a naara la pɔga la, te pɔka la mɛ naara la a sera la. 4Pɔka la iŋa nya dela a sera denɛ, te sera iŋa mɛ dɛna pɔka la denɛ. 5Bala, da zagahɛ ya lagona taaba, han dagana ya bayi' lagom sakɛ mɛ te ya loe dabeha bo Yenɛ sohoga. Ge da yuue ya ge le lagom taaba, te Dima da ta'an pan'ahɛ ya yan kan ta'an tara ya mɛŋa soŋa la zuo. 6Mam yele ya se'em wa dagɛ la nɔɔrɛ te mam bo ya te ya dɔla, ge la yenzuo dɛna la sɛla te mam tɛn'ɛhɛ te de wan ana soŋa. 7Mam bote ne te nɛra woo boe ne a ma'an wo mam n boe se'em wa. Ge Na'ayenɛ bo nɛra woo la a bo'olom. Ayema bo'olom dela wana, te ayema me bo'olom dɛna wana. 8Mam potɛn'ɛrɛ poan, sɛba n ka tare pɔgɔba la sɛba n ka tare sereba la pɔkɔnpa, la wan ana soŋa bo ya ya han kelom bɔna ya ma'an wo mam boe se'em wa. 9Ge ya han baŋɛ te ya kan ta'an bɔna ya ma'an bala, yan bote yalomtooma la zuo, ta di ya ya pɔgɔba, ge ele ya sereba. Te yan di pɔgɔba, ge ele sereba nyane yan bote yalomtooma. 10Ge n tare la nɔɔrɛ te n bo sɛba n tare pɔgɔba la sɛba n tare sereba. Nɔdena wa ka ze'ele la mam zen'an na, ge de ze'ele la Na'ayenɛ zen'en na. Nɔɔrɛ la dela pɔka n tare sera ka nare a yehe a zen'en. 11A han ye yehe, la dela a bɔna a ma'an bii, a lebe te enŋa la a sera le ta naɛ taaba. Boraa n tara pɔga ka nare te a lebehe ka. 12Ge sɛla te n yeti n yele kalam wa dela mam mɛŋa potɛn'ɛrɛ, ge dagɛ la Na'ayenɛ nɔɔrɛ. N yeti bɔ'ɔra la ya sɛba n gee la. Dagɛ la to Daana Na'ayenɛ, se'em n dole Yesu sore han tara a pɔga se'em n ka dole Yesu sore, ge te a pɔga la sakɛ te a wan bɔna la en, la ka nare te a lebehe ka. 13Ge te pɔgɔsɛka n dole Yesu sore me han tara a sera se'em n ka dole Yesu sore, ge te a sera la sakɛ te a wan bɔna la en, la ka nare te a yehe a zen'en. 14Se'ere n sɔe la, boraa la n ka dole Yesu sore la han dekɛ a mɛŋa naɛ la a pɔga la, Na'ayenɛ to'ore boraa la mɛ. Pɔka wa me n ka dole Yesu sore la han dekɛ a mɛŋa naɛ la a sera la, Na'ayenɛ to'ore pɔka la mɛ. La han eŋɛ bala, Na'ayenɛ to'ore ba kɔma la mɛ. Ge la han dagɛ ne bala, ba kɔma wan dene la sɛba n ka zote Na'ayenɛ. 15Pɔka bii boraa sɛka n ka dole Yesu sore la han bɔta te a yehe a ta'an yehe la han eŋɛ wana se'em n dole Yesu sore la ka boe bobore poan. Na'ayenɛ yi to te to bɔna mɛ la sunma'ahom. 16Ge hon pɔga wa n dole Yesu wa wan eŋɛ la wane baŋɛ soŋa soŋa te ho kan ta'an soŋɛ ho sera te a dɔla Yesu sore? Ge hon me sera wa n dole Yesu sore wa wan eŋɛ la wane baŋɛ soŋa soŋa te ho kan ta'an soŋɛ ho pɔga te a dɔla Yesu sore la? 17Nɛra woo dela a bɔna wo Na'ayenɛ n yi en na, ge ze'ele en se'em la. Yele dena te mam pa'ala lagaŋseto woo n dole Yesu sore la te ba eta. 18Se'em han ŋma mɛ ge te Na'ayenɛ nya baŋɛ yi' en, a da zegera te a saalom ŋmaa danlehom la bahɛ. Se'em me han ka ŋma ge te Na'ayenɛ baŋɛ yi' en, a da zegera te a ŋma. 19Se'ere n sɔe la, ho ŋma ya wooo ho ka ŋma' wooo dagɛ ninmɔ'ɔrɛ. Sɛla n de ninmɔ'ɔrɛ dela ho nana Na'ayenɛ nɔɔrɛ. 