1 Korẽntɩ 15

1Nananawa n sɔɔnrɔ, n bote n tɛɛn ya mɛ yɛhera yelesoma la te n mɔɔlɛ bo ya la. Mam daa mɔɔlɛ dɛ la, ya daa to'e dɛ. Te la nya de'a la yelesoma la poan n bala te ya sɛ' ze'ele soŋa soŋa ya sakerɛ Yesu sore dɔlɔga la poan. 2Te la de'a la yelesoma la n bala te n daa mɔɔlɛ bo ya la. Ya han gorɛ yelesoma la kaŋkaŋɛ, bilam te ya wan nyɛ' faanrɛ. Han dagana bala, ya sakerɛ la ye dela yoo. 3Ge sɛla te mam to'e la n bala te mam me dekɛ bo ya wa. De me ye dela yelese'ere n de ninmɔ'ɔrɛ gana zan'an. De dela Krista ki' bo to la to yelebe'ero la zuo wo ban golehɛ Yenɛ gɔŋɔ la poan yele se'em la. 4N daa ki' bala la, ba daa kebegɛ la yoko taŋa poan tare en ta biŋe bini. Ge, dabeha atan' daarɛ, a daa le vo'e a kum la poan mɛ wo ban golehɛ Yenɛ gɔŋɔ la poan le yele se'em la. 5N daa ihege bala la, a daa dekɛ a mea pa'alɛ la Peter yia gee nya daa kɔ'ɔn dekɛ a mea pa'alɛ a tontoneba la. 6A daa le kelom dekɛ a mea pa'alɛ sɛba n dole a sore la kɔbehe senuu. Ge basɛba kekeko kelom vɔna mɛ kɔbehe senuu la poan gee te basɛba me ki'. 7A daa kelom dekɛ a mea pa'alɛ Yames la sɛba woo n de a tontoneba la. 8Pooren, a nya daa dekɛ a mea pa'alɛ la mam Paul se'em n daa ye pooren Yesu tontoneba la poan. 9Se'ere n sɔe la, Yesu tontoneba la woo poan mam n de se'em n bo ba pooren. N pon ka nare ne te n de'a Yesu tontoneba la ayema. Se'ere n sɔe la, la dela mam n daa namehɛ lagaŋseto n dole Yesu sore la. 10Ge, Na'ayenɛ n ete som la zuo, n dela se'em te n de'a nananawa. N eŋɛ mam som wa me dagɛ la sɛla n ka tare vɔnrɛ. Le yɛ'ɛha me, mam tom gana Yesu tontoneba bana la woo. Ge dena wa dagɛ la mam mea paŋa poan, ge la dela Na'ayenɛ n ete som la zuo te n ta'an eta bala. 11Ge yelehego ka bo mam tom gana bii bama n ka tom gana. To zanwaabe lagom mɔɔla la yele dena mea nɔɔ. Te la de'a la denɛ mea n bala te ya sakɛ bo wa. 12Ge ba han mɔɔlɛ bo ya te Krista daa le vo'e a kum la poan, la wan eŋɛ la wane te sɛba ya poan yɛta te sɛba n ki' la kan le vo'e ba kum la poan? 13Bala, han de'a sera Na'ayenɛ yi ka bahɛ te Krista le vo'e. 14Te Krista me han ka le vo'e a kum la poan, te yi ka tare yelese'ere te to wan mɔɔlɛ bo ya gee te yamam me ka tara yelese'ere te ya wan sakɛ bo. 15Yelemɛŋɛrɛ, la wan pa'alɛ te to parone mɛ yɛhera Na'ayenɛ yɛla. Se'ere n sɔe la, to yete yɛhera a yɛla te enŋa n bahɛ te Krista le vo'e. Ge, la han de'a sera te sɛba n ki' la kan le vo'e, la pa'alɛ te Na'ayenɛ yi ka bahɛ te Krista le vo'e a kum la poan. 16Te sɛba n ki' la han ka le vo'e, Krista me yi daa ka le vo'e. 17Krista me daa han ka le vo'e, yan naam Krista se'em la yi dela yoo gee te a me ka bahɛ ya yelebe'ero bo ya. 18La me wan pa'alɛ te sɛba n dole Yesu sore gee ki' la kan nyɛ' faanrɛ. 