1 Yelebiŋ'a 19

1Le yɛ'ɛha te Ammon naba Nahas wa daa ki', te a dayɔa Hanun wa soe di na'am la. 2David yeti, N wan eŋɛ naba Nahas dayɔa Hanun wa soŋa, wo a sɔ n yuun ete mam soŋa se'em la. Bala te David tom nɛreba Ammondoma teŋa la te ba ta po'ohɛ naba Hanun, a sɔ kum la. 3Ge Ammondoma nabibihe yele Hanun yeti, Ho tɛn'ɛhɛ te la dela ho sɔ kum wa te David ton kooma wa? Aai, la dagɛ bala, a tom ba kalam na te ba ɛ kae behɛ ge sa'ɛ tɔ to teŋa wa poan. 4Te Hanun bahɛ te nɛreba gin' David nɛreba wa siie ba tɛɛhe, ge toonhɛ ba futo la sea beene, ge sa'ɛ ba te ba keŋɛ. 5La daa de vi' bo ba la ba lebe kule, te David n daa ta wom ba eŋɛ a yamehe la se'em la, te a bo nɔɔrɛ te ba yee Yeriko teŋa poan gura te ba tɛɛhe la puhe. 6Ammondoma la n daa ta baŋɛ te ba ka eŋɛ David soŋa la, Hanun la Ammondoma daa dekɛ la sanlempɛɛla bɔɔrehe tuhure te ba ta'an yɔ Aram Naharaim la Aram Maaka la Zoba bo yiri toroto la sɛba n tukure i' te ba soŋe ba. 7Ba daa peŋe la yiri toroto la sɛba n tukure i' la tuha pihitan' la ayi', te Maaka naba la a nɛreba wa'an Medeba teŋa poan wa gura, te Ammondoma zan'an keŋɛ sige zaberɛ bɔ'ɔn na. 8Te yele wa lu' David toberɛn te a ton Yoab la pɛɛntɛɛnreba zan'an. 9Ammondoma yehe ba nayahe na ge maahom yehe na la Aram nadoma la me keŋɛ sige zaberɛ bɔ'ɔn la na. 10Yoab n daa nyɛ te pɛɛntɛɛnreba la ze' la ba nɛŋa la pooren zan'an la, a daa loe la Israel kansaŋehe te ba tole zabɛ la Aramdoma. 11A yele a sɔɔn Abisai la pɛɛntɛɛnreba te ba tole to'ohɛ Ammondoma wa. 12Yoab yele yeti, Aramdoma la han kpe'em gana mam, ho wa soŋe mam, ge Ammondoma la me han kpe'em gana hɔ mam me wa soŋe hɔ. 13Kpe'em ya mɛ! To zabɛ nyaŋɛ to'e to nɛreba wa la teŋa wa n de Yenɛ denɛ wa! Na'ayenɛ wan tom sɛla n wan tigɛ a nini. 14Te Yoab la a pɛɛntɛɛnreba zabɛ nyaŋɛ Aramdoma la te ba zɔ a zen'an. 15Ammondoma n nyɛ te Aramdoma la ti'ile na'arɛ la te bama me zɔ Abisai zen'an kɛn' teŋa poan. Bilam te Yoab lebe Yerusalem na. 16Aramdoma n daa ta baŋɛ te Israeldoma nyaŋere bama la, te ba ton yi' ba pɛɛntɛɛnreba sɛba n boe Euprates Kolaa la nɔɔrɛn ha la. Hadadezer zaba nɛŋadaana Sopak daa tare pɛɛntɛɛnreba wa ta bo ba. 17La lu David toba poan te a kanhɛ Israel zan'an doohe Yordan Kolaa la tole, keŋɛ sige zaberɛ ba la ta zabɛ la Aramdoma wa. 18Zaberɛ la poan te Aramdoma zɔ' te David ko' sɛba n tukure la yiri toroto tuha ayopɔe (7000), ge ko' na'ma me tuha pihinaahe (40,000). A me ko' Sopak ba nɛŋadaana la. 19Nadoma sɛba n boe Hadadezer nu'uhen la n ta baŋɛ te Israeldoma nyaŋɛ en me la, ba daa nyɔgɛ zɔtɔ la David mɛ ge dekɛ ba mɛhe lebege a yamehe. Te Aramdoma ka le maalon soŋɛ Ammondoma le yɛ'ɛha.

will be added

X\