1 Inchawei møimbe Cristo Jesúsba kanbalatø pønrrabelaimbe møra melønrrai maramibe yandø chigaagøn. 2 Kaguende Espíritu tru martrai karua pasrig øsig kømig Cristo Jesúsweinug pasrabiibe, tru kaig marøbig kønrrai indamba, kwamig kønrrai indamba tru martrai karua pasrig treeg inchibigugurri nane wesruig køn. 3 Kaguende tru maig maramigwan martrai Moisés pøriibe truburab martrab gaimaigwan Tiusbe marig køn, pøs tru pøriibe yandø truburab martrabgaig køben, tru namui trendø kaig kuinaigu truikkurri. Inchen Tiusbe nui trag Nusrkai managuen kaig marmíigwan kan kaig marøb møg kui lataig, kaig mariilaimburø kwanrrai øra, øyamay tru kaig marøb gømig namuinug maringarub pasrabigwane chinchaingaig kørrømara basran, 4 tru maig maramigwan martrai pørigu sølgandø maig marøb gømigwan karuilø namuinug marig kørrømisrtrai, tru namui trendø kaig kuinaigu marøb amønainug kømøtø, tru Espíritu Santo maig kønrrain gøben marøb amøñibelainug. 5 Tru trendø kaig kuinaigu treegwan marøb amøñibeløbe, ka truburabigwandø isuben, trune tru Espíritu Santo maig amøñinrrai inchen treegwan marøb amøñibeløbe, Espíritu Santoimburabigwan isubelø gøn. 6 Inchen tru trendø kaig kuinaigu isub pasraibe Tiuswan tarømisra, kwaig lataig pasraig, treeg køben, trune Espíritu Santo maig kønrrain gøben treegwan isub pasraibe srøig øsig kømiba, Tiusba chi isumgaig tab gømiba, treeg køn. 7 Pøs tru trendø kaig kuinaigu treeg isub tøga basraibe Tiuswan tsalø isub pasran, kaguende Tiuswei tru maig maramigwan martrai karuilan møra martrab inchimøwei, katø truilan martrab gaimabwei indig kua. 8 Incha tru trendø kaig kuinaigu isubig maig karuben treegwan møra marøb amøñibeløbe, Tiuswane tab gúi wanrrai martrab gaiman. 9 Inchen ñimbe tru ñimui trendø kaig kuinaigu isubig maig karuben treegwan møra marøb amøñibelø gømøtø, Espíritu Santo maig amøñinrrain garuben treeg amøñibelø gøn. Treetøgucha Tiuswei Espíritu ñimuinug pasrøbene gønrrun. Pøs møikkøben Cristoi Espíritun chigaibe, Cristoin gømøn. 10 Inchendø Cristo ñimuinug pasraikkurrimbe asrbe kaig mariiløgurri kwamig kuindøgucha, Tius nøba ñimun kaig marmeelø lataig tabig kørrømara pønsraikkurri, ñimui espíritube øsig basran. 11 Inchen Tiuswei Espíritu Jesúswan kwailai utugurri katøle øsiirangarubig ñimuinug pasrøbene, Criston kwailai utugurri tru katøle kusrubiibe ñimui ka pinønrrab asrmerangucha tru nui Espíritu Santo ñimuinug pasrabiitøga øsig kømigwan tranrrun. 12 Inchawei, nai nunelø, nambe uløbe bønrrøbendø, tru trendø kaig kuinaigu tru kaig maramigwan uløgucha bønrrømer, truig maig marøg kuinchen marøb pønrrønrrab, 13 kaguende tru trendø kaig kuinaigu isubig maig karuben treegwan marøb amøñabe, ñimbe kwanrrun Tius malø asamikkaig. Inchendø tru ñim asru kaig marøb tøga bønrraigwan Espíritu Santotøga kwai lataig kønrrai kørrømarabe, ñimbe managatig Tiusba øsig kønrrun. 14 Mayeeløba Tiuswei Espíritu maig amøñinrrain gøben truwan ambubeløbe Tiuswei ureemera gøn. 15 Pøs ñim Espíritu Santon utiibe ke larrø gwaarøsra srua gúilø lataig kørig kuindø katøle treeg melønrrai marøbigwan uta bønrrømøtø, kan trag ureemera lataig kønrrai marøb Espíritu Santon utig køn. Incha nambe nøgurri Tiuswan: “Abba, nai Møskain” chib wamabelø guer. 16 Inchen tru Espíritu Santotøwei namui espíritune eshkabig køn, nambe Tiuswei ureemera gúi. 17 Trube, nam nui ureemera gúig køppe, nø keta tranamig tøgagúigwangucha utønrrabelø guer, Tius tru keta tranamigwan nam utønrrabelø gøb, katø Cristo utigwan namgucha kanguelarrøtø utønrrabelø gøbgue. Pøs ka yandø gømø, cierton nun chine nebuinab megaigwan namgucha chine puraambub meløwabe gøn, nøba kanbalatø tørguegwalmabiisrø purramig kønrraimbe. 18 Pøs møin gwaløm nam chine kaig nebuinab melaibe tru tørguegwalmabig namun kenamarig kønrrabiibabe, ni kan ‘øyeeg køn’ cha waminchibguen wamindamgaig purø nuig køn. 19 Tius chigurrimbunø mara pønsrailøbe truba rruba ashig kui muniirab gøn Tiuswei ureemera tørguegwalmabelø kenamisramigwan. 