1 Yelebiŋ'a 29

1Te David daa yele nɛrekooŋɔ la yeti, Yenɛ loe la n dayɔa Solomon te a mɛ a Yenɛ Yire la, ge Solomon pɔɛ mɛ ge me ka pire seke. Tooma la zo'e mɛ. Yire wa dagɛ nɛra denɛ, ge la dela Na'ayenɛ to Yenɛ denɛ. 2Bala zuo te n teregɛ bɔ sɛla woo te a wan dekɛ mɛ yire wa la, sanlema la sanlempɛɛla la nyɔgom la kuto la dɔɔrɔ la kuga ponpɔnrɔsabelega la kuga dɛnlemadɛntɔ la sanlenkuga yema yema. 3Dagɛ lɔgɔtona ma'an, ge mam mɛŋa po'olɛ la nɔɔrɛ te n bɔ sanlema la sanlempɛɛla te n pa'alɛ n nɔŋerɛ yehera Na'ayenɛ Yire wa. 4Sɛla te n dekɛ la ma'an dela Opir salensoma bɔɔrehe tuha atan' (3000) te sanlenpeelega bɔɔrehe tuha ayopɔe (7000), te ba takɛ dangɔɔma la 5ge maalɛ toolom lɔgɔrɔ la zan'an. Nananawa, ane me n wan pa'alɛ sɛla bo Na'ayenɛ, te a bo en bo'olom te ba dekɛ mɛ yire wa? 6Te yizuto nɛŋadoma la ba keendoma la zaba nɛŋadoma n beha nɛra tuha la nɛra kɔbega la kpɛ'ɛndoma la yehena bo bo'olom, te ba mɛ' Yenɛ Yire la. 7Sɛla te ba bo n wana: sanlema bɔɔrehe tuha anuu (5000) la sanlema ligiri tuha pia (10,000) la sanlempɛɛla bɔɔrehe tuha pia (10,000) la nyɔgom bɔɔrehe tuha pia la banii (18,000) la kuto bɔɔrehe tuha kɔbega (100,000). 8Se'em woo n daa tare sanlenkuga ne tare na eŋɛ Na'ayenɛ Yire lɔgɔrɔ la zen'en bɔbɔrɛ, te Gersom boraa Yehiel behera la. 9Te David poorɛ pee la nɛreba n daa bo Na'ayenɛ bo'olom kekeko se'em la, te ba zan'an nyeena. 10Ba nɛŋan te David dekɛ pɛnka bo Na'ayenɛ ge yeti, Na'ayenɛ to sɔ Israel Yenɛ, n wan pɛngera ho saŋa woo. 11Na'ayenɛ, ho paŋa ka tare makerɛ, ho soŋa nie mɛ saazuo la teŋa zan'an. Lan gan'arɛ zan'an teŋparɛ wa poan hon de naba. 12Tarega la na'ahegɔ ze'ete la hom zen'an na. Hom sɔe sɛla woo behera, paŋa la kpe'eŋo seko n zɛnkere nɛra boe la hom nu'uhen bɔ'ɔra nɛra woo. 13Nananawa, Yenɛ, te bo ho fara, ge pɛngera hɔ. 14Mam la n nɛreba wa dela bana wan ta'an bo la suunre zan'an wana? Sɛla woo ze'ete la hom zen'an na. Bala tomam yeen bo ho la sɛla n ze'ele hom zen'an na. 15Tomam dela saama teŋa wa poan. Te kan yuue wo te sɔyaabdoma la n daa ka yuue se'em la. To wan bɔregɛ wo yilinyiliŋɔ la. 16Na'ayenɛ to Yenɛ, to tare lɔgɔrɔ wa zan'an te to dekɛ mɛ la ho yire wa, na'aha hɔ. Ba zan'an dela hon denɛ, te to tare lebena te to bo ho. 17Yenɛ, mam mi te hom mi nɛra woo suunren, te ban de birikindoma la dɛna ninitigehom bɔra hɔ. Mam poorɛ pee ya. Se'ere n sɔe mam la nɛra woo n bo la to sunya la. 18Na'ayenɛ to sɔyaabdoma Abraham la Isaak la Israel Yenɛ, bahɛ te ho nɛreba bote te ba tona bɔ'ɔra ho daarɛ woo. Bahɛ te ba nɔŋɛ ho ma'an daarɛ woo. 19Ge bo n dayɔa Solomon sunboolom sɛka te a wan nan ho nɔɔrɛ la ho kan'aŋɔ la ho malema se'a te a wan mɛ' Yenɛ Yire doohe la mam bɔ lɔgɔseto bo en wa. 20David nya yele nɛreba n boe lagaŋɔ la yeti, Pɛngɛ Na'ayenɛ ya Yenɛ! Te nɛra woo pɛngɛ Na'ayenɛ ba sɔdoma Yenɛ te ba zan'an lu aliko na'ahɛ Na'ayenɛ la ba naba David. 21Beere yiligɛ te ba ko' lɔlehe tuhure, peraahe tuhure pebibihe tuhure te la dɛna kaanbegɔ bɔra Na'ayenɛ la daam bo'olom. 22Ba la poorɛ pee, te ba nyu' ge di Na'ayenɛ nɛŋan ge le sakɛ bo Solomon sugumnɔɔren boyi' poan. Te ba sɔ' ba la kaam Na'ayenɛ nɛŋan te Solomon dɛna naba ge te Zadok me dɛna malemadaana. 23Solomon sɔe a sɔ na'am koka la zin'ire. Te Yenɛ nu'o paga Solomon zuo, te Israeldoma nam en. 24Kpɛ'ɛndoma la zaba nɛŋadoma la panhedoma la David kɔma basɛba dekɛ ba mɛhe zan'an bo en. 25Na'ayenɛ bahɛ te Solomon dena nakantɛ, te la eŋɛ teŋa la zan'an pakere la a kantɛ la. Naba ka tabelɛ kanregɛ wo Solomon Israel poan. 26Yesse dayɔa David n daa de Israeldoma naba 27yuum pihinaahe. A di la yuuma ayopɔe Hebron teŋa poan, ge di yuun pihitan' la atan' Yerusalem poan. 28David daa dela bondaana, te nɛreba na'aha en, ge te a me korogɛ, ge nya baŋɛ ki'. Te a dayɔa Solomon sɔe a na'am la. 29Sɛla woo te Naba David eŋɛ a na'am la poan la, nɔtɔgɔheba Samuel la Natan la Gad golehe mɛ biŋe. 30Ba golehe toonkanra sea te a eŋɛ a na'am mea poan, la yelese'a n eŋɛ, dagɛ la enŋa mɛŋa vom poan ma'an, ge Israeldoma la dapoore teŋhe la woo.

will be added

X\