ከደ ሮማ 9

1ከመገሸርሥ ኸማ ከመዳለም አል ክርስቶስ፥ ከምለጎዘራኼ። ከምዳ እለምኳ ኸገሻ ካራ ከንዶጎ መዪዥሥ ገፉጫ። 2በኢካ ኒለም በቦቆ ገሳንዛ ከማፉንጮቋ ኤተ በበፀካ መራይል። 3ከፄ ኢዴበም፥ መከላለምኳ ከፄ ሾካለም፥ በርምሄከሽ ኤበርምድ ማሆተማ፥ ቢልማሰ ከክርስቶስኳ። 4እማም ዶጎ እስራኤል። ረባ ቤጦ እማም ከኢደማ፥ ቤከትገሥ ገሂንለማ። ማገሲለማ፥ ማቶቋ፥ ቾጎ ገዴራ፥ በበኽ ማጦዪላኳ ቤከኽ አረባ ከማም። 5እምበበማም ሾከ እምበቦቆ ጸጋ፥ ክርስቶስኳ ከበጫ ሾካለማም። ነድ መገ ላ ካል ግዢ ግዥ ከረባ ኤተ በሙቸኮቆ ነኮዎማ። ኣሜን። 6መከላለም አለአ፥ በሃለከሽ እገሸ ረባ መትታቋኼ። ደ በደካ ከበጫ ሾከ እስራኤል፥ ኮዎማም ኸገሸ ዶጎ እስራኤልኼ። 7ኤያሥ ኤያኳ፥ ደ በደካ ሾከ ኣብራሃም፥ ኮዎማም ኸገሸ ኢደ ኣብራሃምኼ። ከፄ በከለካ አረባ ከኣብራሃም፥ "ኣሥ ኢደ እስያቅ ከምከሉዋ ሾከኡ።" 8ካ፥ ደ ቢንዘካኽ ከሾከ ኣብራሃም፥ ኣሥ ኢደ ሰ ማጦዪላ፤ ደ ቢፖቆካ ኤማሄሸ በጫኸን ኢደ ረባኼ። 9ሰ ማጦዪላ አለአ ኤተ በከለካ፥ "ከግዣ ናሥ አንጅ ነለአ ከምኮለሬ ከምዎሬ፥ ከምፖቋ ሳራኳ ጉንዘ ዱዋ።" 10በላ መዳን ኣሥ አለአ፥ ቤዘሞ ርብቃኳ ጓጉጃ ከጸጋ ከሜተም፤ አኳ ከበፈጎኳ ከእስያቅ። 11- 12መሽልሣ አል ዱዋ ሜታ፥ ኤከምኢቾጎን ናሥ ማሄሻለማ፥ ቤከል ረባኳ ከርብቃ፥ "ከምደካ ገትሳ ዳ ከገሲጻ።" ኖከ ቤገሸሥ ረባ አለአ፥ አል ኦከ ቢኢ ኢዳ ኒል ኤዬማም፥ በላ መዱዋን ገሸለማ ኤያሥ ኤያ ገንሠማኳ። ካ በኢከቾጎ መሽልሣ አል ረባ ነማኦዋለማ፥ ነመደዳለማምኼ። 13አለኣኳ በደካ ኤያሥ በቆተካንዥገን ነሎርጋ ኤተ በከለካ፥ "በርሄከሽ ያይቆብ፥ ኤሳዉኸን በርካቸከካኻ።" 14እኽላኳ፥ ኣሤ ከምከሎኳ? አኢከን ኖጎ ረባ አማደሠማኽ? እምበአ። 15ከፄ ቤከል አረባ ከሙሴ፥ "ከምሌአርካይል ከኤተ በርካኣጎካ መሌአይላ፥ ከምኦከርካሥ ከኤተ በርካኣጎካ መኦከሣኳ።" 16ካ በኢከቾጎ መሽልሣ አል ረባ ነመለኣይላ ናል ረባ፥ አኢከቾጎኼ ነመሻምባ ነዳ ኤተ በኣጎካ አጸጋኼ። 17ከፄ ቤከል አረባ ነመዪዥሥ ሎርጋ ከፋረኦን፥ "ከለአ በርጦካ አም ከጥሳ፥ ኤከምትገርሥ መዥጋለም ነጸገኡ፥ ኤከማገማይለን ፄምኳ ነኔያ ነኮዎማ።" 18ካ ረባ ከምሌአካይል ከኤተ በካኣጎካ መሌአይላ፥ ከምዥገካ እልቆ ከኤተ በካኣጎካ መዥግ እልቋኳ። 