ከደ ሮማ 7

1ኢዴበም፥ በርገሸከሥ ካኻ ከደ በኻምባለከሥ ማቶቋ። አኸገምካኼያኽ ኤበጨካ ማቶቋ ገፋሌያ ነጸገጸጋ ካሥ አል ኦከ ከምኢያ መዣ አኳ? 2በርገሸከሥ መኮሣ ሜታ ካኻ። እገፋ ኤተ በርኮቆ ጉንዛ ሜታ ካሥ አል ኦከ ከምኢያ ጉንዘማ፥ ከማፉንጨካሥ ኤማቶቋ፤ ኤከምሻ ጉንዘማኸን፥ ከምጨጋስ ነኤለ ማቶቋ ነኤተ ቤካፉንጫሥ ከጉንዘማ። 3ካ፥ መከኢ ጉንዘማ፥ ኤከማኢካ ከጉንዛ ከጀንዳ፥ ከምከሉካ እገፋ ኤተ ጎርታ፤ ኤከምሻ ጉንዘማኸን፥ ከፄ በጨገካስ ነማቶቋ፥ ኤከምሮቆን ጉንዛ ጀንዳኳ፥ ከምከሉካኼ ኤተ ጎርታኼ። 4ኤያሥ ኤያ አኻኳ ኢዴበም፥ ከመንዘ ለማ ነመሸ ክርስቶስ በኸጨገካሰንዥገን ኒል ኤለ ማቶቋ አል ሙሴ። ከለአ በኸደካ ካል ጸጋ ጀንዳ፥ ካል ኤተ ባፈርካዬቆ ነደ በሸሸካ። በከደካ አለአ፥ ኤከምጮኳን ኻ ከረባኳ። 5ገፀ ኖከ ቤያኮኢ ኤመኢ በጫ፥ ቤጦ መአጀበ ገንሣ ኤተ ቤፈሮቆ አማቶቋ፥ ኤከምጮኮኳ ኻ ከመሻ ኮጎ ጸጎኳ ከኮዎማ። 6እኽላኸን በኮጨገካሰንዥገን ነማቶቋ፥ በኳሰካ ከመሻ ነኤተ ቤፉንጨሽ አኳ ገፀ። ካ በላ መዳን ኤንዶዋ አል ገፀ፥ ኤተ ቤኳሽ ነማቶቋ ኤተ ቢቆታ፥ በኮደካ ዳ እኽላ ከረባ ኤንዶዋ አል ኽኻ ኤተ በኮካሽ ነመዪዥሥ ገፉጫኳ። 7መከላ አለአ ማቶቋ ገንሣኽ? እምበአ፥ ከምዳኼ ኤለኣኼ። ነደንኳ፥ በመሜካ አማቶቋ፥ በርምገምካኼ ገንሣኼ። በምበፅ ማቶቋ መከላ "መአጀባኣኼ ዳ አል ጸጋኼ፥" በርምገምካኼ ኤበደካ መአጀባ ኣሤያኼ። 8በፈርኬቆ አማቶቋ ገንሣ፥ በበነኮቆ መአጀባ ኮዎማ ኒለም። ኖጎ በሜካ አማቶቋ፥ ገንሣ መሸማ። 9ቤርኢ አርኳ ገፀ ኖጎ ቤሜ አማቶቋ። ኖከ ቤዌ ማቶቋኸን፥ ቤፈርሥ ገንሣ፥ 10ቤርሻኳ፤ ቤራምባለሥ፥ ኤቤሮቆ ከመሻ አማቶቋ አ ኤተ ቤዽ ከምኻ መኢያ። 11ገንሣ፥ ኤተ ቤከፈርሥ ከማቶቋ፥ ቤያጠኽ አራ፥ ቤከሾቆ አራ ከአኳ። 12ካ፥ ማቶቋ አል ሙሴ ኮዎማ መዪዥሠማ፥ ሜታ ሜታማለማም መዪዥሠማ፥ መዘረማ ገሸለማኳ። 13መከላ አለአ፥ ኤሮቆ አገሸል ዳ አራ ከምሻኽ? እምበአ፥ ሜተል ኤለኣኼ። ገንሣኸን ኤከማትጋሠን መዳለማ ገንሣ፥ ካሥ ገሸል ዳ ከአ ቤሬቆ መሻ ካራ። ዳ በከደካ አለአ ኤከማትጋሠን ከማቶቋ፥ እንዘሥ ኤበደካ ገንሣ በቦቆማ። 14በኮገምካ ኤበደካ አማቶቋ ካል ገፉጫ፤ አራኸን ጸጋ አል በጫ፥ ኤተ ቢኮደኮቆ ከኤለ ገንሣ። 15አርገምካኼ ዳ ኤተ በርደካኼ፤ በርደካ ዳ ኤተ በርካቸከካኻ፥ አርደካኼ ዳ ኤተ በርሄከሻኼ። 16ኤበርደካ ዳ ኤተ በርበፀካ መሄረሽኳ፥ ቢለገሰኪል ከማቶቋ ኤበደካ አ ከገሸለማ። 17ካ፥ ኤተ በጦካ አራ ኤከምደራ መሸ ሠማ፥ አገንሣ ኤተ በኢካ ኒለም፥ አራኼ። 18በርገምካ ኤበበፀካ መኢያ ገሸል ዳ ሜተል ኒለም ኤያሥ ኤያኳ ነበጨ ጸገም። መርከሄሽ መደ ገሸል ዳ፥ አርፈለከሸኼ መደ ገሸል ዳ አኼ። 19በርደካ ገንሠ ዳ ኤተ በርበፀካ መሄረሽ መደማ፥ አርደካኼ ገሸል ዳ ኤተ በርሄከሻኼ። 20ካ ኤበርደካ ዳ ኤተ በርበፀካ መሄረሽ፥ ኤተ በደካ አለአ አገንሣ ኤተ በኢካ ኒለም፥ አራኼ። 21በራምባለከሥ ኤበኢካ ሾከ መንዳ አለአ ነመደማ፤ ኤበራኣጎካ መደ ገሸል ዳኳ፥ በፐኬሥ ኣሥ ገንሠማ። 22በራገካይል ኒለም ከማቶቆ ረባ፥ 23ነደንኳ በርገምከሥ ኤቢያትርኮቆ አመንዳ ጀንዳ ኤተ በኢካ ኒል በጨ ጸገም ከመንዳ ካል ሳምቢርቆምኳ። መንዳ ጀንዳ አኳ በጦካ ኤከምፉንጨራሽ ነኤለ ገንሣ ኤተ በሙቸኮቆ ነጸገም። 24አራ ጸጋ ኤተ በበፀካ መገካ ዳ! ዎዴ ከምብዶቆ አራ ነጸገም ነኤተ በርኮቆ አራ ከመሻ ነለአ? 25ነድ መገ ላ ከረባ ከንዶጎ ኤቶኳ ያሱስ ክርስቶስ። መኢያለም ኤኤለአ፡ በርደካ ከሳምቢርቆም ከማቶቆ ረባ፥ ከበጨ ጸገምኸን በርደካ ከመንደ ገንሣ።

will be added

X\