19Te la han de'a to bɔŋa teŋa wa zuo ma'an te to tara ton sakɛ to sunya poan te Yesu wan soŋɛ tɔ, la ye sontii ba zɔ' tomam ninbɔn'ɔn gana nɛra se'em woo n bo teŋa wa zuo. 20Ge Na'ayenɛ n daa bahɛ te Krista le vo'e a kum la poan mɛ, a bahɛ te enŋa dɛna dideena ge bahɛ te basɛba n ki' wan me vo'e ba kum la poan. 21Magahɛ wo nɛra ayema zuo te nɛreba kiira se'em la, bala mea me nɔɔ te nɛra ayema zuo te nɛreba wan ta le vo'e ba kum poan. 22Ge nɛreba kiire la ban yehe nɛra ayema wa, Adam buuri poan na la zuo. Dene poan, bala mea me nɔɔ te Na'ayenɛ wan bahɛ te nɛreba me le vo'e ba kum poan la ban bo la nɛra ayema wa me, Krista la zuo. 23Ge, nɛra woo wan ta le vo'e a kum poan la daanse'ere daarɛ te la sɔna te a vo'e la. Yia, Krista n daa de se'em n vo'e a kum poan. Sɛba n tagalɛ wan ta me vo'e ba kum poan Krista han ta lebena, dela sɛba n sakɛ bo en la. 24Dena wa han ba'ahɛ, teŋa wa ba'ahegɔ nya wan paɛ. De daarɛ la, Krista wan nyaŋɛ zuodoma la nadoma la kpɛ'ɛndoma. A han nyaŋɛ ba bala, a nya wan dekɛ sɔ'ɔlom la bo to Sɔ' Na'ayenɛ. 25Se'ere n sɔe la, la sontii Krista sɔna behera te Na'ayenɛ ta nyaŋɛ a diŋdoma woo bo en. 26Kum n de se'em n yete a ba'ahɛ a diŋdoma woo te a yete a nyaŋɛ gee te nɛreba ka le kiira yɛ'ɛha. 27Ge ba golehɛ Yenɛ gɔŋɔ la poan yeti, Na'ayenɛ nyaŋɛ sɛla woo bo en mɛ. Ge Na'ayenɛ n yete a nyaŋɛ sɛla woo wa pa'alɛ soŋa soŋa mɛ te Na'ayenɛ ka lagom bɔna sɛla woo poan te a nyaŋɛ bo Krista la. 28Ge, Na'ayenɛ n diŋɛ dekɛ sɛla woo eŋɛ Krista nu'uhen wa, enŋa Krista se'em n de a Dayɔa la me bo la enŋa Na'ayenɛ mea nu'uhen. Bala, Na'ayenɛ me nya wan de'a se'em n wan sɔna sɛla woo behera. 29Tɔ. Nananawa, nɛreba han ka ta le vo'e ba kum la poan, nɛresɛba n to'e ko'om soa bɔ'ɔra sɛba n pon ki' la bɔ'ɔra ba bo? Nɛreba me han pon ka le vo'e ba kum la poan, wane te nɛreba tɔ'ɔra ko'om soa bɔ'ɔra sɛba n pon ki' la? 30Ge han de'a tomam, bene n sɔe te to ka gangɛ nɛreba ko' tɔ se'em ma'an? 31Ge n sɔɔnrɔ, mam pɔnhere n vom mɛ daarɛ woo. Mam me n yete ya sɛla wa dagɛ ponpɔrɔŋɔ. Ge, la dela yelemɛŋɛrɛ wo lan de yelemɛŋɛrɛ te mam ŋmɛ'ɛre n nyɔn'ɔn ya zuo mɛ yɛhera to bɔŋa to Daana Yesu Krista sore dɔlɔga poan la. 32Mam daa pɔnhɛ n vom Epesus teŋa poan wo nɛra n zabere la goodunhe la. Te ya tɛn'ɛhɛ te mam daa eŋɛ dena wa daa han dene la nɛresaala ma'an zuo, bene yɔɔrɔ te n nyɛ' de poan? Ge, nɛreba han ka ta le vo'e ba kum poan, bahɛ ya te toyi' eta ya wo nɛreba n yele se'em la. Ba yeti, Bahɛ ya te to di' gee nyu', beere wana ma'an te to ki' ya. 33Da bahɛ ya te se'em pan'ahɛ ya. Te ho han de'a nɛresoŋa gee tɔgɔha nɛresɛba etegɔ n ka an soŋa, hon me etegɔ kan ana soŋa. 34Bahɛ ya tɛn'ɛhɛ yooro la gee tɛn'ɛhe ya la sɛla n de ma'an gee me da le tone ya be'emtooma la. Ge ya sɛba boe ka mina Na'ayenɛ. Dena dela vi' bɔ'ɔra ya. 35Tɔ. Ge nɛra ayema ta'an soke yeti, La wan eŋɛ la wane te sɛba n ki' la le ta vo'e ba kum la poan? Ba han le vo'e bala, bene iŋa taaba te ba yete ba tara? 36Soke dena wa dela gɔɔn sokere. Se'ere n sɔe la, ho han borɛ bonbuula ba kan yehe han dagana la ba pɔn'ɛn mɛ yia. 37Ge ho han borɛ bonbuula wo ki' bii bonbuula sɛba me ha, ho ne ka borɛ en la n ne yehe ana se'em la. Ge, ho yenzuo ne borɛ la bonbuula la ma'an. 38La nya ne de'a la Na'ayenɛ n ne bahɛ te bonbuula la ne yehe na wo enŋa Na'ayenɛ n bote de ana se'em la. A bahere te bonbuula woo yɛhera ana wo ban sontii ba yehe na ana se'em la. 39Dagɛ iŋa woo n de iŋyeŋɔ. Nɛresaaleba tare ba iŋa mɛ ka tɔka, te dunhe me tara ba iŋa me ka tɔka, te niihe me tara ba denɛ, te ziim me tara bama me denɛ. 40Saazuo