Colosenses 1

1Tius trendø treeg kønrrain gøben na Pablo Jesucristo nøashib karua ørig nai nuneg Timoteoba misra, i kilgawan pørar, 2ñim Tiuswei misaamera chu uragucha tarømisrmø melab nunelø Cristo Jesúsba kanbalatø pønrrabelø Colosassrø warabelan. Namui Møskai Tiuswei ka yandø tab indiiba, chi isumgaig tab gøbiiba ñimba gønrrai inchar. 3Chu uraskucha nambe ñimuyasig Tiusba waminchippe, nun ‘ungwa, ungwa’ chibelø guer Señor Jesucristoi Møskawan. 4Kaguende ñim ñimui isubigwan Cristo Jesúsweinug pasra tøgagúigwanba, katø Tiuswei misaameran mayamba ñimbe truba undaguelø gúigwanba wammører, 5tru ñimuyasig srømbalasrø esegaig pasrabigwan ñim muniirabelø gúikkurri treeg kuigwan. Truigwane Tiuswei tabig srø wam newan ciertonigwan waminchen, ñimbe mørig købig køn, 6tru ñimuisrø kebiben. Inchawei yu pirau chutøgucha tru tabig srø wambe truba rruba nurab, kan yell larrøbichib ib lataitøwei, ñimui utugucha treetøwei larrøbichib arrun, tru ñim Tiuswei wamwan mørøb, katø Tiuswei tru ka yandø tab indigwan maig kuigwan ñim tab chigúi mørøb indin gwalømgurrimbunø. 7Epafras maig kusrenanig køben, trunun ñim kusreeg køn. Truibe namui undaaraig, tru marameløyu namba lincha marøb megabig, Cristoiwan maizhikken elachimø, ñimuyasig tab gønrrai marøb megabig køn. 8Katø, Espíritu Santogurri ñim undag købig tøgagúigwan nøgucha namun eshkatan. 9Incha treekkurri namgucha trunun wammørin gwalømgurrimbunø chu urastøgucha ñimuyasig elachimø, Tiusba waminchib miabelø guer, Tius tru nø maig martrai palai waigwan ñim nebua asambørab nebua ashibelø gønrrai Tiusweimburabigu, newan nebua asamig kusreitøgaba, katø tab chigúi møriitøgaba. 10Amøñippe, Señorweyelø gúi asamdeelø amøñinrrai miabelø guer, chiyutøgucha nø tab gúi mørøb wamig kønrrai marøbelø, ñimui chigøben tabig mariiløbe, yell larrøbichib ib, katø Tiusweimburabigwan nebua asamigu nørrørab ambamig kønrrai. 11Nui mayanguen tabig maramburab marig kerrigu maya tøgagúig, truitøga kullaaramø, ka melamig kønrrai martrai miabelø guer, maig pub arrindøgucha mur isua melaptø melamigweyasiiba, maig indindøgucha tammay melabig melamigweyasiiba. 12Tius Møskawan ‘maya nuguen kasraatø ungwa’ tay, tru nø ashib karub waisrø tørguegwalmabnug nui misaamera ketig utamigwan ñim tøgatø utønrrabelø gønrrai tamara pønsraigwan. 13Kaguende nugwaimandzig løstiigu nø garub pasrabigugurri Tiusbe wesrawa, namune nui undaaraig Nusrkai nø ashib karub waisrø purøørig køn. 14Nø nuielø gønrrai nambe kaigyugurri wesrailø guer, namui kaig mariilan yandø pesannab chi ulø bayimeelø. 15Tius, tru namui kaptøgabe asiimíigwan øyeeg kuitamab asamig, Cristobe truig køn, chigurrimbunø pønrrabigwan marmøwatøsrøwei tru srøsrø nømerrig pasrabig. 