1 Yelebiŋ'a 15

1David daa mɛ yiya Yerusalem teŋa poan, te a tin' sogorɛ deo la bo Na'ayenɛ nɔbiŋere daka la. 2A nya yeti, Na'ayenɛ pon deŋɛ loe la Levidoma te bama ziira Yenɛ nɔbiŋere daka la. Bama ma'an n nare ba ziira Na'ayenɛ nɔbiŋere daka la wuuha. 3David bo nɔɔrɛ te nɛra woo lagahɛ Yerusalem teŋa na te ba dekɛ Na'ayenɛ nɔbiŋere daka wa'an zen'sɛka te a maalɛ bo ka la poan. 4Te a yi Aron yaahe la Levidoma la lagahɛ na: 5Kohatbiihe Uriel n de nɛŋadaana la a sɔɔnrɔ kɔbega la pihiyi' (120) la 6Meraribiihe Asaiah n de nɛŋadaana la a sɔɔnrɔ kɔbehe seyi' la pihiyi' (220) la 7Gersonbiihe Yoel n de nɛŋadaana la a sɔɔnrɔ kɔbega la pihitan' (130) la 8Elizapanbiihe Semaiah n de nɛŋadaana la a sɔɔnrɔ kɔbehe seyi' (200) la 9Hebronbiihe Eliel n de nɛŋadaana la a sɔɔnrɔ pihinii (80) la 10Uzielbiihe Aminadab n de nɛŋadaana la a sɔɔnrɔ kɔbega la pia la bayi' (112). 11David yi' malemadoma Zadok la Abiatar la Levidoma Uriel la Asaiah la Yoel la Semaiah la Eliel la Aminadab. 12A yele ba yeti, Yamam n de Levidoma nɛŋadoma. Yamam la ya sɔɔnrɔ la sɔ ya mɛhe, dekɛ Na'ayenɛ Israel Yenɛ nɔbiŋere daka tare na ze'ele zen'sɛka te mam maalɛ bo ka wa. 13Sɛla n sɔe la, Na'ayenɛ to Yenɛ la eŋɛ la sunsunya la tɔ, ya mam Levidoma ka ziira ka la zuo. To daa ka soke en sɛla te to wan eŋɛ. 14Te malemadoma la Levidoma wa sɔ ba mɛhe maahom te ba wan dekɛ Na'ayenɛ Israel Yenɛ la nɔbiŋere daka la tara keŋɛ zen'sɛka te David maalɛ bo ka wa. 15Ba nya ɔnbegɛ dɔɔseto n pu Na'ayenɛ nɔbiŋere daka la, buke ba bɔgɔrɔ zuto, wo Moses n dekɛ Na'ayenɛ yelehom la bo ba se'em la. 16David yele Levidoma nɛŋadoma te ba loe yoon yooneba te ba dekɛ yooma lɔgɔrɔ tona wa, kɔnlɔ la lenlahe ŋmɛ'ɛra la popeelom. 17Levidoma nya loe Yoel dayɔa Heman la a sɔɔn Berekia dayɔa Asap la Merari boraa Kusaiah dayɔa Etan. 18Sɛba n tagalɛ dela ba sɔɔnrɔ Zekaria la Yaaziel la Semiramot la Yehiel la Uni la Eliab la Benaiah la Maaseiah la Matitia la Elipelehu la Mikneiah la Obed Edom la Yeiel n de guruba. 19Yoon yooneba bana me n sɔe lenlahe la Heman la Asap la Etan. 20Zekaria la Aziel la Semiramot la Yehiel la Uni la Eliab la Maaseiah la Benaiah, bama n sɔe kɔn'lɔ te ba ŋmɛ'ɛra te la dɔla baaŋa la. 21Matitia la Elipelehu la Mikneiah la Obed Edom la Yeiel la Azazia n sɔe duurenhe la ŋmɛ'ɛra te dɔla wooleŋo. 22Kenania Levidoma la nɛŋadaana ne behera yoonyooneba la yooma me. 23Nɔbiŋere daka la zen'an nɔɔrɛn la guruba dela Berekia la Elkana. 24Malemadoma Sebania la Yosapat la Netanel la Amasai la Zekaria la Benaiah la Eliezer pɛɛbera tentana Na'ayenɛ nɔbiŋere daka nɛŋan, ge te Obed Edom la Yehia dɛna guruba. 25David la Israel keendoma la kpɛ'ɛndoma n beherɛ tuha keŋɛ Obed Edom yire ta yehe Na'ayenɛ nɔbiŋere daka la la popeelom. 26Yenɛ n bo Levidoma la paŋa te ba nyaŋɛ zɛ Na'ayenɛ nɔbiŋere daka la zuo, te ba kaanbɛ lɔlehe seyopɔe la peraahe seyopɔe bo en. 27Te David la Levidoma n zɛ daka la Kenania n de yoonyooneba nɛŋadaana la yoonyooneba la zan'an bagɛ ba mɛhe la fuwogopeela, te David me dekɛ fugiriga peela yɛ. 28Te Israel zan'an tara Na'ayenɛ nɔbiŋere daka wa la yooma lɔgɔrɔ, gulo la kɔnlɔ la tentana, dɛ'ɛna kɛn'ɛra Yerusalem teŋa poan na. 29Te Saul pɔyɔa, Mikal veehe takole poan nyɛ te ba tare Na'ayenɛ nɔbiŋere daka la kɛn'ɛra David Teŋa mea poan na te a nya nyɛ te Naba David wa'are ge yuleha a mea se'em la, te a nya sea yehe en a suunren.

will be added

X\