19ፌት ባከለካ ከምዳ፥ "ኤያብ በከርካን አረባ መሸ ሠማ ከጸጋ? አኢካናኽ ጸጋ ኤተ ከምንሳ ዳ ኤተ በኦከሽ አ?" 20አም መዣ አለአ፥ ኣሤ ባጨካ ከማከለማ ከረባ? ዳ ኤተ በገ ኬሥ ኤለ ጸጋ፥ ከምከላኽ ከኤተ በገ ኬሣ አ፥ "ካሤ ባከገ ኬሥ አራ ኤለአ?" 21አጨካኼ ኤተ መዘዛ ገፋሌያ ከመዘዝ ሾከ እንሤያ እምበንድ ነዬዛ ነሜታማ? ሜታ ካል ኦከ ዴዋና፥ ሜታኳ ኤተ ከመንዱኬል ኖካ ኖካ ነመፃ። 22ረባ ኤያሥ ኤያኳ ቤያኣጎ ኤከማትጋሥ ማመሣለማ፥ ኤከማገማይለን መዥጋለማኳ። ከፄ አለአ ቤቀሞቆ በቦቆ ከጸጋ ደ ቤካመሥ አ፥ ደ ቤገሥ ከምቴያኳ። 23ቤያኣጎ ኤያሥ ኤያኳ መትገሥ በቦቆ ገሂንለማ ከጸጋ ደ ቤከሌአይል አ፥ ደ ቤገሥ አ ነገሲቋ ከገሂንኳ። 24ከፄ አለአ በኦካ አኳኳ፥ በላ መዳን ናሥ ዶጎ ዪሁዳ፥ ነሾካ አል ኤበ እኔያ ነኮዎማኳ። 25በከለካ አረባ ነሎርገ ሆሴይ ኤተ መዪርጓ፥ "ከምከለርካ ሾካለም፥ ከጸጋ ደ በበፀካ መዳ ሾካለም፥ ከምከለርካ ማሄሸማለም ከኤባ ኤተ ከምበፀራ መሄረሽኳ።" 26ናሥ ጎ ቢከከለካ ከማም፥ "አኻ ሾካለምኼ፥" ናሥ ጓ ከምከሉካ "ኢደ ረባ አል መኢማ።" 27ቤገሽ ኢሳያስኳ ከበቦቆ ሳ ከፄ ሾከ እስራኤል ቤከል፥ "መከፈጋኸን ገንዘ  ሾከ እስራኤል ኤሳሰም ሰ ኤያያኳ፥ ኤተ ከምብዳ ነማም ኣሥ ዱፀን። 28ረባ ኤታ በላ መፀቆን ከምርሽ መኸሣለማ ከኤባ ካል እኔያ።" 29ኤያሥ ቤሲቆ ኢሳያስ ቤገሸሥኳ፥ "ረባ ኤተ በፈለከሽ ኮዎማ በምበፀካ መኤሽ ሾካ ካኳ፥ በኮመድ ኤኤበ ሶዶም፥ በኮሞኮ ኤበ ጎሞራኳ።" 30መከላ ኤለአ ኣሤያ? ጸጋ ደ በበፀካ መዳ ሾካ አል ረባ፥ ደ በበፀካ መሻምባ ኤከምጦዋ አረባ እማም ከመዪዥሠማ፥ በጦከንዥገን አረባ ከመዪዥሠማ። መዳ ነታሰ ረባ ከመዪዥሠማ አለአ ነመገሚላ በዎኬያ። 31ሾከ እስራኤልኸን፥ ደ በሻምበካ ነመዜኽ ማቶቋ ኤከምዳን ነታሰ ረባ ከመዪዥሠማ፥ ከፄ ቢሃለሽ መትቶቆ ማቶቋ አ፥ ኢዸበንኼ አለኣኼ። 32ከፄ ኣሤያ? ከፄ ቢሻምብ ኤከምጦዋ አረባ እማም ከመዪዥሠማ ነመደዳ፥ ነመገሚላኼ። ቢሥ እማም ነግሸ መሥ። 33ኤያሥ በቆተካንዥገን ነመዪዥሥ ሎርጋ ኤተ በከለካ፥ "አለአ፥ ከምጦርሥ ግሸ መሥ ነፂዮን፥ ታንተርሳ ኤተ ከምፋቶቆ ጸጋ፥ ከምቴያኼ ኤተ ከምገምኪል ከአኼ።"

will be added

X\