1 Korẽntɩ 10

1Tɔ. N sɔɔnrɔ, n bote ya tɛnra la sɛla n daa eŋɛ to sɔyaabdoma sɛba n dole Moses la. Na'ayenɛ bo la saŋgbana a se'a poan gee soŋora ba zen'an woo te ba yɛ'a. A soŋɛ ba zanwaabe te ba doohe Mɔgɔ Mɔlega la poan doe gee te sɛla ka daan ba. 2Ba nyɛ' saŋgbana gee doohe Mɔgɔ Mɔlega la poan la, la pa'alɛ mɛ soŋa soŋa te ba yuun lagom bɔna mɛ la Moses. 3Ba woo di' disɛka 4ge nyu' ko'om sebo n ze'ele Na'ayenɛ zen'en na la mɛ. Ba nyu' ko'om la taŋsɛka n ze'ele Na'ayenɛ zen'en na. Taŋa wa me dela Krista se'em n daa doohe ba zen'an woo te ba keŋɛ la. 5Ge bala zan'an, Na'ayenɛ ka tare popeelom la bama basɛba zo'e zo'e. Bala ban ki' pɔgɔtia poan la. Ba gan' la bɔbɔre woo. 6Te nananawa, yele ana wa woo enŋɛ bo la to mam te to beha la to da kɔ'ɔn bɔta yelese'a n de be'em to sunya poan wo bama n eŋɛ se'em la. 7To me kan bɔta te to kaanbera baga wo ba basɛba n eŋɛ se'em la. Ge ba golehɛ Yenɛ gɔŋɔ la poan yeti, Nɛreba la zin'ire mɛ dita gee bugura gee wa'ara de'eŋɔ la poan. 8Da bahɛ ya te to tona yalomtooma wo bama basɛba n eŋɛ se'em la. Dabaherɛ yenɛ te ba tuha pihiyi' la atan' ki'. 9La ka sone te to eta sɛla te to magahɛ to Daana Na'ayenɛ behɛ wo bama basɛba n eŋɛ se'em la. Bama n eŋɛ bala la, bonsɛ'doma n don' ba te ba ki'. 10La me ka le sona te ya nyɔna wo bama basɛba n eŋɛ se'em la. Bama me n eŋɛ bala la, Na'ayenɛ soŋora se'em n koore la n ko' ba. 11Yele ana woo eŋɛ ba te la de'a la sɛla te to wan beha dɔla. Ba me golehɛ a biŋe te la de'a la sɛla n wan kan'ana tɔ. Bala, to mam nya bo la dabahese'a n kan yue gee te teŋa ba'ahegɔ daarɛ paɛ. 12Dene poan, hon se'em n tɛn'ɛhe te ho sɛ' ze'ele sontii ho tara ho mea soŋa soŋa gee da le lu'. 13Ge ponpan'ahadaana la han ta wa'an ho zen'en na pan'aha ho te ho bɔta te ho tom be'em, da tɛn'ɛhɛ te la dela hon ma'an te a eta bala. Ge, a pon eta la bala bɔ'ɔra nɛra woo. Ge, Na'ayenɛ se'em n ete n biŋe a nɔɔrɛ te a eŋɛ se'em la kan sakɛ te a pan'ahɛ hɔ ta paɛ zen'sɛka te ho mea kan ta'an sɛ' ze'ele soŋa soŋa de poan. Se'em te ponpan'ahadaana la ta pan'aha en te a bɔta te a tom be'em la, Na'ayenɛ wan bo en paŋa te a ŋmibe de poan gee kan tom be'em. 14Dene poan, n zɔ'sonɔ wa, de ya sɛba n wan yehe ya mɛhe baga kaanbegɔ poan. 15Ge mam tɔgɔre bɔ'ɔra ya wo nɛresɛba n tare yam la. Bala, behɛ ya nya mam yele se'em la dela ma'an bii la dagɛ ma'an. 16Ge wanɛ se'ere la daam n boe bo Na'ayenɛ ma'an te to ne po'ohɛ bo gee nyu' la ne wona te to lagom nyu' la Krista ziim. Boroboro la me te to ne gɛn'ɛnhɛ bo taaba obe la me ne wɔna te to lagom obe la Krista iŋa la. 17Te boroboro deyena ma'an n bo la zuo, tomam zanwaabe bii la ton zo'e wa me lagom de'a la boyena. Se'ere n sɔe la, to zanwaabe lagom obe la boroboro deyena mea nɔɔ. 18Ge le tɛnre ya la Israel teŋa nɛreba la yele. Sɛba n di' disɛka te ba dekɛ ko' kaanbegɔ daka la zuo bo Na'ayenɛ la me wone te ba lagom de'a la boyena la a tooma la. 19Ge mam yete sɛla la ka pa'alɛ mɛ te disɛka te ba dekɛ kaanbɛ baga n tare vɔnrɛ, bii baga la mɛhe n tare vɔnrɛ. 