1 Korẽntɩ 11

1Dene poan, tɔgɔhe ya n etegɔ wo mam tɔgɔhe Krista se'em la. 2Ge mam pɛngere ya mɛ zo'e zo'e la yan tɛnre sɛla woo yɛhera n yele gee me kɔ'ɔn dɔla la sɛla nɔɔ te n daa pa'alɛ ya la. 3Ge, n bote ya bɔkɛ mɛ te Krista n de zuodaana nɛresaala woo poan. Sera me n de zuodaana a pɔga poan, gee te Na'ayenɛ me de'a zuodaana Krista poan. 4Bala, boraa sɛka han po'oha mɛ bɔ'ɔra Na'ayenɛ bii a tɔgɔre la Na'ayenɛ yetɔgom, gee dekɛ sɛla vuge a zuo ka bo'ore Krista na'ahegɔ. 5Pɔgɔsɛka me n po'ohere bɔ'ɔra Na'ayenɛ, bii a tɔgɔre la Na'ayenɛ yetɔgom gee ka dekɛ sɛla vuge a zuo, ka bo'ore a sera na'ahegɔ. A han ka vuge bala, la wɔn te a pom a zuo la mɛ. 6Ge pɔka han ka dekɛ sɛla vuge a zuo, a yi kɛ' kɔ bii a pom kɔ. To me mi' soŋa soŋa te pɔka han kɛ' bii a pom a zuo mɛ, la dela yaane. Bala, la sontii a dekɛ sɛla vuge kɔ. 7Ge boraa da dekɛ sɛla vuge a zuo. Se'ere n sɔe la, a dela Yenɛ naane la a na'ahegɔ. Ge pɔka dela boraa na'ahegɔ. 8Se'ere n sɔe la boraa ka yehe pɔka poan na, ge pɔka n ton yehe boraa poan na. 9La me dagɛ la pɔka zuo te Yenɛ naam boraa, ge a naam pɔka bo la boraa. 10Dena wa la Yenɛ soŋoreba la zuo, te pɔka tare sore te a vuge sɛla pin' a zuo te la dɛna danlehom te a bo la a sera nu'uhen. 11Ge to Daana sore la poan, pɔka boe la boraa nu'uhen, la boraa bɔna pɔka nu'uhen. 12La dela pɔka n yehe boraa poan na, bala mea te boraa doohe pɔka poan yehe na. Ge sɛla woo ze'ele la Yenɛ zen'en na. 13Ya mɛhe tɛn'ɛhe behɛ, te la de ma'an te pɔka soha Yenɛ ge ka dekɛ sɛla vuge a zuo? 14Nɛra woo teŋa wa zuo mi' te boraa han bahɛ te a zonto wɔgɛ, la tare la vi' kɛn'ɛha a mea. 15Ge, pɔka han bahɛ te a zonto wɔgɛ, la ton de'a la na'ahegɔ bo en. Se'ere n sɔe la a zonto la n dela sɛla bo en te a pin' a zuo la. 16Ge, se'em han bɔta te a ŋmɛ' nɔkpe'ene yɛhera yele dena wa, yelese'ere te mam tara zan'an zan'an dela dena wa. De dela tomam, bii lagaŋseto woo n dole Yesu sore la dole etekona wa mɛ. 17N kan pɛngɛ ya yɛhera nɔse'ere te n yeti n yele bo ya wa. Se'ere n sɔe la, ya han ne lagahɛ taaba te ya yete ya po'ohɛ mɛ, ya ka tare yelese'ere n soŋore, ge ya ton tare la yelese'ere n sagom ne. 18Ge yia poan, nɛreba yele mam te ya han ne ta lagahɛ taaba wo sɛba n dole Yesu sore la, yelehego n ne wa'an ya teŋasoka na. Mam n behɛ yetɔgɔbɔna wa, mam sakɛ ya te la ta'an seren de'a sera. 19Ge la de yelemɛŋɛrɛ te yelehego wan bɔna