Los Hechos 19

1Apolos Corinto tsumne, Pablobe tru birauwandøwei pureb ya, Efesosrø kørraarrua, kan møiløgøsrøn Jesucristoi kusrenanigwan marøb melabelan wetørrabig køn. 2Inchabe trencha payibig køn: —¿Ñimbe Criston køreb uras Espíritu Santon utøgueh?— cha. Inchene nømbe: —Espíritu Santo købig kuin gúi nambe wammørøbguen wammørmeelø guer— cha trenchibelø gøn. 3Inchene Pablobe trenchibig køn: —Trube, ñimun tru piu umbu ulsraibe ¿chi gøn chibigwan utig køh?— cha. Inchene nømbe trenchibelø gøn —Nambe Juanwei piu umbu ulsraigwandø utig køn— cha. 4Inchen Pablobe trenchibig køn: —Juanbe nøm mas kaig marmønrrab isua møra, Tiusweimay llirain gønmab asamig piu umbu nømun ulsrailø gúig køn cha, tru nui wendau attrabig Jesúswan nø gúitamab isua, misaamerabe nun køreinrrain— chib. 5Inchen misaamerabe øyeegwan mørabe, Señor Jesúswei munchiyu piu umbu ulsrailø gøbelø gøn. 6Incha Pablo tasigwan nømuim bala estsarene, nømuim balabe Espíritu Santo kørraarruben, møriimø wammera waminchib menda, Tius maig karuigwan nømbe waminchibelø gøn. 7Truiløbe kerrigube møguelø doceburab gøbig køn. 8Incha Pablobe pøn bøl ørøba judíosmera tulundzuni yau nøbe chigucha kørmø kusrenanøb ‘øyeeg kømøn’ chib, ‘øyamay gøn’ chib waminchibig køn, maig kuigwan nebua asamne inchib Tius nø ashib karub pasraigweimburab. 9Inchen kan utueløbe nømui manrrømeran mur marøb, trunun treeg kømuitamab isub kaashib, maya misagwei merrab trømbøig wamabelø gøn tru srø maywan. Inchen Pablobe nømun tarømisra, tru Jesucristoi kusrenanigwan marøb melabelan nøørø pera ya, kan Tirano taigwei kusrenani yau kwalømmørig ‘iibe øyamay gøn’ chib eshkab waminchibig køn. 10Treetø pa bila ørøba maren, trugurri Asia birau warab misaamerabe mayeeløba, judíosmera lata, griegosmera lata Señorwei wamwan mørøbelø gøn. 11Incha Tiusbe Pabloi tasikkurri maramburab mariilø purø nørreelø marøbig køn. 12Pabloi pañelumeran gatø chigøben marøb pasramisrtrab pala itøgueelø nui asr kebatiilan, truilanbaguen kwanrreelaim bala wartrab srua amben, treetøgatø nømui kwanrrømerabe chab tammisriilø gørrømisren, kwaimandziimerabe nømuinukkurri webamben inchibelø gøn. 13Inchen mø judíosmera gøsrøn kwaimandziimeran tru misaamerainukkurri webusrøb truørø, truørø amøñibeløgucha tru treeg maramig Señor Jesúswei munchitøga mara ashchab inchibelø gøn, tru kwaimandziimeran trenchib: —¡Tru Pablo eshkab kusrenanig Jesúswei munchiyu, nabe webambay tamønrrun!— chib. 14Inchen tru iigwan marøbeløbe kan judío Esceva taig, tru sacerdotesmeran karubigwei nusrkalø siete gøbig køn. 15Inchendø nøm treeg maren, tru kwaimandziibe nømune trencha løtabig køn: —Jesúswane mu gúi ashib, katø Pablongucha mu gúi ashib inchibig kur cha. ¿Inchen ñimbe mumera guermah?— cha. 16Inchen tru kwaimandziitøga møøbe nømuim bala itøbørsrawa, nømune mayeelanba kamaren, ¡gatø! nømbe tru yaugurri kegøsaateelø kørriindiilø chab luløbelø gøn. 17Inchen tru øyeeg purayaigwane tru Efeso warab misaamera mayeeløba wammørig kørrømisrøbig køn, judíosmera lata, griegosmera lata. Inchen mayeeløba truba rruba køriimatøben, Señor Jesúswei munchibe masken, masken wammørig kørrømisrøb ibig køn. 18Inchen møiløgøben truba yamelø Criston kørebeløbe øyeeg maramgailanrre marøbelø guer chib mayeelai merrab eshkab amrrubelø gøn. 19Inchen tru kaig libron kusrewa, kwaimandzigweimburabelan marøbeløbe truba yamelø truiløgucha treetøwei tru nømui kaig libromeran srua amrrua, mayeelai merrab chab parrøbelø gøn. Inchen tru libro beni anmeran mayan gøtashchab ashene, cincuenta mil gøbig køn. 20Incha øyamay Señorwei wambe larrøbichib nurab, mu chindamgaig kørrømisrøb ibig køn. 21Inchen øyeelø chab puraiben, Pablobe Macedonia birauwan gøben, Acaya birauwan gøben llirab yabe, nuinetø Jerusalénsrømay inrrab isua, trenchibig køn: “Jerusalénsrømay yabe, Romasrømaygucha yamig tab punrrautan” cha. 22Incha Macedoniamaybe nui pagatø purugubelan Timoteowanba, Erastonba øra, nøbe Asia birau gatø kan maya yana gøsrøn kørrømisrøbig