1 Korẽntɩ 6

1Ya se'em han tara yele la a sɔɔn a wan sakɛ tara en keŋɛ sɛba n ka zote Na'ayenɛ la nɛŋan? N wan ton eŋɛ se'em dela a bahɛ te Na'ayenɛ nɛreba maalɛ dɛ. 2Yamam n wan ta gankɛ nɛreba teŋa wa zuo la, ya ta'an gankɛ yele pegehe wa. 3Ya ka mi' te tomam n ta yeti to gankɛ Na'ayenɛ soŋoreba la? Te dena wa han dɛna bala, to wan eŋɛ la wane kan ta'an gankɛ yele ana wa to bɔŋa poan. 4Bala, to han ne ta nyɛ' yele ana wa taaba, la de ma'an te to bahɛ te sɛba n ka dole Yesu sore la maalɛ a? 5Dena wa dela vi' bo ya. Ge yelemɛŋɛrɛ, nɛra ayema wan ba'ahom bɔna ya lagaŋɔ la poan dɛna se'em n tare yam wan ta'an maalɛ yetɔgom la ya teŋasoka. 6Ge yan ton eta se'em dela sɔɔnrɔ toyi' han nyɛ' yetɔgom sɔɔn ayema wan ihege tare ayema la keŋɛ zen'an te ba gankera yetɔgom ta bahɛ te sɛba n ka dole Yesu sore maalɛ dɛ. 7Lan de sera te ya tare taaba kena gankere zen'enhen la pa'alɛ te ya pon koŋɛ mɛ. La ka ane soŋa te ba ton tue yamam? La ka ane soŋa te ba ton fan' la yamam? 8Ge ya ka ete dena, ge ya ton tuluge tuura, ge faanra taaba, ge la ya sɔɔnrɔ. 9Ya mɛhe mi' soŋa soŋa te toonfɛn'ɛhadoma kan ta'an bɔna Na'ayenɛ sɔ'ɔlom la poan. Da pan'ahɛ ya ya mɛhe. Sɛba n de yalomdoma, baga kaanbereba, kabonhe, boraahe n gan' taaba bii pɔgɔhe n gan' taaba, 10bii faanreba, nyigereba, daambugureba, sɛba n sagone nɛreba yu'ura, bii nayigehe, kan ta'an bɔna Na'ayenɛ sɔ'ɔlom la poan. 11Ya sɛba daa ana wo nɛrebana taaba wa. Ge Na'ayenɛ duuhe ya yelebe'ero bahɛ mɛ. Ya dela sɛba n boe bo Na'ayenɛ ma'an. Ya me le kelom dɛna la tontɔɔdoma Na'ayenɛ nɛŋan yɛhera la to Daana Yesu Krista la Yenɛ Sea la paŋa poan. 12Ge se'em wan yeti, N tare sore te n eta sɛla woo te n bɔta. Yelemɛŋɛrɛ, la dela bala, ge dagɛ sɛla woo n ane soŋa bo en. Mam mɛŋa ta'an yeti, N tare sore te n eta sɛla woo te n bɔta. La dela bala, ge mam kan dekɛ n mɛŋa eŋɛ yameŋa bo yelese'ere. 13Nɛra ayema wan yeti, Dia zuo te poorɛ bɔna, ge te, Poorɛ me zuo te dia bɔna. Bala dela sera, ge Na'ayenɛ ta'an sagom ba zan'an. La dagɛ nɛra tara a iŋa wa tona yalomtooma, ge la dela a tara ka tona bɔ'ɔra to Na'ayenɛ. Na'ayenɛ n behere iŋa la. 14Na'ayenɛ n vo'e to Daana la a paŋa la, a me wan ta vo'e tomam mɛ la a paŋa la. 15Ya mɛhe mi' te ya iinhe dela Krista iŋa la lɔga a se'a. Bala, to dekɛ Krista iŋa lɔgɔrɛ deyema tona yalomtooma? Aai. 16Mina ya te boraa sɛka n lagom ka mɛŋa la yaloma me dela yaloma. Se'ere n sɔe la, la golehɛ te, Te bayi' la lebege boyenɛ. 17Ge se'em n dekɛ a mɛŋa lagom la to Daana Yesu wan dɛna boyena la en Yenɛ Sea la poan. 18Dene poan, zɔ ya yalomtooma poan. Te nɛra han tom be'em sebo woo ha, bo ka tare daaŋɔ bo iŋa la. Ge se'em n tom yalomtooma tom la be'em bo iŋa la. 19Ya ka mi' te ya iinhe la dela Yenɛ Sea la n boe la ya la Yire. Na'ayenɛ n dekɛ en bo ya. Bala, ya ka sɔe ya mɛhe. 20Na'ayenɛ da' ya mɛ la toolom lɔkɔ. Bala tare ya ya iinhe la na'aha Na'ayenɛ.

will be added

X\