1 Korẽntɩ 3

1Ge yelemɛŋɛrɛ n sɔɔnrɔ, n daa ka ta'an tɔgɛ bo ya wo sɛba n tare Yenɛ Sea la. Ge n daa tɔgɛ bo ya wo sɛba n ka tare Sea la. Ya kelom dɛna la kɔmbibihe. 2N daa bo ya la bin'ihom ge dagɛ dikpe'ene. Se'ere n sɔe la, ya ka maahom. La nananawa me, ya kelom ka maahom bɔta dɛ. 3Se'ere n sɔe la, ya kelom bɔna me wo sɛba n ka tare Yenɛ Sea la. Ya han nyuuna la taaba, ge gangara la taaba, la wan pa'alɛ te ya bo mɛ wo sɛba n ka tare Sea la. 4Yamam ayema han yeti, Mam dole la Paul, te ayema me yeti, Mam dole la Apolos. Yan ete bala la, pa'alɛ mɛ soŋa soŋa te ya ete mɛ wo sɛba n ka tare Sea la n ete se'em la. 5Mam Paul dela ane? Ge te Apolos me dɛna ane? Tomam dagɛ sɛsɛla. Tomam yenzuo dɛna Na'ayenɛ yamehe sɛba n daa tɔgɛ bo ya te ya sakɛ bo Yesu. Te tomam ayema woo ete la toonse'ere te to Daana Na'ayenɛ bo to te to tom la. 6De me ane me wo mam n borɛ, te Apolos bahɛ ko'om. Ge Na'ayenɛ n bahɛ te la yɛhera na. 7Se'em n borɛ la, la se'em n bahere ko'om la dagɛ sɛsɛla. Sɛla n de ninmɔ'ɔrɛ dela Na'ayenɛ. Se'ere n sɔe la enŋa n bahɛ te la yɛhera. 8Ge se'em n borɛ la, la se'em n baherɛ ka ko'om la toonɛ dela toon yenɛ. Ge Na'ayenɛ wan yɔ' ba ayema woo yɛhera la sɛla la sɛla te a tom. 9Te tomam dela boyena lagom tona bɔ'ɔra Yenɛ, ge te yamam me ana wo Na'ayenɛ va'am la. Ya me le ana wo yire la bo Na'ayenɛ. 10Magahɛ wo se'em n de mɛta n biŋe ɛnberɛ, ge te nɛra ayema me nya mɛta dɔgɔla se'em la. Bala mea, te mam me dekɛ bo'olomse'a te Na'ayenɛ bo mam la tona la ya wa. Ge la dela nɛra woo tara a mea soŋa soŋa la n tone se'em pa'aha mam tooma wa poan. 11Se'ere n sɔe la, Na'ayenɛ pon dekɛ la Yesu Krista te enŋa ma'an n de ɛnberɛ, ge ɛnberɛ se'ere da le pa'ahɛ. 12Bala, basɛba tooma wan ana wo ba dekɛ la sanlema, bii sanlenpeela, bii kugasaalehe mɛ dɔgɔlɛ ɛnberɛ dena wa zuo. Basɛba me tooma wan ana wo ba dekɛ la dɔɔrɔ, bii mɔɔrɔ, bii kenkanya mɛ dɔgɔlɛ de zuo. 13Dene poan, Krista lebega daarɛ na la n wan pa'alɛ nɛra woo tooma n ane se'em. Na'ayenɛ yeti a dekɛ la bugum magahɛ nɛra woo tooma. Bugum la n wan di pa'alɛ nɛra woo tooma soŋa n ane se'em. 14Bugum la han di, ge te se'em n dekɛ sɛla mɛ dɔgɔlɛ ɛnberɛ la zuo ka lagom di, Na'ayenɛ wan yɔ' a daana. 15Ge bugum la han lagom di se'em n dekɛ sɛla mɛ dɔgɔlɛ ɛnberɛ la zuo la, a daana kan tara sɛla. A mɛŋa wan nyɛ faanrɛ wo a peɛn la bugum poan la. 16Ge yelemɛŋɛrɛ, ya dela Yenɛ Yire te a Sea la bɔna la ya la. 17Bala, se'em n sagom Yenɛ Yire wa, Na'ayenɛ me wan sagom en. Se'ere n sɔe la, Yenɛ Yire dela toolom zen'an. Yamam mɛhe n de a Yire la. 18Ge da pan'ahɛ ya ya mɛhe. Se'em ya poan han tɛn'ɛhɛ te enŋa dela yamdaana doohe la enŋa n mi sɛla teŋa wa zuo, a daana ton lebege gɔɔŋɔ la a ta'an dɛna yamdaana. 19Sɛba n ka tare Sea la n tɛn'ɛhere te yelese'a de yam yɛla la, yele aŋa dela gɔɔnɛ Na'ayenɛ nɛŋan wo lan golehɛ se'em la, A ne bahɛ mɛ te yamdoma la yam la tuluge nyɔkɛ ba mɛhe. 20Ba le golehɛ yeti, Na'ayenɛ mi te asaala tɛn'ɛhegɔ ka tare vɔnrɛ. 21Dene poan, la ka sone te se'em ŋmɛ'ɛra a nyɔn'ɔn la sɛla te nɛreba wan ta'an eŋɛ. Ge sɛla woo dela ya denɛ. 22La han dɛna la mam Paul, bii Apolos, bii Peter, bii teŋa wa zuo, bii vom, bii ban kiire se'em, bii sɛla n bo nananawa, bii sɛla n wan eŋɛ pooren, la woo dela ya denɛ. 23Ge yamam mɛhe me dela Krista denɛ. Krista me dela Na'ayenɛ denɛ.

will be added

X\