1 Korẽntɩ 5

1Nɛreba yele ya te ya tone la yalomtooma te a yalege nɔɔrɛ ya lagaŋɔ la poan. Yelese'a taaba te sɛba n ka zote Na'ayenɛ pon kan tom. N wom te boraa ayema boe ya lagaŋɔ la poan gan' la a mabila. 2Te dena han dɛna bala, la wan eŋɛ la wane te yamam zɛnkera ya mɛhe saazuo? Yan wan ton eŋɛ se'em dela ya tara sunsagaŋɔ, ge dige en ya lagaŋɔ la poan. 3Ge mam pon zaan la ya wa, n boe mɛ la ya Sea la poan ge pon te'ele yele en te a tue ya. 4Ge yan lagom taaba la, mam me kɔ'ɔn tɛnra ya yele mɛ ya lagaŋɔ la poan. Bala, to Daana Yesu Krista paŋa la n boe la to la, 5la dela ya dekɛ en bo Dima la te a sagom a iŋa. Te a sea la ta nyɛ faanrɛ daanse'ere daarɛ te to Daana Yesu lɛbɛra na la. 6Ge la dagɛ ma'an te ya zɛnkera ya mea saazuo. Ya mi' makerɛ wa n de se'em la. De dela, mi'ihom fiin wa ihegere zom mɛ. 7Foe ya mi'ihom kɛka be'em la ya poan, la ya dɛna fa'a. Bala te ya wan ana wo zom paalemom te mi'ihom ka bɔna bo poan, wo mam mi te la seren de se'em la. Se'ere n sɔe la, Azootole De'eŋɔ la paɛ ya. Ba kaanbɛ Krista n de to Azootole pebila la. 8Bala, bahɛ ya te to de'eŋ de'eŋɔ wa, dagɛ la to tare mi'ihom n de be'em la toonfɛn'ɛha la, ge to de'eŋ ko la boroboro n ka tare mi'ihom. Boroboro sɛka n de fa'a la yelemɛŋɛrɛ. 9N yele ya gɔŋseko te n golehɛ bo ya na la poan, te ya da dekɛ ya mɛhe lagom sɛba n tone yalomtooma la. 10Dena wa poan wa, n ka yete la sɛba n ka dole Yesu sore, ge tona yalomtooma, bii ba nyigere me, bii ba zuunre mɛ, bii baga kaanbereba. La han dɛna la bama te n yeti ya da dekɛ ya mea lagom bɔna la ba, la ye kɔ'ɔn dɛna la ya da bɔna teŋa wa zuo. 11Ge mam yeti sɛla la vɔnrɛ dela ya da dekɛ ya mea lagom la se'em n yeti enŋa dole la Yesu sore la ge tona yalomtooma, bii de'a se'em n nyigere bii kaanbera baga, bii sagom na nɛreba yu'ura, bii de'a daanyuura, bii dɛna nayiga. Da pon tara se'ere eta la nɛra ena daana. 12Ge la han dɛna nɛresɛba n ka dole Yesu sore la, la dagɛ mam toonɛ te n gankɛ ba. Na'ayenɛ n wan gankɛ ba. Tomam dela to gankɛ sɛba n boe to poan la. 13Ge Na'ayenɛ wan gankɛ sɛba n boe yeŋa la. Wo lan golehɛ se'em la, Foe ya be'em la ya poan la.

will be added

X\