20Aai, dagɛ ba se'em n tare vɔnrɛ. Mam n yete sɛla la dela bagakaanbereba han dekɛ sɛla kaanbɛ ba bimbina la zuo, ba ka kaanbɛ bo la Na'ayenɛ, ge ba kaanbɛ bo la bonbɛ'ɛhe. Mam me ye ka bote te ya dekɛ ya mɛhe lagom la bonbɛ'ɛhe la. 21Ya kan ta'an nyu' to Daana Yesu wanɛ la poan n pa'alɛ te ya lagom mɛ la en, gee me tuluge nyuura bonbɛ'ɛhe wanɛ la poan. Ya kan ta'an lagom la to Daana Yesu di' gee le lebe ta lagom la bonbɛ'ɛhe la dita. 22To han eŋɛ bala, to Daana wan nyuuna la tɔ. To me ye ka kpe'em gana en. 23Ge nɛreba yete te, Sore boe bo to te to eta sɛla woo te to bɔta. Yelemɛŋɛrɛ, la dela bala, ge dagɛ sɛla woo n an soŋa. Ba yeti, Sore boe bo to te to eta sɛla woo te to bɔta. Ge, dagɛ sɛla woo n tare soŋorɛ. 24Ya se'em da zegera te a beha la a mea ma'an yele, ge a me lagom beha la sɛba me yɛla. 25Ya tare sore te ya da' nɛnseko woo te ba kɔɔha da'a poan la la ya di'. Ya han da'ara bala da soke ya konze'ele zen'en na te daanse'ere ya wan ta ganlom zuo. 26Se'ere n sɔe la, Teŋparɛ wa, la sɛla woo n boe ka poan dela Na'ayenɛ denɛ. 27Se'em n ka dole Yesu sore han yi' ho te ho di' la en te ho sakɛ bala, ho ta'an keŋɛ la en. Ge, ho han paɛ te a tare sɛla woo wa'ana, di' mɛ gee da soke bon ze'ele zen'an na to ho wan ganlom zuo. 28Ge, nɛra se'em te dena wa daana a potɛn'ɛrɛ han yele ho yeti, Ba dekɛ dikana wa kaanbɛ bo la baga. Da ye di' a potɛn'ɛrɛ la zuo. 29La dagɛ la la daane la hon mea potɛn'ɛrɛ zuo te n tɔgɔra, ge la dela se'em n yele ho bala la potɛn'ɛrɛ zuo. Ge ayema me ta'an soke yeti, La han de'a bala, la ye wan eŋɛ la wane te nɛra ayema me potɛn'ɛrɛ gu' mam tare sore te n eŋɛ sɛla woo te n bɔta? 30N han tara n dia po'ohɛ bo Na'ayenɛ gee di' ka, la wan eŋɛ la wane te se'em zɛrɛgɛ yɛhera disɛka te a po'ohɛ bo Na'ayenɛ gee di'? 31Bala, sɛla woo te ya eta, ya han dita mɛ bii ya nyuunre mɛ, eta ya dɛ te de de'a pɛnka bɔ'ɔra Na'ayenɛ. 32Bone ya bɔŋsɛka taaba n kan tare daaŋɔ wa'an Yudoma bii Greekdoma bii lagaŋseto n dole Yesu sore la teŋasoka na. 33Ete ya sɛla te mam daa eta la. Mam daa kpe'enre n mea eta yelese'ere woo n wan eŋɛ nɛra se'em woo suunre nyɛlom n daa ka tɛn'ɛhe n mea som ma'an yele. Ge, n daa tɛn'ɛhe la nɛra woo som zuo te n ta'an bahɛ ba te ba dɔla Yesu sore.

will be added

X\