2 Timoteo 2

1Ñi nai nusrkai lataibe, tru ka yandø tab indig Cristo Jesúsweinug pasrabigu mur isua basrau. 2Truba yamelai malau na waminchen, ñui kalutøga ñi mørig købigwane katøganelan chi isumgaig martraptø møguelan martrai karua bønsrø, nømgurringucha gatøganelan kusrenanrrapteelan. 3Chine isuig megamig pub arrubigu, ñibe namba treegu pureb meganrrab isu, Cristo Jesúswei kan purø tab suldau lataig. 4Kan suldauma chi maramelan marøb meganrrab, truyu kebyaikkurrimbe, katøgan nøørø peg marameløyube kebya megamøn, nun suldau gønrrai pasrøbigwan purø tab gúi mørtrai martrab. 5Katø møig kanab luldashchab kan luløbig chigucha lulrrab pasramisra, luløbelø chitø maramig køben treegwan marmøwabe, tru lulimburø coronan utønrrab gaimanrrun. 6Katø kan kwallibig chigucha pøsra, bøsra gwallabe, ellmarig misrøbigwane nømerrig tulishinrrabigwein gøn. 7Inchawei iig na ñun trendailane ñiguen chi chibig kuitashchab tab isu, pøs Señorbe chiwandøgucha ñi tab chigúi møramigwan tranrrun. 8Jesucristo rey Davidwei misagugurri arrubiibe kwawa, kwailai utugurri gatøle kurrigwan ñibe pesannamø isuagu, tru Tiuswei tabig srø wamwan na maig eshkab kusrenanig, treegwan. 9Inchawei tru wamgurri chinetø kaig nebuinab, kailan keeri yau pasramig nebutan, kan larrø gaig lataikke. Inchendø Tiuswei wambe merrarraig kømøtø basran. 10Inchawei treekkurri chinetø kaig nebub arrubigwan treegwan kerrigu ka pureb megar, Tius nø lawa wesrailayasig tab gønrrai isua, tru kaigyugurri wesrailø gømig Cristo Jesúsweinug pasrabigwanba, tru managuen patsønrrabgaig tørguegwalmabigwanba nømgucha nebua tøgagønrrai. 11Iig trendaibe chi isumgaig, isig kømøtø gøn: Nam nøba kwawabe, katø nøba øsig purramig kønrrun. 12Maya kaig nebub arringucha, melabig meløwabe, katø nø ashib karub waisrøn chigucha nøba ashib karub purramig kønrrun. Nam nun ‘ashmeelø guer’ chibene, namungucha nøbe ‘ashmíig kur’ chinrrun. 13Nambe nøba maig pønrramigwan treeg pønrrømuingucha, nøbe namba maig pasrabiibe chu uragucha treetø pasrabig køn, kaguende nøbe maig køppe, managucha treetø gua. 14Iilane pesannamønrrai isunanøppatø, isunanøppatø meganrrig, ‘øyeeg martrigay’ chib Tiuswei merrab karua basrøb, ke kan chi wamindamgaigwan treetøgatø ke larrøbitsamburab larrøbichib, ambugurri igurri aleguiyab gømønrrai. Treeg mariibe chi tabig purugumøtø, tru wamindigwan mørøbelane ka trømbøig mindishatø kørrømarøbig køn. 15Ñibe ñuimburappe Tiuswei merrab søl marøbig kui asig basrønrrab, purø tab asha isuptø marøb meganrrig. Chi maramigwan marøb pasrabig, chiyugucha køriimisra basrønrrabgaig tru wam newan ciertonigwane, maig kønrrabigwan sølgandø gusrenanøb pasrabig treeg kønrrab. 16Tiuswane chigucha gømíig marøb wamindiilanba, ke ka wamincha møriilanba, treegwan martrab gømø isua basrønrrig. Kaguen treeg waminchibeløbe nømui kaig mariiløyu mas kegørrab ambubelø gøn. 17Inchen nømui treeg wamindiiløbe kan pill-llab pisrø asrwan trerangarub larrøbichib ib lataitøwei martrun. Treeg marøb pønrrabelai utube Himeneoba, Filetoba gøn. 18Pøs truiløma tru newan ciertonigugurri pella tarømisra, tru kwailø øsiiranrrun daibe yandø chab øsiirabguen indin gøn chib, trumay waminchib guebamba, møilanma tru nømui isubigwan Jesucristoinug pasra tøga melaigwane yandø mumaygucha gømuielø melønrrai mindisha kørrømarøb guebambin gøn. 19Inchendø treeg kuingucha, Tius purø may tamara pølbasra pasriibe muguen kønøgamgaig basran. Truyube øyeeg chibig pørig tøgaig: “Señorbe møiløtø nuielø gúigwan ashibig køn” chibiiba; katø: “Møitøgucha ‘Señorwei munchiyu uñibig kur’ chib waminchibiibe kaig marigugurri tarømisramig køn” chibiiba. 20Kan nu yauma pasumera, køtsømera pønrrappe, orotøga mariiløtø bønrrømøwei, andøga mariiløtø pønrrømøwei indan. Treeg kømøtø, tsiitøga mariilø gøben, pirøtøga mariilø gøben bønrran. Møiløbe purø tabig marøbyutø katørab srua gømig køben, møiløbe ka chi marøbyu gøben katørab srua gømelø gøn. 21Inchawei møikkøben øyeeg kaig mariiløyugurri chish misrabe, purø tabig maramigweyasig kan pasun lataig tøgagømig kønrrun, tabigweyasiitø tarømarig, chiyutøgucha Señorweimbe tabig martrabig, chigøben tabig maramigweyasiibe kaima basrønrrabgaikke. 22Matsørelø chinetø kaig marøg kui indiiløyugurrimbe ñibe tarømisr. Incha tru sølgandø tabigwanba, isubigwan Cristoinuutø pasra tøgagømigwanba, undag købigwanba, ambugurri igurri tab unamigwanba ñibe tøga uñ, tru nømui manrrømeran chishchiitøga Señorwan ‘purugurra’ chib wamab tabig waminchibeløba kanbalatø. 23Ke chi wamindamgailan aleguiyam lailøyugurrimba, chugúinguen mørmubendø chinetø cha møriiløyugurrimba tarømisr. Kaguende treeg indiibe ka kwayab gømigweyasiitø marig kørrømisrøbig kui ñibe ashibig køn. 24Kaguende Señorweiwan marøb megabiibe kwayam laptiig kømøtø, masken mayeelan larrø tab inchibig, trurrigu may gusrenanøbig, chigøben pusrkwanrraptiig taingucha namig mørmíig kømig køn. 25Katø mørøg kømub chinetø cha mørøbelane, møi møi tsag wamømøtø, tammaytø sølwan isunrrai purugumig køn. Nømui kaig mariilan isua møra, Tiusweimay lliramigwan inchippa Tius tranøbgunmab isua, tru newan ciertonigwan nøm tab chigúi mørtrai. 26Incha gatøle tab isua møra, tru nugwaimandzig chinetø mara pønsra nømun kegørrøsrka, nø maig martrain gøben, treeg marøb melønrrai merrarrawa tøgagúigugurri wegørrønrrai.

will be added

X\