Los Hechos 18

1Inchen treeg puraiben, Atenaskurri Pablobe Corinto ciudasrømay webibig køn. 2Incha trusrømbe kan judío Aquilas taig Ponto birausriigwan wetørrabig køn, tru Aquilasba, nui srai Priscilababe Italiagurri Corinto ke srø buatø warøben. Kaguende tru Roma maya misagweim bala ashib karub wabig Claudiobe treeg karuin gøbig køn, judíosmerabe mayamba Romagurri webusriilø gønrraingue. Incha Pablobe truilaimay ibig køn. 3Inchen Aquilasba, Priscilababe Pablo nø marigwandøwei tru carpas ya-ureg marøb tsushibelø gøbene, nømba kørrømisra tru marøb warabelø gøn. Pøs nøbe carpas ya-ureg marøb tsushibiitøwein gøbig kua. 4Incha judíosmera tulundzuni yau isrin gwalømmørig Pablobe øyeeg køn chib, øyamay gøn chib waminchibig køn, judíosmeran, griegosmeran maig kuigwan nebua asøskønrrab inchib. 5Inchen Silasba, Timoteoba Macedoniagurri pubene, Pablobe Jesúsweimburab eshkab kusrenanamigutø kebya basramisrøbig køn, tru judíosmeran: “Jesúsbe tru ñim muniirab gúig tru Cristo gøn” cha eshkab. 6Inchen judíosmerabe mørøg kømub chi treeg kømubendø indan chib namig kurra, nun tsalø wamøben, Pablobe nui kewagúilan pabørrgøb trenchibig køn: —¡Ñimui animbe ñimuim balatøwei peñchai møimbe ñimdøwei lawa pønrramisran! cha, ¡Yandø møimbe tru animbe naim bala attraingaig chishig webya basrar! cha. Møingurrimbunøbe judíos kømø misaameraisrømay yamønrrun— chibig køn. 7Incha truyugurri webya, kan møg Tito Justo taigwei yamay ibig køn. Truibe Tiuswan køriibala tabig waminchibig købig køn. Inchen nui yabe tru judíosmera tulundzuni ya mendatøweim basrabig køn. 8Inchen tru judíosmera tulundzuni yau ashib pera basrabig, Crispobe, nui yaueløba kerrigu Señorwan køreben, møiløgøben truba yamelø corintosreeløgucha Pablo wamindigwan mørøbeløbe Criston kørewa, piu umbu ulsrailø gúig køn. 9Inchen Señorbe Pablon yem kan piab lataigu trenchibig køn: —Kørig kui inchimøta cha; waminchibig waminchi cha; ka gøbashiptinchimøtø. 10Kaguende nabe ñiba basrar cha, ñune mugucha kaig martrab kebatchab gaimanrrun cha. Kaguende i ciudayube nabe misag truba nu tøga basrar— cha. 11Inchen Pablobe Corintosrø pila y tøbø bila kørrømisrøbig køn, Tiuswei wamwan kusrenanøb. 12Galión Acaya birau maya misagwan ashib karubig køb uras judíosmerabe søteeløba ke kandø isua bønrramisra, Pablon ashig kømub namig kurra, tru maig maramigwan asha marøb purrainuumay srua ambubelø gøn, 13trenchib: —Tiuswan køriibala tabig wamindamig tru maig maramigwan martrai Moisés pørig maringaruimay gømøtø, nøbe misaameran ke peemay maramne inchib unan— chib. 14Inchen Pablobe ke waminchabguen inchen, Galiónbe judíosmeran trenchibig køn: —¡Au, ñim judíosmera! Kan chigøben truba nu galø marig kui, kabe purø rrømbøig marig treeg chigúimbe, trube na ñimun treegwan mørøb wabsrubrainrrun cha. 15Inchendø iibe chi treeg kømøtø, ka wamindiilanbah, katø tru