Romanos 9

1Na Cristoinug pasrawa cierton waminchar. Nabe isa waminchimur. Tru nai isub kebachib pasrabiibe Espíritu Santogurri isa gømø, treegwein gúi eshkatan, 2tru nai manrraube truba nu isui basrab chu uraskucha nabe pusrkwai isuin basrabig kui. 3Pøs nai misag israelitasmera, nai nunelø nammisamera, nøm Criston yeeg kaashene, nøm kaigyugurri webamrrai nane Cristoinukkurri tarømisra, Tius trømbøig nebunrrai pasrigu naasiitøweinguen truyu pasrønrrab indamdiig kuimbe, treeg maramdiig køtan. 4Truiløbe Israelweinukkurri amrrub misaamera, nømbe Tiuswei trag ureemera gønrrai kørrømariilø, Tius nui tørguegwalmabigwan kenamarig lata, Tius nømba tru acuerdomera mara kørrømisriilø lata, tru maig maramigwan martrai Moisés pørigwan utig lata, Tiusweiwan marøb tulundzuni yau nun mandø tabig marøb gømigwan eshkaig lata, katø Tius trannrrab kørrømisriilan tranamig lata nømunwei traniilø gøn nømbe. 5Tru merrabsrø kølli misaamera nørreeløbe nømuin gøben, katø Cristo møg lataig misra arriibe tru misaamerayugurri arrig køben, Cristobe, nø Tius chigurrimbunø købigweim bala pasrabig, ¡managurri managatig mayanguen tab indig køn! Treeg kønrrun. 6Pøs Tiuswei wambe treeg kønrrabigwan martrab gaimaig kømøtø gøn. Kaguen Israelweinukkurri amrrub misaamerabe mayambagucha nømbe Tiuswei misaasunelø gømøn. 7Maya Abrahamweinukkurri amrrub misaamera guagucha, mayambagucha nui ureemera gømøn. Treeg kømøtø, Tiusbe Abrahamwan trendaig køn: “Ñuinukkurri karrab misaamerai utu Isaackurri larrøbichib ambubelandø Abrahamweinukkurri amrrub misaamera cha, wamiilø gønrrun” cha. 8Pøs øyeeg chippe, tru Abrahamwei misagugurri amrruitøgatø Tiuswei ureg kønrrab gømøtø, Tius tru trannrrab kørrømisri unø Isaackurri larrøbichib amrrub ureemerabeguende Abrahamweinukkurri amrrub misaamera gúi asiilø gøn. 9Kaguende Tius tru trannrrab kørrømisriibe Abramwan øyeeg taig kuig køn: “Øyan gwalømmerawan na arruben, Sarabe kan nusrkai tøgagønrrun” cha. 10Katø treetø gømøtø, Rebeca ureg tøgagúiløma kan møskaindø tøgarmera gøbig køn, tru merrabsrø namui møskai Isaacwei. 11Inchawei tru pa ureemera tru urastø parchig kal-lanrrabelø kal-lamøwatø, tru ureezheelø tabig marig kawei, kaig marig kawein gøbenbatøwei, Tius nø tru martrab isua tøgagúig pasramisrtraimbe nø lawa wesruigu, trumay gønrrai indig køn, 12kabe chigøben tabig maragurrin gømøtø, Tius tru lawa wesrua wamikkurrin gønrrai. Pøs Tiusbe Rebecane trendaig købig køn: “Tru srøsrø gal-labiibe wendau gal-labigweyasig karuig marøb meganrrabig køn” cha. 13Tru Tiuswei wamwam pørigu maig taimbala: “Jacobwane nabe undaarappe, Esaúwane tsalø indig købig køn” daig. 14Trube, treeg købene, ¿mandø chinrrab? ¿Tiusbe sølgandø tabig marmíig køn, chinrrab gø chindah? ¡Kah! mumaygucha chi treeg kømøn. 15Kaguen Tiusbe Moiséswane trendaig købig køn: “Nan mun lastima ashig køben, truigwan lastima ashib, nan mun tab inchig køben, truigwan tab indamønrrun” cha. 16Inchawei treeg købene, Tius tru lawa wesruig kømibe møg nø treeg kønrrab isuigu gømøwei, kabe møg nuinetø treegwan nebunrrab inchib megawa gømøwein gøn. Treeg kømøtø, Tius lastima asiitøgatø gøn. 17Pøs Tiuswei wamwan pørigube Faraónwanma Tiusbe trenchibig køn: “Øyeeg martrab ñune rey gønrrai kusraig køn cha, ñi øyeeg inchib pasraigu tru nai maramburab mariilan kenamartrappa, katø nai munchiwan pirø muba kuimburab nan mu gúi nebua asig kønrrai martrappa.” 