1 Yelebiŋ'a 26

1Guruba la n tɔnrɛ se'em n wana. Basɛba dɛna Koradoma Asap dayɔa Kore dayɔa Meselemia la 2Meselemia dayɔkeema Zekaria tagalɛ Yediael la Zebadia la Yatniel la 3Elam la Yehohanan la Eliehoenai, ba bayopɔe la. 4Basɛba me dɛna Obed Edom dayɔɔhe Semaiah la Yehozabad la Yoa la Sakar la Netanel la 5Amiel la Isakar la Peuletai, ba banii te Yenɛ kan' som bo en, la 6a dayɔa Semaiah dayɔɔhe n de ba yire keendoma ge de panhedoma 7Otni la Arepael la Obed la Elzabad la a sɔɔnrɔ Elihu la Semakia n de panhedoma la. 8Obed Edom yaahe n bala. Bama n de panhedoma la tona tona te ba kanlɛ pihiyoobe la bayi'. 9Basɛba me de Meselemia dayɔɔhe la a sɔɔnrɔ panhedoma, ba pia la banii la 10Merari yaaŋa Hosa dayɔa Simri n ane wo bikeŋa 11tagala Hilkia la Tebalia la Zekaria la ba sɔɔnrɔ pia la batan'. 12Ba tɔnrɛ Na'ayenɛ Yire guruba tooma bo ba woo doohe ba nɛŋadoma. Ba me daa tara ba tooma ana woo ba sɔɔnrɔ. 13Ba ŋmɛ la gbaŋa loe bɔbɔrɛ woo bo yire guruba la woo, bonbila la bonkotɛ, ba yiya zan'an. 14Ba loe Selemia te a sɔna dapɔya bɔba nayaŋa la, te ba loe a dayɔa Zekaria, yam kan'aŋɔ daana, la sɔna zuɔ nu'o bɔba nayaŋa la behera. 15Ba loe Obed Edom te a sɔna gɔbega nu'o bɔba la me, te a dayɔɔhe me behera lɔgɔrɔ deto. 16Ba loe Supim la Hosa te ba sɔna zanɔɔrɛ bɔba nayaŋa beha la Saleket nayaŋa la n bɔna sore se'ere n zone saazuo la. 17Daarɛ woo nɛreba bayoobe n gure dapɔya bɔba la, te banaahe me gura zuɔ nu'o bɔba la, te banaahe me gura gɔbega bɔba te bayi' me gura lɔgɔrɔ deo la, 18banaahe n boe gɔbega nu'o bɔba zenzaka gura la sɔrɔɔ bɔba, ge bayi' n gure la zenzaka. 19Ba daa pu tontoneba la wana, doohe Kora dayɔɔhe la Merari dayɔɔhe, ge te sɔdɔɔ bɔba la me dɛna banaahe. 20Levidoma basɛba sɔna bo'olom lɔgɔrɔ la toolom lɔgɔrɔ deseto n boe Yenɛ Yire la poan behera. 21Gerson nɛra Ladan yaahe nɛŋadoma la a dayɔa Yehieli 22dayɔɔhe, Zetam la Yoel, daa sɔe Yenɛ Yire toolom lɔgɔrɔ deto la behera. 23Te lɔge behereba basɛba me daa ze'ele la Amramdoma la Izhardoma la Hebrondoma la Uzieldoma poan na. 24Moses dayɔa Gerson dayɔa Subael daa dɛna lɔgɔrɔ deto la nɛŋadaana. 25A sɔɔnrɔ Eliezer yaahe dela Arehabia la a dayɔa Yesaiah la a dayɔa Yoram la a dayɔa Zikri la a dayɔa Selomit. 26Selomit la a sɔɔnrɔ daa behere bo'olom seto woo David la yizuto neŋadoma n behe nɛra tuha and nɛra kɔbega la zaba nɛŋadoma daa bo Na'ayenɛ. 27Ba daa dekɛ loge seto te ban daa zaberɛ ge vaɛ ge bo Na'ayenɛ te ba maalɛ Na'ayenɛ Yire la. 28Selomit la a sɔɔnrɔ wa n daa kelom behera bo'olom sebo te nɔtɔgɔha Samuel la Kis dayɔa Saul la Ner dayɔa Abner la Zeruiah bia Yoab tara kena bo Na'ayenɛ la. 29Izhardoma la me poan, Kenania la a dayɔɔhe n daa de kema Yenɛ Yire la yeŋa gankɛ Israeldoma yela la. 30Hebrondoma la me poan, Hasabia la a sɔɔnrɔ tuhure la kɔbehe seyopɔe dɛna kpɛ'ɛndoma Israel bɔba sea n boe Yordan Kolaa n boe zanɔya bɔba la zan'an. Ba eŋɛ Na'ayena tooma ge toona bɔ'ɔra naba la. 31Hebrondoma la me poan, doohe sɛla to ba golehe, Yeria n daa de nɛŋadaana. David naam yuuma pihinaahe, te ba nyɛ te panhedoma bo la Yazer teŋa n boe Gilead teŋa. 32Yeriah tare sɔɔnrɔ tuha ayi la kɔbega ayopɔe n de panhedoma te Naba David tom ba te ba behɛ Areubendoma la Gaddoma la Manasedoma yizuo koyema Yenɛ yela la naba yele bo en.

will be added

X\