16Kaguende Tiusbe Nusrkaingurri mara pønsraig køn tru srømbalasrø chi købigwan lata, pirau chi købigwan lata, kaptøga asigwan lata, asiimíigwan lata, reymera purramisra karub purraigwan lata, kerriguwan nøm merrarrawa garuigwan lata, katø nøm asha garuigwan lata, katø mugucha manchinrraingaig karuigwan lata, kerriguba nøgurri mara pønsraig køn, trurrigu nuyasig kønrrai. 17Nøbe chiwangucha marig kaabenbatøsrøwei manawei købig kua, chigurrimbunø pønrrabiibe pinømø, nøgurri pønrrabig pønrran. 18Inchagucha nøbe asrwei tru tur gøn, tru iglesiai. Nusrkaimbe manawei nømerrig købig, kwailai utugurri katø nømerrig øsiiraig køn, chiyutøgucha nø purab nuig kømig kønrrai. 19Kaguende Møskawane mayanguen tabig asønaig køn, nø maya nu kømburab kuigwan Nusrkaweinug pasrønrrai pasramig. 20Incha nui Nusrkaingurri Tiusbe pirau chigurrimbunø købigwan lata, srømbalasrø chi købigwan lata katøle nøba katø tab gørrømisrtrai martrab isuig køn, nui Nusrkai kurusyu kwawa ani lusiitøga ambugurri igurri tab gønrrai marøb. 21Pøs ñimbe merrabsrømbe Tiusweinukkurrimbe nøørø bønrrabelø tarømisrar, ñimui isubigwane ke kaig marameløyugøba pasra tøgar gua, Tiuswane ashig kømui inchibelø gøbig køn. 22Treeg købig kuigwan møimbe gatøle ñim nøba tab gørrømisrtrai kørrømarig køn, Nusrkai nui asru kwaitøga nui merrab tabigweindø tarømariilø, kaig mariitøga chillig incha gømeelø, ñimbe øyeeg køn dainanrrabgailø pønrramig kønrrai martrab. 23Pøs øyeeg kønrraimbe, tru isubigwan ñim Cristoinuutø pasra tøgagúigu truyutø pønrrabig pønrrab, katø mumaygucha kørrønrrabgailø tru Tiuswei tabig srø wamwan ñim mørigu tru munig melaig pasrabigugurri tarømisrmø, melabig meløwabe gønrrun. Tru srø wamwane yu pirau maya misaameran mundøgucha eshkab kusrenanig køn. Inchen na Pablobe tru wamwan waminchib meganrrai pasrig kur. 24Na ñimuimburab chine kaig nebuinab megaigwan møimbe nane kasrag køtan, Cristo nui asr, tru iglesiayasig chine kaig nebuinab megaigu tru palabigwan nai asrutøwei kaig indinab megaitøga nemarøb ya. 25Nabe tru mayeelø nun kørebelayasig tru chiwandøgucha marøb meganrrai wesrawa pasrig kur, ñimuimburab tab gønrrai Tius nø garuig, nui wamwan maig kuigwan newan waminchib pasrønrrai, 26tru manasrøngurri maya misagwan mungucha Tius kenamariimíig tøgagúigwan. Inchendø truigwane møi yasrømbe nui misaameran kenamaran. 27Tru judíos kømø misaamerai utu tru mungucha kenamariimíig tøgagúigu tru tørguegwalmabigwei chigurrimbunø palømíig pønrrabigwan Tiusbe nømune asingarunrrab isuig kuig køn. Truibe Cristo yandø ñimuinug pasraig, truig køn, ñim munig melaig tørguegwalmabig. 28Nambe tru Criston eshkab kusrenanøbelø guer, mundøgucha øyamay melønrrigay chib, kusrenanøb, maig kuigwan tab chigúi mørague, mu misaamerandøgucha Cristo Jesúsweinug newan tabig pønrrønrrai Tiuswan kenamartrab. 29Treeg kønrraiwei na maya nebumburab truba rruba mur tranrrab marøb megar, Cristoi maramburab marig tru nainug marøb pasrabiitøga.

will be added

X\