1 Yelebiŋ'a 22

1David nya yeti, To wan mɛ' Na'ayenɛ n de Yenɛ la Yire zen'kana wa la Israeldoma la nyɔ'an kaanbegɔ daka. 2Te David bo nɔɔrɛ te ba lagahɛ saama zan'an n kɛn'ɛre Israel teŋa poan la, te a yehe ba poan te ba ŋmata kuga se'a n wan dekɛ mɛ Yenɛ yire la. 3David maahom kuto kekeko n wan dekɛ kure nayahe la kpa'ahe la se gotohe n yule kolehe la. Te David bɔ ba biŋe kekeko la nyɔgom kekeko n ka tare makerɛ 4ge me tara mɔlɔsonɔ tiihe kekeko n ka tare makerɛ. Sidon la Tire teŋhe nɛreba zi na bo en. 5David yele a mɛŋa yeti, Ma dayɔa Solomon wa nan pɔ'ɛ mɛ. A nan ka mi sɛla. Yire wa n wan mɛ bo Na'ayenɛ wa n wan dɛna yire n kanregɛ, te ana soŋa la kpe'em te paŋa bɔna de poan gana yiya woo n boe teŋa wa. Bala n sɔe mam mɛŋa wan maahom lagahɛ sɛla woo. Te a eŋɛ bala a vom yuuma. 6David daa ta yi' a dayɔa Solomon bo en nɔɔrɛ yeti ta mɛ yire bo Na'ayenɛ Israel Yenɛ wa ya. 7A daa yele Solomon yeti, N dayɔa, mam wa maahom la n suunre te n mɛ yire bo Na'ayenɛ n Yenɛ wa yu'urɛ na'ahegɔ zen'an. 8Ge Na'ayenɛ yele mam yeti, ho ba' ka'ahɛ la ziim zo'e, ge zabɛ zabɛ kanra. Bala da mɛ yire bo mam te ba na'aha mam yu'urɛ bini. Se'ere n sɔe la, ho ba' ka'ahɛ la ziim zo'e teŋparɛ wa zuo mam ninin. 9Behɛ, ho wan tara dayɔa te ka bɔna fai. N wan bo ka vo'ohogo ka diŋdoma woo zen'an. Ka yu'urɛ wan yi'ira la Solomon. N wan bo sunma'ahom, te sɛla woo ana baanlam a saŋa la poan. 10Enŋa n wan mɛ yire bo te ba na'ahera mam yu'urɛ la bini. A wan dɛna mam dayɔa te n dɛna a sɔ. N wan sɛ en zin'ire na'am gɔŋɔ la poan te a sɔna Israel zan'an behera wuuha. 11Bala n dayɔa, Na'ayenɛ bɔna la hɔ te ho tara nyaŋerɛ la ho mɛ yire wa bo Na'ayenɛ ho Yenɛ wa, wo Yenɛ mɛŋa n tɔgɛ ho yele se'em la. 12Na'ayenɛ yeen bɔna ho nɛŋa pa'ala ho sore, ge bɔ'ɔra ho bɔkerɛ, ge bo ho paŋa te ho sɔna Israel zan'an behera, ge dɔla a Na'ayenɛ ho Yenɛ pa'alegɔ la zan'an. 13Na'ayenɛ nu'o wan paga ho zuo, ho han ma'ɛn ho mɛŋa dɔla malema la nɔze'elego la te Na'ayenɛ bo Moses te a dekɛ bo Israeldoma la. Ba' ze'ele mɛ ge tara potɛn'ɛrɛ. Da zɔta dabeem bii ho giinla kɔ'ɔhɛ. 14Nananawa behɛ, mam mɔ'ɛ la nini lagahɛ lɔgɔtona wa bo Na'ayenɛ Yire la mea la. Sanlema bɔɔrehe tuha kɔbega (100,000) la sanlenpeelega tuha tuhure (1,000,000) la nyɔgom la kuto n zo'e gaŋɛhɛ la dɔɔrɔ sonɔ la kuga te ba kerehɛ a maahom biŋe. Ge ho ta'an kelom ɛ toseto pa'ahɛ. 15Se'ere n le pa'ahɛ dela, tontoneba gan' la yoo la hɔ, kuga ŋmateba la sɛba n ta'an tara kuga mɛta la kpa'areba la nɛreba n mi' 16sanlema bii sanlenpeelega bii nyɔgom bii kuto tooma yema yema. Nananawa, ihege tom! Na'ayenɛ bɔna la hɔ! 17David daa bo Israel nɛŋadoma la woo nɔɔrɛ te ba soŋɛ a dayɔa Solomon, 18yele ba yeti, Na'ayenɛ ya Yenɛ la bɔna la ya! A bo ya vo'ohogo zen'an woo. A dekɛ teŋhe woo nɛreba enɛ mam nu'uhen, ge n sɔe behera ba zan'an Na'ayenɛ la a nɛreba wa ninin. 19Nananawa, lo ya ya sunya la ya potɛn'ɛra poan ɛ Na'ayenɛ ya Yenɛ la! Vaɛ ya ihege la ya mɛ Na'ayenɛ n de Yenɛ Yire la, la ya tare Na'ayenɛ nɔbiŋere daka la la Yenɛ toolom lɔgɔrɔ la zan'an na kɛn'ɛhɛ yire wa te ya wan mɛ' te de dɛna Na'ayenɛ la na'ahegɔ zen'an la poan.

will be added

X\