1 Yelebiŋ'a 10

1Pilistidoma daa tɛn' pɛɛma la Israeldoma, te Israeldoma pɛɛntɛɛnreba la zɔ te ba zo'e zo'e ki Gilboa zoore la zuo. 2Te Pilistidoma la tabikɛ Saul la a dayɔɔhe poore, ta daa ko' a dayɔɔhe sena wa Yonatan la Abinadab la Malki Sua. 3Te zaberɛ la ta mɔkɛ Saul te dagereba la dake Saul pɔgɔlom en. 4Saul yele a zaberɛ lɔgɔzanla wa yeti, Foe ho so'a wa lu' ma, ko', te baga kaanbereba wa da ganlom mam. Te lɔgɔzanla la zagahɛ, dabeem zuo, te Saul mɛŋa foe so'a lu' ka zuo. 5Te zaberɛ lɔgɔzala la nyɛ te Saul ki' se'em la, te enŋa me foe a so'a lu' ka zuo ki. 6Saul la a dayɔɔhe setan' la a yire zan'an lagom ki' mɛ. 7Israeldoma sɛba woo n daa kɛn'ɛre bɔn'ɔn wa poan nyɛ' te pɛɛntɛɛnreba la zɔ te Saul la a dayɔɔhe wa kum wa, ba daa zɔ yehe ba teŋhe la poan mɛ. Te Pilistidoma la soe kɛn'ɛra se poan. 8Yiimbeere te Pilistidoma n daa lebe te ba saahɛ kum la, te ba paɛ nyɛ te Saul la a dayɔɔhe wa ki gan'an la Gilboa zoore la zuo. 9Ba yɛɛhɛ en, ge fike a zuo ge vaɛ a zaberɛ lɔgɔrɔ. Ba bo' sɔɔleŋa te la paɛ Pilistidoma zan'an la ba baga la. 10Ba daa dekɛ Saul zaberɛ lɔgɔrɔ la enŋɛ ba baga yire la poan ge dekɛ a zuo la me ta lo yule bagarɛ Dagon yire la poan. 11Yabes Gilead nɛreba n wom Pilistidoma la tom Saul se'em la, 12ba pɛɛntɛɛnreba la lagahɛ keŋɛ ta degehɛ Saul la a dayɔɔhe wa yehe. Ta laɛ ba kɔnba Yabes tikantɛ la teŋa ge kele dabeha ayopɔe zagahɛ ba mɛhe. 13Saul daa ki a tom la be'em Na'ayenɛ nɛŋan la zuo. A zagahɛ Na'ayenɛ nɔɔrɛ, la ge doohe bonbɛ'ɛhe kan'aŋɔ 14zagahɛ Na'ayenɛ dɔlɔga la. Te Na'ayenɛ ko' en ge dekɛ a na'am la bo' Yesse dayɔa David.

will be added

X\