1 Yelebiŋ'a 12

1Nɛrebana daa wa'an David zen'an soŋa en, en sogere a mea mɛ Kis dayɔa naba Saul nu'uhen Ziklag teŋa wa. 2Pɛɛntɛɛnreba mea basɛba daa ze'ele la Naba Saul yire la n de Benyamin la poan na. Ba dela dagereba, dagera pɛɛma, kalɔbehe la kuga zuɔ la gɔbega zan'an. 3Ba dɛna Gibeat boraa Semaa dayɔɔhe Ahiezer ba nɛŋadaana la a sɔɔn Yoas la Azmavet dayɔɔhe Yeziel la Pelet la Beraka la Anatot boraa Yehu la 4Gibeon boraa Ismaiah n kpe'em ba pihitan' la poan la Yeremia la Yahaziel la Yohanan la Gederah boraa Yozabad la 5Eluzai la Yerimot la Bealia la Semaria la Harup boraa Sepatia la 6Kora boraahe Elkana la Isiah la Azarel la Yoezer la Yasobeam la 7Yeroham dayɔɔhe Yoela la Zebadia n ze'ele la Gedor teŋa. 8Gaddoma basɛba daa zagahɛ Saul ge wa'ana pa'ahɛ David a soka zen'an pɔgɔtia la poan te ba soŋɛ en la dela kansaŋehe. Te ba tare kpe'em wo gbegema la ge kureha gana walehe, nyaŋɛ kana lobega la te'elego. 9Ezer n de yia, Obadia boyi', Eliab botan', 10Mismana bonaahe, Yeremia bonuu, 11Atai boyoobe, Eliel boyopɔe, 12Yohanan bonii, Elzabad bowae', 13Yeremia n de pia te Makbanai dɛna pia la boyema. 14Bama n de kpɛ'ɛndoma la nɛŋadoma zaŋa, sɛba dɛna pɛɛntɛɛnreba kɔbega nɛŋadoma, te basɛba me dɛna tuhure nɛŋadoma, 15Saŋkaŋa poan te nɛrebana mea daa nyaŋɛ yake Yordan Kolaa la n yuun pire paahom la, zabɛ sa'ɛ nɛresɛba woo n kɛn'ɛre bɔn'ɔrɔ la poan bɔba la. 16Te Benyamin la Yuda pɛɛntɛɛnreba basɛba me daa lagahɛ keŋɛ David soka zen'an la ha. 17David yehe yele ba yeti, Ya han yɛ'a na la sunma'ahom te ya soŋɛ mam, to wan dɛna boyena. Ge ya han le yɛ'a na te ya koohe mam mɛ, bo n diŋdoma, mam nu'uhen n pon ka tara dɛngerɔ la, to sɔdoma Yenɛ la wan baŋɛ. 18Te Sea la paŋa sige Amasai zuin na, se'em n de pɛɛntɛɛnreba pihitan' nɛŋadaana mea, te a yele yeti, To dela ho nɛreba, David! Sunma'ahom bɔna la hɔ, Yesse dayɔa wa! Yenɛ wan soŋɛ ho la ho soŋoreba la. Te David to'e ba nu'uhe seyi' ge bo ba kpe'eŋo. 19Manase pɛɛntɛɛnreba basɛba me daa doohe David te enŋa n yeti a soŋɛ Pilistidoma te ba zabɛ la Naba Saul. Ge Pilistidoma kpɛ'ɛndoma la daa yele David yeti a bahɛ lebe a Ziklag soka zen'an, daanse'ere a wan ta tuluge zabɛ bo naba Saul. 20En lebe kaŋa poan n bala te Manase pɛɛntɛɛnreba bana doohe en: Adna la Yozabad la Yediael la Mikael la Yozabad la Elihu la Ziletai. Bana dela Manase pɛɛntɛɛnreba tuha nɛŋadoma. 21Ba daa dela panhedoma zaŋa la kansaŋehe, te David dekɛ ba ɛnŋɛ kpɛ'ɛndoma, a pɛɛntɛɛnreba mea poan. 22Beere n yiligere la pɛɛntɛɛnreba la pa'ahe la bala zabera bɔra en, te ba nya daa kɔ'ɔn ga'an yoo. 23Pɛɛntɛɛnreba kanlɛ se'ere n wa'a David zen'an Hebron teŋa poan na, te ba yɛɛ Saul na'am tee bo en la, wo Na'ayenɛ n biŋe a nɔɔrɛ se'em la. 24Yudabiihe dɛna pɛɛntɛɛnreba tuha ayoobe la kɔbehe senii (6800) n zanla ba tɛ'ɛlehe la kana. 25Simeonbiihe dɛna tuha ayopɔe la kɔbega (7100). 26Levibiihe dɛna tuha anaahe la kɔbehe seyoobe (4600). 27Yehoiada n de Aronbiihe nɛŋadaana me kanlɛ tuha atan' la kɔbehe seyopɔe (3700) 28la bodibipaalega kansaŋka Zadok la yiredoma kpɛ'ɛndoma pihiyi' la ayi'. 29Saul yiredoma Benyaminbiihe dɛna tuha atan' (3000) n daa kelom dɔla Saul nya yelege wa'an David na. 30Epraimbiihe dɛna tuha pihiyi' la kɔbehe senii (20,800), pɛɛntɛɛnreba to nɛreba mina ba buuri la. 31Manasebiihe yizuo koyema n loohe nɛreba tuha pia la anii (18,000) te ba lagom wana bobe David na'am. 32Isakarbiihe dɛna nɛŋadoma kɔbehe seyi' (200) la ba sɔɔnrɔ zan'an n tare bɔkerɛ mina saŋsɛka te toonse'ere wan tom. 33Zebulunbiihe dɛna tuha pihinuu (50,000) pɛɛntɛɛnreba n tara zaberɛ lɔkɔ woo la suunre deyena. 34Naptalibiihe n zanle zaba tɛ'ɛlehe la kana dela tuha pihitan' la ayopɔe (37,000) te ba nɛŋadoma ma'an dɛna tuhure (1000). 35Danbiihe dɛna tuha pihiyi' la a nii la kɔbehe seyoobe (28,600). 36Aserbiihe dɛna tuha pihinaahe (40,000). 37Areuben la Gad la Manase yizuo deyema n ze'ele Yordan dapɔya bɔba pɛɛntɛɛnreba dɛna tuha kɔbega la pihiyi' (120,000) n bagɛ ba mɛhe la zaberɛ lɔkɔ woo. 38Pɛɛntɛɛnreba bana wa zan'an daa sakɛ mɛ la ba suunre zan'an te ba lagom keŋɛ ta bobe David naba, te Israel zan'an me sakɛ la sunyenɛ te ba bobe David na'am. 39Bama la David yuun dekɛ la dabeha atan' nyuura ge dita sɛla te ba sɔɔnrɔ la tehɛ na la. 40Sɛla n pa'ahɛ la dela nɛresɛba n daa kɛn'ɛre bilam bɔba la dɛna Isakar la Zebulun la Naptali yizuto. Bama zan'an dekɛ la dia pagelɛ bonhe la yogoma la yiribonhe la lɔlehe i zuto tare na bo ba. Ba tare la zom la mu'uro kɛ'ɛhe wama la tiihe wɔla n ku'e la daam la tiihe kaam la dunhe la sɛla woo kekeko te popeelom kantɛ sɔe Israel zan'an.

will be added

X\