1 Yelebiŋ'a 21

1Te Dima la daa tare la toonɛ te a tom la Israeldoma, bahɛ te David ihege kaanlɛ Israeldoma. 2Te David yele Yoab la pɛɛntɛɛnreba neŋadoma la zan'an yeti, Doohe Israel teŋa wa zan'an, pɔhera Beerseba ta paɛ Dan teŋa, la ya tare kanlɛ la na te n baŋɛ. 3Yoab lebehe yeti, Naa, Na'ayenɛ kanregɛ ho sɔ'ɔlom wa sugumnɔɔren kɔbega! Ba kelom dɛna la ho yamehe, ge wane to ho ɛɛra te ho tare ganleŋɔ wa'an Israel na? 4Ge naba ka wom de vɔnrɛ, te Yoab sakɛ yehe kaanlɛ Israel zan'an, ge lebe Yerusalem na. 5En tare kanlɛ la lebena wa pa'alɛ David ge yele en te sɛba n seke pɛɛma Israel poan dela tuha tuhure la tuha kɔbega (1,100,000) te Yuda me ma'an sɔna tuha kɔbehe anaahe la pihiyopɔe (470,000) n seke pɛɛma tɛn' a. 6Ge Yoab ka kaanlɛ Levi la Benyamindoma. Se'ere n sɔe naba la tue mɛ. 7Te Yenɛ suunre sagom la yele wa, te a bahɛ te namehegɔ sige Israeldoma na. 8Te David daa yele Yenɛ yeti, N tom be'em n kanregɛ gaŋɛ la yele wa poan. N sohore ho mɛ, dekɛ ho yameŋa wa tuure wa bahɛ. Se'ere n sɔe la mam tom la gere tooma. 9Te Na'ayenɛ yele Gad, n de nɔtɔgɔha behera David la, yeti, 10Keŋɛ ta yele David yeti mam Na'ayenɛ n bo nɔɔrɛ wa, yɛla atan' te n yeti bahɛ te la sige ho zuin na. Loe hom bote yelese'ere te n dekɛ eŋɛ hɔ. 11Bala te Gad yele David yeti, Na'ayenɛ nɔɔrɛ la n wana te ho loe. 12Ho bote la yuuma atan' kom, bii ho diŋdoma so'a bɔna ho zuo ŋmarehe setan', bii Na'ayenɛ mɛŋa so'a sige ya zuo la ban'an te Yenɛ soŋora koora bora bora dabeha atan'. Bala, tɛn'ɛhe la ho loe yele deyena te n tare lebɛ ta bo mina en tom ma na la. 13Te David yele Gad yeti, Yele wa kanregɛ gaŋɛ ma mɛ. Na'ayenɛ n de ninbɔn'zɔrɛdaana la zuo, mam lu a nu'uhen te a namehɛ ma, la sɔe saala n yeti a namehɛ mam. 14Te Na'ayenɛ tom ban'an te ka lu Israeldoma zuin na, ko' boraahe tuha pihiyopɔe (70,000). 15Te a le tom Yenɛ soŋora ayema te a le sagom Yerusalem teŋa la pɔgɔlom, pɔgɔlom. Sagaŋɔ la poan te Na'ayenɛ tee a potɛn'ɛrɛ, zɔ' ba ninbɔn'ɔn ge gu Yenɛ soŋora la te a da le sagom. Yele wa gu la Yebus nɛra Ornan tooren. 16David daa nyɛ Yenɛ soŋora wa saazuin ha te a foe so'a tɔ Yerusalem zuin na, te enŋa la a nɛŋadoma la n daa yɛ sunsagaŋɔ futo la lu teŋa. 17David soha Yenɛ yeti, La dela mam yele. Mam n tue bahɛ te ba kaanlɛ nɛreba la, ge nɛreba ka eŋɛ sɛla. Yele ka boe piihe wa zuin. Ton bahɛ te too la lu mam la n yiredoma zuo, ge da ko' ho nɛreba wa! 18Te Na'ayenɛ soŋora la yele Gad te a yele David te a keŋɛ Yebus nɛra Ornan la tooren la a ta mɛ kaanbegɔ zen'an bo Na'ayenɛ. 19Te David doohe Gad nɔɔrɛ la wo Na'ayenɛ n bo de se'em la. 20Bala ma'an la te Ornan la a dayɔɔhe senaahe la n boe la tooren ge nyɛ Yenɛ soŋora la, ba la sogɛ ba mɛhe. 21David keŋɛ paɛ Ornan tooren, te a pihigɛ a ki la va'a bahɛ ge dɔnbelɛ teŋa bo en. 22David yele Ornan yeti, Koohe zen'en wa nana wa bo mam te n dekɛ mɛ' kaanbegɔ zen'an bo Na'ayenɛ. Koohe ka bo mam wageya te ban'an wa bahɛ. 23Ornan yeti, Naa, dekɛ eŋɛ hom bote hɔ eŋɛ sɛla la! Sɛla woo dela ho denɛ. Dekɛ lɔlehe la lebege nyɔ'an bo'olom ge dekɛ va'a dɔɔrɔ wa, te la dɛna bugum ge te ki la me dɛna boom bo'olom. 24David zagahɛ yeti, N bote n yɔ mɛ bonɔ la ligiri n zone se'em la. N ka bote n dekɛ hon lɔkɔ kaanbɛ Na'ayenɛ. N me ka bote yoo bonɔ, ge n bote la sɛla n kpe'em te n yɔ kaanbɛ. 25Bala te David dekɛ ligiri n tebegɛ zona la sanlema kpila kɔbehe seyoobe bo Ornan. 26David mɛ' Na'ayenɛ kaanbegɔ zen'an wa, kaanbɛ nyɔ'an bo'olom la sunma'ahom bo'olom. A sohɛ Na'ayenɛ, te Na'ayenɛ bahɛ te bugum ze'ele saazuin ha ni bimbine la zuo dita zigi zigi. 27Te Na'ayenɛ bo Yene soŋora la nɔɔrɛ te a lebe dekɛ so'a la su' ka pɔkɔ la poan. 28David n daa ta nyɛ te Na'ayenɛ lebehe en la Ornan tooren la, bilam te a nya ne kaanbe keha. 29Ge Na'ayenɛ Sogorɛ se'a te Moses daa tin' pɔgɔtia la la nyɔ'an kaanbegɔ daka daa bo la Gibeon zoore 30te David ka ta'an keŋɛ bini ta sokɛ Yenɛ, dabeem n tare en la Na'ayenɛ soŋora la n zanle sɔ'a la zuo.

will be added

X\