munchimera chabah, tru ñimui maig maramigwan martrai pøra wariilø chabatørre inchib gúig købene, uyube ñim asay cha, øyeegwane nabe asha rranrrabgucha wamur— chibig køn. 16Incha tru maig maramigwan asha marøb purrainukkurri wambig weguchibelø gøn. 17Inchen mayeelømisra judíosmera tulundzuni yau ashib pera basrabig Sósteneswan kemøra, tru maig maramigwan asha marøb purraig merrab truba kurraguchibelø gøn. Inchen Galiónbe trunune chigucha isua ashmø, chinchibgucha warøbashmab ashibig køn. 18Inchen gøben Pablobe katøgucha truyu yam gwaløm kørrømisra, nunelan yandø ‘ungwa’ chibig køn. Incha yandø Siria birausrømay barcoyu iben, Priscilaba, Aquilasba nøba ambubelø gøn. Incha Cencreasrømbe Pablobe pusrugwan chishchig parøbig køn, Tiuswan ‘nø maig martrab cha kørrømisrigwan treeg maramønrrun’ chib. 19Incha Efeso ciudasrø puabe, Priscilanba, Aquilaswanba tarømisra, judíosmera tulundzuni yau kebya, judíosmeraba maig kuitashchab payiyab waminchibig køn. 20Inchen nømbe katøguchi nømba truyu kørrømisrtrai tiusmanda chib gúingucha, nøbe kørrømisrmøtø, 21nøbe yandø: —Ka inrrab inchar cha ‘ungwa’ chabe, trenchibig køn: Tius nan gatø yusrømay attrain gøbene, katø arrumønrrun— cha. Incha barcoyu nebya, Efesogurri ibig køn. 22Incha Cesarea ciudasrø puabe, tru iglesian ‘ka warøgueh’ chinrrab nebya, trugurrimbe Antioquíamay kørraarrubig køn. 23Incha truyu kan maya yana gøsrøn tsuabe, Galacia birauba, Frigia birauba, trusrø lutøgurri llirab inrrab webibig køn, mayeeløba tru Jesucristoi kusrenanigwan marøb melabelan kullaaramø, mur bønrrønrrai purugub waminchib. 24Inchen tru uras kan judío alejandríasriig, Apolos taig, purø may waminchib møg Tiuswei wam pørigwangucha treetøwei purø nu nebua ashibig, Efeso pubig køn. 25Nøbe Señorwei maywan muba amønamigwan kusrenanigwan kusreweig kua, nøbe ¡gatø! treegwan martrab isua marøb, Jesúsweimburab waminchib kusrennøppe, maig kuigwan treeg kusrenanøbig køn. Juan tru misaameran piu umbu ulsrailø gømig kusrennigwandø nebua ashibig kuagucha. 26Incha Apolosbe judíosmera tulundzuni yau mungucha kørmø waminchib kusrennøb pølbasren, Priscilaba, Aquilasba tru wamindigwan mørabe, Apoloswane nøørø pera amba, Tiuswei maywan gatøguchinguen tab nebua asingarub maig kuigwan eshkabelø gøn. 27Inchen Apolos Acaya birausrømay inrrab inchen, nuneløbe masken ka martrai inchib, trusrø tru Jesucristoi kusrenanigwan marøb melabelan kan kilga pørøbelø gøn, Apoloswan nøm tabig wamab utønrrai. Inchen nøbe Acayasrø puben, Tius tru nø ka yandø tab indiitøgatø Tiuswan kørebelayasiibe kan maya nuguen tab gøbig køn. 28Kaguende judíosmera tru nøm ‘treeg kømøn’ chib amrruigwane mayeelai merrab Apolosbe mu mandamgaig ‘treeg køn’ chib waminchibig køn. Tiuswei wamwan pørigu treeg chibig køn cha eshkab: “Jesúsbe tru Cristo ñim muniirab gúig, truig køn” chib.

will be added

X\