1 Yelebiŋ'a 23

1David n ta korogɛ ba'ahɛ la, a daa bobe la a dayɔa Solomon naba te a sɔna Israel zan'an beha. 2David lagahɛ Israel nɛŋadoma la malemadoma la Levidoma la zan'an na. 3Levidoma sɛba n de yuuma pihitan' beene zɔna ha kanlɛ dɛna tuha pihitan' la anii (38,000). 4A yele ba yeti, Nɛrebana wa poan, ba tuha pihiyi' la anaahe (24,000) n wan sɔna Na'ayenɛ Yire la tooma beha, te ba tuha ayoobe (6000) dɛna kpɛ'ɛndoma la yelegankereba, 5te ba tuha anaahe (4000) gura Yenɛ la nayahe, te ba tuha anaahe (4000) sɔna yooma pɛngera Na'ayenɛ la yooma yooma lɔgɔrɔ seto te n maalɛ te ba tara pɛngera la. 6Naba David daa dekɛ Levidoma la po ba tɔnrɛ wo ba dɛna Levi dayɔɔhe Gerson la Kohat la Merari. 7Gersondoma la poan na dela Ladan la Simei. 8Ladan dayɔɔhe dela a dayɔkeema Yehiel, tagalɛ Zetam, te Yoel pa'ahɛ batan'. 9Simei dayɔɔhe batan' dela Selomot la Haziel la Haran. Nɛrebana n de nɛŋadoma Ladan yire poan. 10Simei dayɔɔhe dela Yahat la Zina la Yehus la Beria. Semei dayɔɔhe sese'ehe n bala senaahe. 11Yahat n de yia, tagala Ziza, ge Yehus la Beria ka dɔgɛ kɔma zo'e. Bala bama dela yizuo koyena. 12Kohat dɔgɛ la dayɔɔhe senaahe, Amram la Izhar la Hebron la Uziel. 13Amram dayɔɔhe dela Aron la Moses. Te ba yehe Aron sɔ en te a eŋɛ toolom tooma la kaanbe kaanbegɔ bo Na'ayenɛ la pɛngera a yu'urɛ la kɔ'ɔn yɛ'ɛha, enŋa la a dayɔɔhe zan'an. 14Ge han dɛna Yenɛ nɛra Moses, a dayɔɔhe kaanlɛ pa'ahɛ la Levi buuri la poan. 15Moses dayɔɔhe dela Gersom la Eliezer. 16Gersom dayɔkeema dela Subael. 17Eliezer dayɔkeema dela Arehabia. Eliezer ka le dɔgɛ pa'ahɛ, ge Arehabia wa kɔma n ton zo'e. 18Izhar dayɔkeema dela Selomit. 19Hebron dayɔɔhe dela Yeria n de keema, tagala Amaria, tagala Yahaziel, te Yekameam pa'ahɛ naahe. 20Uziel dayɔɔhe dela Mikah n de keema, tagala Isiah. 21Merari dayɔɔhe dela Mali la Musi, te Mali dayɔɔhe dɛna Eleazar la Kis. 22Te Eleazar ki' ge ka tara dayɔa ge tara pugunto ma'an, te Kis dayɔɔhe la di ba. 23Musi dayɔɔhe dela setan', Mali la Eder la Yeremot. Ba zan'an dela batan'. 24Levi yaahe n bala, ba yiya ba yiya. Bama n de nɛŋadoma sɛba woo te ba kaanlɛ poan. Sɛba te ba daa golehe ba yu'urɛ n kaanlɛ ba tone Na'ayenɛ Yire la tooma ban yuuma pihiyi' beene zɔna na. 25David daa yeti, Na'ayenɛ Israel Yenɛ la bo a nɛreba la vo'ohogo, ge nya bɔna la Yerusalem teŋa saŋa woo. 26Te Levidoma la ka le ziira Sogorɛ la bii toolom lɔgɔrɔ la woo. 27David bo a ba'ahegɔ nɔɔrɛ se'em la zuo te ba kaanlɛ Levidoma la pɔhera yuuma pihiyi' beene zɔna na. 28Ba toonɛ daa dela ba soŋora Aron dayɔɔhe la Na'ayenɛ Yire la tooma la. Ba tona zenzagahe la bɔ'ɔrɔ ge miiha toolom lɔgɔrɔ la ton la toonse'ere woo n de Yenɛ yire la toonɛ. 29Bama me daa behere boroboro se'ere n ne tare na biŋera la boom bo'olom zom somɔ la boroboro n ka tare mi'ihom la boroboro te ba kiina laa poan la sɛla n de ba gɛnregɛ la soŋa la sɛla n de ba magahɛ la tebehom. 30Bolika woo bama daa ze'ele bo Yenɛ fara ge pɛngɛ en te zanɔɔrɛ woo te ba eta bala mea. 31Ba eta bala mea ban kaanbera nyɔ'an bo'olom la bɔ'ɔra Na'ayenɛ Vo'ohogo Dabeha la ŋmarepaalehe de'enɔ poan la de'enɔ la woo n zone se'em saŋa woo poan. Bama n tona wana saŋa woo Na'ayenɛ nɛŋan. 32Bama n behere Sogorɛ la toolom zen'an la soŋa ba sɔɔnrɔ Aron kɔma la Na'ayenɛ Yire tooma la.

will be added

X\