1 Korẽntɩ 2

1N sɔɔnrɔ, mam n daa wa'ana te n mɔɔlɛ Na'ayenɛ yelemɛŋɛrɛ yetɔgom bo ya la, n daa ka tɔgɛ bo ya la nɔmalehom, bii yelese'a bɔkerɛ n kpe'em. 2Mam n daa wa'ana bɔna la ya la, n daa eŋɛ n potɛn'ɛrɛ te n kan tɔgɛ yelese'ere pa'ahɛ, han dagana la n yele ya Yesu Krista la n daa ki punpuuredɔɔ la zuo la yele ma'an. 3Bala, mam n daa wa'ana la, n ka tare paŋa ge te dabeem daa tara mam te n gbe'era. 4Mam n pa'ale ge mɔɔla yelesoma la daa dagɛ la asaala yam yetɔgom, bii nɔmalehom. Ge la dela sɛla n pa'ale Yenɛ Sea la paŋa. 5Bala, yan nam Yesu la dagɛ la asaala yam etegɔ poan, ge Na'ayenɛ paŋa poan. 6Ge bala zan'an, n tɔgɔre yam yetɔgom bɔ'ɔra la sɛba n sɛ' ze'ele soŋa soŋa Yesu sore dɔlɔga poan la. Ge yambona wa dagɛ la teŋa wa zuo nɛreba yam, bii sɛba n sɔe teŋa wa zuo behera. Bama la ba yam la kan bɔna wuuha. 7Ge yam sebo te mam tɔgɔra wa dela Na'ayenɛ yam sebo te nɛreba daa nan ka baŋɛ bɔ la. Bo daa lilom nɛreba zen'en mɛ. Na'ayenɛ daa pon bo to a yambona te to tara na'ahegɔ ge nya daa baŋɛ naam teŋa wa zuo. 8Ge teŋa wa zuo zuodoma la, la ayema me ka mi' yambona wa. Se'ere n sɔe la, ba han mini bɔ, ba daa kan kpa' ne to Daana Yesu se'em n tare na'ahegɔ punpuuredɔɔ la zuo. 9Ge dene n de se'em la, ba golehɛ yeti, Sɛla te nɛra nan ka tabelɛ nyɛ', bii wom, la sɛla te nɛra nan ka tabelɛ tɛn'ɛhɛ, te de wa eŋɛ n de yelese'ere te Na'ayenɛ maahom bo sɛba n nɔŋɛ en la. 10Ge Na'ayenɛ bahɛ te tomam mina dɛ yɛhera la a Sea la poan. A Sea la mi' sɛla woo mɛ. Ge Na'ayenɛ yelese'a te nɛreba ka mina a la, a Sea la mi' a mɛ. 11Wo asaala sea n mi' sɛla woo a poan se'em la, bala mea te Yenɛ Sea la me mina sɛla woo yɛhera Na'ayenɛ yele. 12Sea sɛka te Na'ayenɛ bo to la ka ze'ele la teŋa wa zuo na, ge a dela Na'ayenɛ mea Sea. Bala, te to wan baŋɛ sɛla woo te Na'ayenɛ bo to la. 13Dene poan, to ka tare la asaala yam tɔgɔra Na'ayenɛ yɛla. Ge to tare la sɛla te Sea la pa'alɛ la wo tomam tɔgɛ Na'ayenɛ yelesoma la bɔkɛ bo sɛba te Na'ayenɛ bo ba a Sea la. 14Ge se'em n ka tare Yenɛ Sea la kan ta'an bɔkɛ sɛla n ze'ele Sea la zen'en na la. A daana seren kan ta'an bɔkɛ a. A daana zen'en, ba dela yoo bo en. Se'ere n sɔe la, la dela se'em ma'an n tare Yenɛ Sea la n wan ta'an bɔkɛ bo'olom la n ane se'em. 15Se'em n tare Yenɛ Sea la n ta'an gankɛ sɛla woo behɛ lan ane se'em. Ge se'em me ka boe wan ta'an gankɛ enŋa me behɛ n ane se'em 16Wo lan golehɛ se'em la, Ane n tare sore te a pa'alɛ Yenɛ Sea la, ane n wan ta'an kan'an Na'ayenɛ. Ge han dɛna tomam, to tare la Krista potɛn'ɛrɛ.

will be added

X\