1 Korẽntɩ 1

1Mam Paul se'em te Yenɛ daa bahɛ te n de'a Yesu Krista tontoneba la ayema la la to sɔɔn Sostenes n golehɛ gɔŋɔ wa. 2To golehɛ bɔ'ɔra la yamam lagaŋseko n boe Korint teŋa poan te Na'ayenɛ yi' ya zanwaabe te ya de'a a nɛresɛba n wan bɔna ya yema la. Ya de a nɛreba yɛhera la ya bɔŋa Yesu Krista poan. To me lagom golehɛ bɔ'ɔra la sɛba woo n boe zen'se'ehe woo poan, ge yi'ira to Daana Yesu Krista te a dela ba Daana la to mam me Daana la. 3To Sɔ' Na'ayenɛ la to Daana Yesu Krista wan eŋɛ ya som, ge bahɛ ya te ya tara sunma'ahom. 4Ge mam sohora Na'ayenɛ daarɛ woo bɔ'ɔra ya yɛhera la som sebo te a eta bɔ'ɔra ya Yesu Krista zuo la. 5Te ya bɔŋa Krista poan, sɛla ka boe te ya koŋe de. Ya mi' tɔgom woo mɛ, ge me le tara mi'ilom woo. 6Ge yan boe bɔŋsɛka taaba la pa'alɛ mɛ soŋa soŋa te yetɔgom sebo te ya wom yɛhera Krista yele la dela yelemɛŋɛrɛ. 7Bala n sɔe, te bo'olom sebo ka bɔna te ya koŋe la fiin me Na'ayenɛ zen'en wo yan gure te a ta bahɛ te to Daana Yesu Krista ta wa'an na la. 8A me wan tara ya bala soŋa soŋa gura ba'ahegɔ. Bala, te ba wan ta nyɛ' te ya ka tara tuure daanse'ere daarɛ te to Daana Yesu Krista ta lɛbera na la. 9Na'ayenɛ se'em n yi' ya te ya lagom bɔna la a Dayɔa se'em n de to Daana Yesu Krista la dela tontɔɔdaana. 10Ge n sɔɔnrɔ, to Daana Yesu Krista paŋa poan, n yeti ya mɛ la ninmɔ'ɔrɛ. Te ya zan'an sakera bɔ'ɔra taaba. Bala, te yelehego kan bɔna ya teŋasoka. De ya sɛba n wan naa nɔɔrɛ tara potɛn'yenɛ. 11Te n sɔɔnrɔ, nɛreba basɛba Kloe yizuo la poan yele mam yɛhera ya yele te nɔkpɛ'ɛma n boe ya teŋasoka. 12Bala, bahɛ ya te n dekɛ dɛ wo wana wa. Ya woo tare la potɛn'ya yema yema. Ya se'em wan yeti, Mam dole la Paul, te ayema me yeti, Mam me dole la Apolos, te ayema kelom yeti, Mam dole la Peter, te ayema me wan kelom yeti, Mam dole la Krista. 13Krista boe la yema yema? Ba daa kpa' la Paul bo ya? Ya daa to'e ko'om soa la Paul yu'urɛ poan? 14Ge mam pɛngɛ Na'ayenɛ la mam n daa ka bo ya se'em ko'om soa, han dagana la Krispus la Gaius ma'an wa. 15Bala, se'em kan ta'an yeti ba bo en ko'om soa te a dɛna la se'em n wan dɔla mam sore. 16Yelemɛŋɛrɛ, n me daa lagom bo Stepanas la a yiredoma ko'om soa. Han dagana la bana wa ma'an, mam ka tɛn'ɛhɛ te se'em le pa'ahɛ te n daa bo en ko'om soa. 17Krista daa ka tom mam na te n bɔ'ɔra la nɛreba ko'om soa, ge n mɔɔla Yelesoma te asaala yam da pa'ahɛ bini bahɛ te Krista kum punpuuredɔɔ zuo la dɛna yoo. 18Bala, sɛba n ka nyɛ faanrɛ behere te Krista n daa ki punpuuredɔɔ zuo la dela yoo. Ge, han dɛna tomam sɛba n nyɛ faanrɛ la mi' te dɛ dela Na'ayenɛ paŋa. 19Ge gɔŋɔ la yeti, N wan sagom yamdoma la yam la bahɛ, ge me wan bahɛ te sɛba n behere la kan le nyɛta sɛla. 20Yamdaana la bɛɛ? Se'em n ba' mina la bɛɛ? Le yɛ'ɛha, sɛba n ŋmɛ'ɛre nɔkpe'ene yɛhera bama n ba' mina teŋa wa zuo yɛla se'em la bɛɛ? Na'ayenɛ pa'alɛ ya te teŋa wa zuo yam ka tare vɔnrɛ. 21Na'ayenɛ mɛŋa yam poan, la kpe'em mɛ bo nɛreba te ba baŋɛ en la ba mɛhe yam. Ge Na'ayenɛ nini tegɛ mɛ te a fan' nɛreba bahɛ la to gere yetɔgom sebo te to mɔɔla wa. 22Yudoma bote la Na'ayenɛ eŋɛ yelekerehe te la pa'alɛ te a dela yelemɛŋɛrɛ. Greekdoma me eere la yam. 23Ge han dɛna tomam tɔka, tomam tɔgɔre la Krista n ki punpuuredɔɔ zuo la yele. Yelehom bona wa me pɔ'ɔrɛ Yudoma la mɛ, ge dɛna gere yetɔgom bo Greekdoma. 24Ge, la han dɛna sɛba te Na'ayenɛ yi' la, Yudoma la Greekdoma la, ba dekɛ yetɔgɔbɔna wa yɛhera Krista yele te bo dɛna la Na'ayenɛ paŋa la a yam. 25Bala Na'ayenɛ gɔɔnɛ nyane asaala yam, te a tɔrɔgɔ nyana asaala paŋa. 26Ge nananawa n sɔɔnrɔ, tɛnra ya yan daa nan an se'em yia ge te Na'ayenɛ daa yi' ya la. Ya fiin wa nɛreba nɛŋan daa dela yamdoma, bii kpɛ'ɛndoma, bii sɛba te nɛreba bɔ'ɔra na'ahegɔ. 27Ge Na'ayenɛ n loe sɛla te nɛreba teŋa wa zuo behera te la dela gɔɔnɛ te a ta'an bahɛ te vi' kɛn' yamdoma. Enŋa n le loe sɛla n ka tare paŋa teŋa wa zuo te a bahɛ te vi' kɛn' sɛba n de paŋadoma. 28Na'ayenɛ loe la sɛla n ka tare zuo, ka tara na'ahegɔ te ba ka nana ba teŋa wa zuo ka dekɛ ba yi sɛla la te a ta'an sagom yelese'a te teŋa wa zuo nɛreba behera te ba dɛna ninmɔ'ɔrɛ la. 29Bala, dena wa pa'ale te nɛra ka boe wan ta'an ŋmɛ'ɛra a nyɔn'ɔn Na'ayenɛ nɛŋan. 30Ge Na'ayenɛ bahɛ ya te ya lagom mɛ la Yesu Krista. A bahɛ Krista te a dɛna to yamdaana. Krista poan, to dela tontɔɔdoma Na'ayenɛ nɛŋan, gee me dɛna Na'ayenɛ toolom nɛreba bɔna fai. 31Wo lan golehɛ se'em la, Se'em woo n wan ŋmɛ' a nyɔn'ɔn, a ŋmɛ' ko te enŋa bɔkɛ ge mina mam.

will be added

X\