20 Kaguende tru chigurrimbunø mara pønsrailøbe øyeeg mumayguen tab pumuig pønrramig kønrrain gúig køn, nøm treeg pønrrønrrab indikkurrin gømøtø, Tius nø trendø treeg kønrrai marikkurri. Inchendø treetø gørrømisrtrain gømøtø muniiramigwan tøgaig marig kua, 21 tru chigurrimbunø mara pønsrailøtøweinguen minchib trerab inrrai marigugurri mas treramønrrai wesrailø gønrrun, tru Tiuswei ureemera purø nuig purø tabigu webamba pønrraigu truiløgucha pønsrailø gønrrab. 22 Pøs tru chigurrimbunø mara pønsrailøbe møin gwalømgatig kan ishuumisag unø tammisrtrab truba rruba mullib pusrkwai inchib lataig indi aser. 23 Pøs tru treeg tab gømui pønrrappe, tru chigurrimbunø mara pønsrailø truiløtø gømøtø, Espíritu Santon namun pølbasra tranigwan uta tøgarmera namdøweinguen namui umbu truba rruba mullib pusrkwai inchib lataitøweim bønrrer, Tius tru namun nui trag ureg lataig mariilø gømigwan truba rruba muniirab, tru namui pirau asrmeran kaigyugurri wesruilø gømigwan. 24 Kaguende treeg kønrraitamab isua muniirab melaigu kaigyugurri wesrailø bønrrer. Pøs tru nam muniirab melaigwan nam chab ashaguen bønrraimbe, trube, tru muniirab melamigwane chinchab muniiramubsruinrrun. ¿Kaguen yandø chab ashaguen pønrraigwane chiwan muniiraiasamørra? 25 Inchen nam chi nebua asiimíigwan ke tøgagønrrurmab isua muniirab meløwabe, munig melabiitø munig meler. 26 Katø treetøwei Espíritu Santobe namui kullag kuigu purugubig køn. Pøs nambe Tiusba wamindigu chi wamindam gúinguen mørmuben, Espíritube namuimburø nø purøbasramisra miappe, wamdøgabe ni mandø chibguen miamgailan truba rruba nu israb miabig køn. 27 Inchen Tius namui manrrømeran maig køtashchab umbusrøngue tab ashibiibe, Espíritu Santo nø maig isua basraigwan ashibig køn. Kaguende Espíritube Tius maig kønrrain gøben, trumay Tiuswei misaamerai purøwaminchib miabig køn. 28 Tiuswan undaguelaimbe chitøgucha pub arrubiibe tabguen gønrrai Tiusbe treeg marøbig kui nambe ashibelø guer, tru nø martrab isua tøgagúig truig maig køben trumay treeg wamiilaimbe. 29 Tius tru manasrøwei nø asiilane manasrøwei kanmaytø lawa wesrabgucha wesraig kuig køn, nui Nusrkai maig køben, treeløtøwei misrtrai, Nusrkaimbe truba nørrø nunelø mayeelai utu nømerrig kønrrai. 30 Incha tru manasrøwei kanmaytø treelø gønrrai lawa wesrailane gatø nøbe nui misaamera misrtrai wama, katø tru nø wamiilane chi kaig kømeelø lataig tabig pønrrønrrai mara, tru treeg tabelø gønrrai kørrømariilane nui tørguegwalmabigugucha tøgatø pønrrønrrai marig køn. 31 ¿Trube, iibe øyeeg købene, nambe mandø chinrrab gøh? Tiusbe namuingatø basrøbene ¿namune mugøben søtøbasramisrøb gurringucha, chigúin gønrrautah? 32 Tiusbe nui trag Nusrkawanguen namun tranmønrrab inchimøtø, nam mayeelayasig kwanrraima traniibe, ¿chigurrimbunø tranamburab namun tranamigwangucha tranmønrraitarru, Nusrkaimba guegøtø? 33 ¿Tius nø lawa wesruilane mu gúi ‘øyeeg, øyeeg kaig marøbelø gøn’ chinrrautah? Pøs, chi kaig kømeelø lataig tabig pønsrøbiibe, Tius, nø gøn. 34 Trube, ¿kaigyu pønrrønrrai, mu pønsrønrraitama chindah? Pøs Cristo Jesúsbe mana rreeg martrab gø. Kaguende nøbe kwawa, katø trutø gømøtø, nøbe katøle øsiirawa, Tiuswei kusrmaygatø wan, katø namuyasig purøwaminchib. 35 ¿Cristoi undag købigugurri namune mu gúi tarømartrab gø? ¿Chine isui melamig pub arrubiiteh, kabe chigøben murig pui melamig arrubiiteh, kabe kaig indinab melamig arrubiiteh, kabe mamig kaagøbig parø arrubiiteh, kabe asru kemig chigucha kaagøb arrubiiteh, kabe chigøben kørig kømdiig pub arrubiiteh, kabe kweecha betiilø gømig arrubiiteh? 36 Pøs Tiuswei wamwan pøriguma trenchibig køn: “Nambe ñigurri chu urastøgucha kwaitø, kwaitø meler cha. Namune ubishameran kweetsamsrømay srua ambamig kui lataig mara tøgagúilø guer” cha. 37 Inchendø chigurrimbunø øyeeg pub arrubigu chinchaingaig kanawa webamba bønrrer, tru namun undaarabikkurri. 38 Pøs Tiuswei undag købigwane ni chigucha tarømartrab gaimanrrab gúi nabe asha basrar, kwamig lata, øsig kømig lata, ángelesmera lata, nøm asha garub pønrrabelø lata, møin gwalømig lata, katø wendø attrabig lata, katø maramburab marøb pønrrabelø lata, 39 purø balasriig lata, purø umbusriig lata, chigurrimbunø Tius mara pønsrailøyu købeløbe møikkucha namune chinchagucha tarømartrab gaimanrrun tru Tiuswei undag købig namui Señor Cristo Jesúsweinug pasrabigugurrimbe.