ha iinhe boe mɛ te teŋa wa zuo me iinhe me bɔna. Ge, saazuo ha iinhe n an soŋa se'em bo la la yema la teŋa wa zuo iinhe n me an soŋa se'em. 41Wontɛɛŋa n tare a mea soŋa, te ŋmarega me tara a soŋa te ŋmarebibihe tara ba me sɔnhe. Ge ŋmarebibihe tare ba sɔnhe me yema yema. 42Ge nɛreba n yete ba ta le vo'e ba kum poan la se'em n wana. Nɛreba han ki' te ba laɛ ba, ba iinhe wan sagom, ge ba han le vo'e ba kum la poan, ba iinhe la ka ta'an le sagom yɛ'ɛha. 43Nɛra han ki' te ba laɛ en, a iŋa la lɔre mɛ gee me ka tara paŋa, ge Na'ayenɛ han bahɛ en te a le vo'e a kum la poan, a an soŋa mɛ gee me tara paŋa. 44A han ki' bala te ba laɛ en, a tare la teŋa wa zuo iŋa. Ge, a han le vo'e a kum la poan, a tare la saazuo ha iŋa. Te teŋa wa zuo iŋa bo mɛ. Bala, saazuo ha iŋa me bo mɛ. 45Ge ba golehɛ Yenɛ gɔŋɔ la poan yeti, Na'ayenɛ yuun naam Adam se'em n de yiadaana te a ihege dɛna asaala. Ge Adam se'em n de pooren wa dela se'em n bo'ore nɛreba vom saazuo ha. 46La dagɛ la saazuo ha vom la n de yia, ge la dela teŋa wa zuo vom la n de gee nya bo saazuo ha vom la. 47Na'ayenɛ daa dekɛ la yɔgɔrɔ naam Adam yia. Ge, Adam se'em n de pooren wa ze'ele la saazuo Na'ayenɛ zen'en na. 48Bala, sɛba n de teŋa wa zuo nɛreba ane wo nɛra se'em te Na'ayenɛ dekɛ yɔgɔrɔ teŋa wa zuo naam en la. Sɛba me n de saazuo nɛreba an me wo nɛra se'em n ze'ele saazuo Na'ayenɛ zen'en na la. 49Magahɛ wo ton tare nɛra se'em te Na'ayenɛ naam en teŋa wa zuo iŋnaanɛ se'em la, bala mea me nɔɔ te to wan ta tara nɛra se'em n ze'ele saazuo ha na iŋnaanɛ. 50Bala n sɔɔnrɔ, sɛla te n yɛta wa vɔnrɛ dela dena wa. Te sɛla n tare iŋa la la ziim kan lagom bɔna zen'an te Na'ayenɛ sɔna behera la. Sɛla me n sagom ne kan ta'an tara sɛla n kan sagom ne gee kɔ'ɔn bɔna bala wuuha. 51Ge bahɛ ya te n yele ya yelese'ere te nɛreba ka mina wa. De dela to zanwaabe ka yete to ki'. Ge, to waabe wan ta tee kan ana wo ton an se'em wa. 52Ba han ta peebe tentanɛ se'ere te ba yeti ba peebe pooren la, yele ana wa wan kɔ'ɔn eŋɛ mɛ wana kalam wo nɛra n kpamehɛ nini se'em la. Se'ere n sɔe la, ba han ta peebe tentanɛ la, sɛba n ki' la wan le vo'e ba kum la poan nya tara iŋsɛka n wan bɔna wuuha. Bilam, te to zanwaabe me wan tee kan ana wo ton an se'em wa. 53Te la sontii iŋsɛka n wan bɔna wuuha sɔe iŋsɛka n kan bɔna wuuha. Sɛla me n ka kiire sontii la sɔe sɛla n kiire. 54Dene poan, sɛla n ka sagom ne han sɔe sɛla n sagom ne, gee te sɛla me n ka kiire me sɔe sɛla n kiire, ban golehɛ Yenɛ gɔŋɔ la poan yele se'em la ye wan de'a yelemɛŋɛrɛ. La yeti, Na'ayenɛ sagom sɛla n bahere te nɛreba kiira la mɛ. Bala, a nyaŋɛ sɛla woo zan'an zan'an. 55La le yeti, Hon akum wa, ho kpe'eŋo la bo la bɛ? Ho paŋsɛka te ho tara sagom na la bɛɛ? 56Kum nyɛte a paŋa la yelebe'ero zen'en te yelebe'ero me nyɛta a paŋa pa'alegɔ la poan. 57Ge, to po'ohɛ Na'ayenɛ la enŋa n bahɛ te to nyaŋɛ yɛhera to Daana Yesu Krista poan la. 58Dene poan, n mabisonɔ wa, sɛ' ya ze'ele soŋa soŋa gee da bahɛ ya te yelese'ere nyaŋɛ ya. Ya mi' te ya han tona to Daana Na'ayenɛ tooma, ya ka tone baha la yoo. Bala, mɔ'ɛ ya nini daarɛ woo la ya tona to Daana Na'ayenɛ tooma mea.

will be added

X\