ya teŋasoka. Bala, te ba wan baŋɛ sɛba n seren de yelemɛŋɛrɛdoma Na'ayenɛ nɛŋa. 20Ge ya han ne lagahɛ taaba, ya ne ka lagahɛ bala te ya di' la disɛka te ba yi'ira to Daana Yesu Dia la. 21Te ya han ne wa'an bala na te ya lagom di', nɛra woo ne ihege mɛ zɛra a zɛra te a di' perɛ a poorɛ. Ya han ne eŋɛ bala la, basɛba ne ze'a mɛ la kom gee te basɛba me ton nyu' buge. 22Bala la, ya mɛhe yiya ka bo ha te ya wan ne keŋɛ bini ta di' gee nyu'? Denɛ poan, ya wan ton behɛ lagaŋseko n dole Yesu sore la yoo, gee me dekɛ vi' kɛn'ɛhɛ nɛresɛba n ka tare la? Ya bote n yele ya la dene yɛhera yele dena wa poan? N wan ta'an pɛngɛ ya yele dena wa poan? Aai, n kan ta'an pɛngɛ ya de poan. 23Ge yelese'ere te mam to'e to Daana zen'en n wana. Yele denɛ te a pa'alɛ mam te mam me dekera pa'alɛ yamam me wa. De dela yu'uŋseko te ba daa ŋma' to Daana Yesu la, a daa dekɛ la boroboro 24po'ohɛ bo Yenɛ gee gɛn'ɛn dɛ gee nya yeti, Boroboro wa dela n iŋa la bo ya. Bala ete ya dɛ la ya tɛnra n yele. 25Bala mea nɔɔ, ban daa ta obe ba'ahɛ la, a daa le dekɛ la wanɛ yeti, Wanɛ wa dɛna nɔbiŋere paalɛ n ziim la poan. Eŋɛ wana, ya han ne ta nyuura dɛ, ya nyuure tɛnre n yele. 26Dene poan ya han ne ta ɔbera boroboro bona wa taaba gee nyuura wanɛ dena wa taaba poan, la pa'alɛ nɛreba to Daana n ki' se'em gura ta lebe na. 27Bala, se'em n ta ɔbera to Daana boroboro wa gee nyuura wanɛ dena wa poan te la ka tara nare bɔ'ɔra to Daana Yesu, tom la be'em bo to Daana iŋa la la a ziim la. 28Dene poan, la sontii se'em woo n yete a obe boroboro dena wa taaba gee nyu' wanɛ dena wa taaba poan, a behɛ a mea soŋa soŋa yia gee eŋɛ dɛ. 29Se'ere n sɔe la, la sontii hon se'em n ete dena wa mina to Daana Yesu iŋa vɔnrɛ n de se'ere. Han dagana bala, hon se'em n eŋɛ dɛ gee ka mina de vɔnrɛ eere la namehegɔ zo'e zo'e Na'ayenɛ zen'en bɔ'ɔra ho mea. 30Bala n sɔe, te ya sɛba zo'e zo'e bɛn'ɛnra, te ya sɛba ka tara paŋa gee te ya sɛba me ki' la. 31To han gankera to mea, to kan nyɛ' te to tue yelese'ere. 32Ge, to Daana Na'ayenɛ n wan gankɛ tɔ. Bala, a kan ta lagom gankɛ tɔ la sɛba n ka sakɛ bo Yesu la. 33Dene poan, n sɔɔnrɔ wa, ne gure ya taaba ya han ne keŋɛ te ya di to Daana dia wa. 34La me sontii se'em kom han dona, a di' yire. Bala, te ya han ne ta lagahɛ taaba, ya kan nyɛ' namehegɔ Na'ayenɛ zen'en. Ge han de'a yelese'a n gee la, n han wa'ana, n wan maalɛ a.

will be added

X\