18Inchawei Tiusbe mun lastima ashig køben, truigwan lastima ashib; møigwei manrrøwan gøben murig marøg købene, murig marøb inchibig køn. 19Pøs ñimui utu møibe nane trenchinrraabe: “Trube, treeg købene, ¿katøgucha Tiusbe namune chindimbarre kailø gøn dah? cha. Kaguende ¿nø martrab indigwane mu gúi treeg marmønrrai indiasamørra?” 20¿Ñi, møøbe, mu gurmagu? Tiuswan: “¿Øyeebe mumay margu?” chib wamincha mørtrappe. Kabe kan pirøgøtsøma tru marøbigwan øyeeg chinrrautah: “¿Chindimba nan øyeeg margu?” cha. 21¿Chilliitøga chigøben marøbiima tru chilliitøgatøwei kan gøtsøne tabigutø katørab srua gømig marøppe, katøgan gøtsøne chiyugøben katørab srua gømig nun maig maramdiig køben treeg maramig kømuitarru? 22Inchippa Tiusbe nui namig købigwanba, katø nui maramburab marigwanba kenamartrab inchib weig køppeendi, tru manasrøwei kaigu pønrrønrrab amrrai tamariilø nun yeeg namig kømdø misaameran yeeg tammay awentab. 23Pøs kabe Tiusbe nui tørguegwalmabigu chine nørrø købigwan tru nø lastima asiilan kenamartrab indig køppeendi, manasrøwei nø tamariilan tru tørguegwalmabigweyasig. 24Inchen tru wamiiløbe namgucha guer. Pøs tru nam wamiiløbe, judíosmerai utugurrindø wamiilø gømøtø, judíos kømø misaamerai utugurringucha wamiilø guer. 25Katø Oseaswei pørigu Tiusbe trenchibig køn: “Nai misag søtø gømeelan: 'Nai misaamera gøn' damønrrun cha. Undaaraimíig købigwan: 'Undaaraig' cha, wamamønrrun cha. 26Katø tru: 'Ñimbe nai misaamera gømøn' chib pasrainuutøwei: Ñimbe: 'Øsig Wab Tiuswei nusrkalø gøn' chib, wamiilø gønrrun” daig køn. 27Israelitasmeraimburab Isaíasbe trenchib trasaig købig køn: “Israelweinukkurri amrrub misaamera nu gøptø, maryu kan pisrum lataig købendø, nui misagugurri kan lamø kørrømisrøbiitø kaigyugurri wesrailø gømigwan tøgagønrrun cha, 28kaguende Señorbe yu pirau øyeeg nebuiløgucha warøbash cha, nø trencha pasrigwane petø kanmaytø newanig martrun” chib. 29I wendauigwan trenchimøwatø, mas merrabsrøwei Isaíasbe nøtøwei trendaig købig køn: “Señor, Mayeelaim Bala Pasrabig, tru nam israelitasmeran srøig larrøbichib kurrønrrai kørrømarmuig kuimbe, nambe Sodoma lataitøwei nebuilø gøb, Gomorra lataitøwei kerriguwan pinisailø gøbsrubrainrrun” cha. 30¿Øyeeg købene, trube, nambe mandø chinrrab gøh? Judíos kømø misaamera tru chi kaig kømeelø lataig Tiusba tab pønrramigwan nebunrrab chi tranrrømeeløguen treeg Tiusba tabig pønrramigwan nebuig køn, tru isubigwan Cristoinug pasra tøgagúikkurri. 31Trune israelitasmera Tiusba tab pønrramigwan nebunrrab maig maramigwan martrai pørigu maig taigwan tru gúindø martrab tranrrabeløguen, tru truigwane chincha nebua tøgagønrrab gaimaig købig køn. 32¿Chindimba? Kaguende tru isubigwan Tiusweinug pasra tøgagúigu lamøtø, chigøben tabig mariitøga nebunrrab inchibelø gøn. Incha tru “srurrengwam srugu” srurrengwaig købig køn. Tru sruube Cristo nøm kaasig, truig køn. 33Pøs Tiuswei wamwan pørigube øyah chibig køn: “¡Au! Nabe tru Jerusalén Siónsrø kan srug srurrengwangarubig trarramønrrun cha, kan srug tru misagwan kørrøsrkønrrabig. Inchen nun kørebiibe chi køriimisra gørrømisrmønrrun” cha.

will be added

X\