køn. 23Tru gwalømmerawan tru srø mayweimburappe truba namig waminchib kurrabelø gøn. 24Kaguende kan møg, Demetrio taig, andøga chigøben marøbiibe, tiusa Dianai ya-ureemera andøga mariilø tabzheelø marøbig kua, tru gatøganelø treeløwei marøbelane tru yaniiløtøga purø gørrø anmera maringarubig købig køn. 25Incha tru treeg marøbelanba, katøganelø treeg lataitøwei marøbelanba tulundzuna, Demetriobe trenchibig køn: —¡Ñim mayeelø! nam puarmera misrøb ambamibe øyeeg mariiløyugurri an arrubig kui ñimbe ashibelø gøn cha. 26Katø ñimbe ashib, mørøb indiinrrun cha, Efesotø gømøtø, Asia birau kerrigu lutau Pablobe: “Møguelø taska mariiløbe tiusmera gømøn” chib, ke treeg kuitamab isumne inchib wamincha, misagwan truba nørrø tarømarin gøn cha. 27Kan nam iitøga yeeg yanøb an marøb gúibe øyeeg inchene, chi tabig kømui ashib kaashib guebamben nambe kegørramsun gøn cha. Katø trutø gønrrab gúindø, tru purø nu tiusa Dianai tab yagucha, chigucha gømíig lataig kørrømisrøb iben, Diana, tru purø nuig, purø tabiibe petø pinab inrrun chibig køn, Asia birau mayamba, yu pirau katø maya misaameraba, nun køriibala tabig waminchib tøgagúig.— 28Inchen øyeeg wamindiilan mørabe, purø rrømbøig nama, trenchib trashibelø gøn: —¡Efesosmerai Dianabe purø nuig køn!— chib. 29Inchen tru ciudayu maya misaabe ke chindinguen asamgaig inchib mendappe, misaabe ke kanbalatø amba, Pabloi linchibelø Macedoniasrø møguelan, Gayonba, Aristarconba kemøra, ¡gatø! paluunchib waram srua ambubelø gøn, tru chigøben waminchab misag tulundzuniisrømay. 30Inchen Pablobe truyu misagwan waminchab kebinrrab inchen, Jesucristoi kusrenanigwan marøb melabeløbe kebibashmeelø gøn. 31Katø møiløgøsrøn Asia birau misaameran ashib karub purrabelø Pabloi trendø asiilø chigucha, nuimay ørøbelø gøn: “Tru chigøben waminchab tulundzuniisrømbe tiusmanda kebimønrrig” cha eshkanrrai. 32Inchen misaamera truyu tulundzuna basrabiibe ke chindinguen asamgaig inchib gúig køppe, kaneløbe peg chib rrashiben, katøganeløbe katø peg chib rrashiben, tru mayeelø lutau tøbø pasrabiibe chinchab tulundzunin gúinguen mørmøwa gøbig køn. 33Inchen tru nu misag basrabigwei utuelø møiløgøsrøn Alejandron webingarumdiig køn chib eshkaben, judíosmerabe maya misaamerai merrabsrøngatig purainrrai trawaguchen, Alejandrobe maya misagwei merrab maig kuigwan eshkab waminchab, ‘niløtø guy’ cha, tasig kusrubig køn. 34Inchendø judío gúi wetøgørrappe, katøle søtøbah, søtøbah rrashibelø gøn, kan pa ura burab trenchib: —¡Efesosmerai Dianabe purø nuig køn!— chib. 35Inchen tru ciudayu tru chigurrimbunø mariilanba, maramelanba kilga børøb wabiibe misagwan yandø mas trashimumne inchib megaptø, yandø wasrørangaruabe trenchibig køn: —Efeso misaamera, tru purø nuig tiusa Dianai tab yawanba, katø tru nø lataigwei srømbalasrøngurri peñibigwanba, yamba i Efeso ciudabe truilan chi kømønrrai ashib pasrabig kui ¿kan mube wammørmíig kønrraitamabelø gø chindah? cha. 36Inchawei treeg kømubendø chib kan mugucha isan damgaig købene, ñimbe yandø wasrøramdiig køn chibig køn, chiwandøgucha ke kan chinchaptø inchib marmøtø. 37Kaguende i møguelø ñim srua amrruiløbe namui tiusmerai tab yamerayugurri nilab wesrub gømøwei, namui tiusan purø rrømbøig chi wamab pønrrømøwei indan cha. 38Inchawei Demetrioba, katø tru nøba treetøwei marøb pønrrabeløba muba gøben aleguiyaig tøgaguabe, truweiwei maig kuigwan nøm asha martrai truyu purøøra bønsramelø bønrrab, katø maig kønrrabigwan asha marøbelø purrab indan cha. Møitøgucha truyube kangurrin gangurri ñimun maig punrrabigwan treeg asha martra tay, chibig køn. 39Inchen ñim gatøgan peg wamindamig tøgaguabe, trube, treegwan waminchab tulaamba, trunun purramisra asamig balønrrun cha. 40Kaguende møi øyeeg puigwane namune ka kailø gøptørre, øyeeg martrab gurrig kui inchaptiikken gøn cha, kan chigurri nambe øyeeg inchib gurrig køn cha eshkab pønrramig chigaabendøbe.— 41Incha nøbe øyeeg taitøga misag tru tulya basrabigwane chab tarømarøbig køn.

will be added

X\