1 Korẽntɩ 4

1Dekɛ ya tɔ wo Krista yamehe sɛba te ba dekɛ yelese'a n tɔgɔre yɛhera Na'ayenɛ Yelesoma la eŋɛ to nu'uhen la. 2Ge se'em te ba dekɛ tooma eŋɛ a nu'uhen, la dela a eŋɛ sɛla n wan bahɛ te se'em n bo en tooma la yete a de yelemɛŋɛrɛdaana. 3Ge nananawa, la ka ba' daana mam yɛhera la yamam han gankere mam, bii ban gankere nɛra teŋa wa zuo se'em. Ge mam mea ka gankɛ n mea. 4Mam mi' soŋa soŋa te sɛla ka daane n potɛn'ɛrɛ. Bala ka pa'alɛ mɛ te n ka tare tuure. La dela to Daana Na'ayenɛ n gankere mam. 5Bala, ya se'em da gankɛ se'em, ge te gankerɛ daarɛ la nan ka paɛ. To Daana lebega daarɛ na la n yeti de ba'ahɛ gankerɛ woo. A han lebe na, a wan nɛɛ yelese'a n sogɛ. Bilam poan, te Na'ayenɛ wan pɛngɛ nɛra woo lan de a pɛngɛ en se'em. 6Dene poan wa, n sɔɔnrɔ yamam zuo te mam tɔgɛ bo ya yɛhera mam la Apolos yele. Mam dekɛ la tomam te ya behɛ zamehɛ yam yɛhera makerɛ wa vɔnrɛ. De dela, Da eŋɛ ya sɛla gaŋɛ sɛla te ba golehɛ yɛta ya te ya eŋɛ la. Ya se'em da dekɛ nɛra ayema ŋmɛ'ɛra a nyɔn'ɔn, ge beha ayema yoo. 7Ane n bahɛ ya te yamam gana nɛreba basɛba? La dagɛ la Na'ayenɛ n bo ya sɛla woo te ya tara wa? Te la han dɛna bala la wan eŋɛ la wane te ya ŋmɛ'ɛra ya nyɔn'ɔn wo sɛla te ya tara la dagɛ la bo'olom te Na'ayenɛ bo ya? 8Ya pon tara sɛla woo te ya bɔta mɛ? Yamam pon dɛna la bontateba? Yamam pon dɛna la nadoma, ge tomam dagana wa? Mam bote ne te ya seren dene nadoma, te to lagom dene nadoma la ya. 9Mam behere te la nya ane wo Na'ayenɛ bahɛ te tomam Yesu tontoneba wa ba' yee la pooren la, to ane wo nɛreba n tue te ba tara to yɛ'a ko'a te soŋoreba la nɛreba woo behera to la. 10Te Krista zuo, te to mam dɛna gɔɔnɔ. Ge yamam ton dɛna la yamdoma ya bɔŋa Yesu sore dɔlɔga poan. To mam dela sɛba n pɔ'ɛ tɔrɔgɔ, ge yamam ton dɛna la sɛba n ka pɔ'ɛ tɔrɔgɔ. Nɛreba behere tomam la yoo, ge yamam ba bo'ore ya na'ahegɔ mɛ. 11Zina beere wa, kom la ko'nyuuro tare tɔ mɛ. Tomam yɛ' la lɔgɔ'anhoma. Nɛreba ŋmɛ' tomam mɛ, ge te to me kɔ'ɔn ɛɛra mɛ ka tara gan'aregɔ zen'an. 12To tone mɛ, te to ta'an behɛ to mɛhe. Se'em han ne kan' kan' be'em bo to, tomam ne kan' la kan'somɔ bo en. Se'em me han ne namehegɔ tɔ, to ne din'inhe suunre de poan. 13Se'em me han ne to' tɔ, to ne lebehe en la sɛla n ane soŋa. Nɛreba teŋa wa zuo dekɛ tomam te to ana wo sɔgɔrɔ la. Ge la zina beere wa, tomam ka tare vɔnrɛ nɛreba zen'en. 14Ge dagɛ la n bote vi' n nyɔkɛ ya zuo te n golehɛ dena wa bo ya wa. Ge n eŋɛ bala te n kan'an ya mɛ wo n kɔma te n nɔŋɛ la. 15Te ya han pon tara nɛreba tuhure te ba behera ya ya bɔŋa Yesu sore dɔlɔga la poan, mam ma'an n de ya sɔ. Se'ere n sɔe la, mam n wa'ana mɔɔlɛ yelesoma la bo ya. 16Dene poan, n bene ya mɛ te ya tɔgɔha mam. 17Te dena wa zuo, te n tona Timoti n de dayɔba'arɛ Yesu sore dɔlɔga la poan. A wan tɛɛn ya yelese'a te mam dɔla n vom paalega wa te n bɔna la Yesu Krista ge pa'ala a lagaŋɔ woo poan zen'an woo la. 18Ge ya sɛba zɛnkere la ya mea saazuo tɛn'ɛha te n ka le wa'ana behɛ ya. 19Ge to Daana Na'ayenɛ han bo mam sore la n kan yuue, ge n wan wa'ana behɛ ya. N han wa'an bala na, n mea wan nyɛ sɛla la sɛla, te sɛba n zɛnkere ba mea bala, la wan ta'an eŋɛ, ge la dagɛ la sɛla te ba wan ta'an tɔgɛ ma'an. 20Se'ere n sɔe la, Na'ayenɛ sɔ'ɔlom la poan dagɛ la yetɔgom ma'an, ge paŋa. 21Ya bote la dene? N wa'an na la kpa'aherɛ bii n wa'an na la suunre se'ere n tare nɔŋerɛ la na'ahegɔ bɔ'ɔra nɛra?

will be added

X\