20Yele ana wa poan nɛra woo ana wo n daa pon ana se'em, ge te Na'ayenɛ yi' en la. 21Ho daa han dɛna la yameŋa, ge te Na'ayenɛ nya baŋɛ yi' ho, da bahɛ te la daana hɔ la hon de yameŋa la zuo. Ge ho han baŋɛ te ho wan ta'an nyɛ' sore kan le dɛna yameŋa, eŋɛ bala. 22Yameŋa sɛka te Yesu yi boe la fai. Bala me te se'em n dagɛ yameŋa ge te Yesu yi en dɛna Yesu yameŋa. 23Na'ayenɛ da'a ya mɛ la toolom lɔkɔ. Bala da le dene ya nɛreba yamehe. 24Yele ana wa woo poan, n sɔɔnrɔ wa, nɛra woo tara lagaŋɔ la Na'ayenɛ la yelese'ere woo poan. 25Yɛhera yamam n golehɛ sɔkera sɛba n ka tare pɔgɔba la sɛba n ka tare sereba la yele la, mam n yeti n yele se'em wa dagɛ la n tɔe dɛ la Na'ayenɛ zen'an ge la dela mam mɛŋa potɛn'ɛrɛ. N me mi te Na'ayenɛ etesoŋɔ la zuo mam dela se'em te nɛreba nam. 26Ge mam potɛn'ɛrɛ poan daanseto te to nyɛta nananawa zuo, la ane soŋa te boraa la bɔna bala. 27Ge ho han diŋɛ tara pɔga, da zegera te ho lebehe ka. Ho me han ka tara pɔga, da ɛɛra te ho di pɔga. 28Ge, ho han di pɔga, la dagɛ la be'em. Pɔgɔsɛka me n ka ele han ele, la dagɛ la be'em. Ge mam wan bɔta te n fan' ya daaŋseko n boe se'ere ele la pɔgɔdire poan bahɛ. 29Ge n sɔɔnrɔ, mam yeti sɛla la vɔnrɛ dela, dabeha la ka le gee zo'e bo to. Bala, sɛba n tare sereba la pɔgɔba bɔna wo ba ka tare mɛ la. 30Sɛba n kele ana wo ba sunya n ka sagom la, ge te sɛba n la'are ana wo ba poorɛ n ka pee la. Sɛba n da'are lɔgɔrɔ me ana wo dagɛ bama n sɔe lɔgɔrɔ la. 31Se'em woo n tare se'ere teŋa wa zuo, da bahɛ te denɛ ba' mɔ'ɛ a nini. Se'ere n sɔe la, teŋa wa te to nyɛ' ka se'em wa wan tole. 32Mam bote n yehe ya la daaŋɔ yɛla poan. Se'em n ka tare pɔga kɔ'ɔn tɛn'ɛha la Na'ayenɛ tooma ma'an, ge zegera te a eŋɛ la Na'ayenɛ suunre nyɛlom. 33Ge se'em n tare pɔga kɔ'ɔn tɛn'ɛha la teŋa wa zuo yɛla. Se'ere n sɔe la, a zegere te a eŋɛ la a pɔga la suunre nyɛlom. 34Bala me la, a wan tara potɛn'ɛra ayi' ayi'. Pɔgɔsɛka me n ka tare sera kɔ'ɔn tɛn'ɛha la Na'ayenɛ tooma ma'an. Se'ere n sɔe la, a bote a dekɛ la a mɛŋa la a tɛn'ɛhegɔ zan'an bo Na'ayenɛ ma'an. Ge pɔgɔsɛka n tare sera kɔ'ɔn tɛn'ɛha la teŋa wa zuo yɛla. Se'ere n sɔe la, a zegere te a eŋɛ la a sera suunre nyɛlom. 35Ge mam yete dena wa bala te n soŋɛ ya mɛ zuo. La dagɛ la mam yete ya mɛ te ya da eta sɛla te ya bɔta. Mam n ton bɔta se'em dela ya eta sɛla n de ma'an ge ana soŋa. Ya me kɔ'ɔn dekɛ ya mɛhe tona Na'ayenɛ tooma la ge da tara potɛn'ɛra ayi' ayi'. 36Se'em han bɔta pɔgɔla te a di te la yuura te boraa la ta behɛ te a koŋkoma'ahom n zoore la pɔgɔla la, a di ka. A han eŋɛ bala la dagɛ be'em. 37Ge a mɛ han le lo' la a potɛn'ɛrɛ te a kan di pɔga, ge te la dagana la se'em pɛnrege en a ka tom be'em a han ka di pɔga. 38Bala, se'em n di la eŋɛ soŋa ge se'em n ka di la n gane. 39Ge pɔgɔsɛka n tare sera lagom mɛ la a sera wo a sera la n nan vɔe la. Ge a sera la han ki, sore nya boe bo en te a ele boraa sɛka te a bɔta. Ge boraa sɛka te a wan ele la dɛna se'em n dole Yesu sore. 40Ge a han ka le ele ge bɔna bala, a wan tara popeelom gana n le ele la. Mam yele se'em wa dela mam mɛŋa tɛn'ɛhegɔ ge me mini ya te mam me lagom tara Yenɛ Sea la mɛ.

will be added

X\