ከደ ሮማ 6

1ኤበደካ ኤለአ፥ ኤከምፈጋኸን መገ፥ ኢኮካ ከገንሣኽ? 2እምበአ፥ ከምዳኼ ሜተል ኤለኣኼ! ኤበኮሸካ ኒል ኤለ ገንሣ፥ ኤያላሤ ከምኢኮኳናኮ ከገንሣ? 3አኸገምካኼያኽ፥ ደ በኮጩጸካቆ ከያሱስ ክርስቶስ ከምዳ ከአ ሜተም፥ ኤበኮጩጸካቆ ኤከመንዞ ኲለን ነመሻለማኳ? 4ከማጩጻቋሎኳ በኮሃንዠካቆ ከክርስቶስ በኮንዘ ኪለንዥገን ነመሻለማ። ኤያሥ ባፈርካዬቆ ክርስቶስ ከገሂን በባ ነመሻ፥ ከምዳ ካኳ አመኢያ ነንዶ ኽኻ። 5ኤበኮከተጸከሥ ከጸጎኳ ነመሻለማ፥ በኮሸካ ከክርስቶስ፥ ከምተጸከሥ አረባኳ አኳ ነመፈርሣለማ ነመሻ፥ ከምኢኳ ከአኳ። 6በኮገምካ፥ ኤበቱካንዥገን ገፀ ጸጎኳ ከክርስቶስ ነጋገድ ጃ፤ ዳ በከደካ አለአ፥ ኤከምቴያን ጸጎኳ ኤተ በደካ ገንሣ፥ ኤከምበፆኳን ማሾኳኽ አኮኳ ነዎደ ገንሣ። 7በፐከሠንዥገን ጸጋ ኤተ በሸካ ነኤለ ገንሣ። 8ኤበኮሸካ ከክርስቶስ፥ በኮገምኪል ኤከምኢኳ ከአኳ። 9በኮገምካ ኤባፈርካዬቆ ክርስቶስ ነደ በሸሸካ፥ ኤከምበፃ ማኮሊል መሻኳ፤ አጨካኼ አመሻ ገፋሌያ ነጸገማኼ። 10ዳ በከሸካ ክርስቶስ፥ ከምጫኼ አገንሣ ገፋሌያ ሜተልኼ። መኢያ ኤተ በኢካ አ እኽላኳ፥ በኢካ ከረባ። 11ዪርኻ አኽኳ ጸገኻ ኤጸጋ ደ ባንዢገካ አገንሣ ገፋሌያ ነጸገማ፥ ኤደ በኽኢካ ከረባ ከንዶጎ ያሱስ ክርስቶስኳ። 12ኤከምበፀኻን አኽ ማገሰኻሠን ከመአጀበ በጫ፥ መሙቾዳቆኼ አገንሣ ነጸገኻ ነኤተ ከምሻኼ። 13መኸኺልኼ ጎ ጸገኻ ኤዳ አል መሸ ሠማ ኪል ኤለ ገንሣኼ፤ ኸኻ እልቆኻ ከረባ ኤጸጋ ደ በተርካ ነመሻ ከመኢያ፥ ኸኻ ጎ ጸገኻኳ ከረባ ኤዳ ኒከድ ገሸል መደዳ። 14በላ መኢኻን ኒል ኤለ ማቶቋ፥ ከፄ በኽኢካ ኒል ኤለ መገ አል ረባ፥ መሙቾዳቆኼ አገንሣ አኻኼ። 15ኤበደካ ኤለአ፥ በላ መኢኳን ኒል ኤለ ማቶቋ፥ ከፄ በኮኢካ ኒል ኤለ መገ አል ረባ፥ ዶኳ ገንሣኽ? እምበአ፥ ከምዳኼ ሜተል ኤለኣኼ። 16በኸገምካ፥ ኤከምጦኻ ጸገኻ ከጸጋ ሜታ ከዎደ ከምኩኻ ኪል ኤለማ፥ ከምደኸካ ከዎደ ከመዣ ኤተ በኸካገሰካሣ። ኤከማገሰኻሥ ከገንሣ፥ አኻ ዋደ ገንሣ፥ ከምሬቆ ገንሣኳ መሻ፤ ኤከማገሰኻሥ ከረባኸን፥ ከምደኻ ከመዪዥሠማ ነታሰማ። 17ነከድ መገ ላ ከረባ ከፄ ቤያኸድ ገፀ ዋደ ገንሣ፥ እኽላኸን በኻገሰካሠንዥገን ከእልኻ ከመትገሣ ኤተ ቢከኽ አኻ። 18በኸፐኬሥ ኒል ኤለ ገንሣ፥ በኸኩከንዥገን ኪል ኤለ ገሸል መደዳ። 19ከፄ መሃለሽ ማምባለሠማለኻ በርከገሸካ ካኻ ኤመኮሥ ዎደ። ኤያሥ ቤያኽጦኽ ጸገኻ ነገሲቋ ከዋደ መዦጓ ካል መሸ ሠማ፥ ቤያኸድ ደ መሸ ሠማኳ፥ ኤያሥ ኤያ እኽላኳ ኤከምዪዥኻሠን፥ ጦኸኽ ጸገኻ ከዋደ ገሸል መደዳ። 20ኖከ ቤያኸድ ዋደ ገንሣ፥ ኤያኸኢንኼ ኒል ኤለ ገሸል መደዳኼ። 21ኖካ ና  ኣሤ ቤኢ በነ መደዳለኻ? ኣሥ ዳ ኤተ በዪፆቆ አኻ እኽላኼያኽ? ዳ አኳ ኤተ ከምሮቆ ነመርሸማ ከመሻ። 22እኽላኸን፥ ዳ በኸከፐኬሥ ኒል ኤለ ገንሣ፥ በኸደካ ከደ መደዳ አል ረባኳ፥ በኸጨካ ኸኻ። ኸኻ አኳ ከምሮቆ አኻ ከመዪዣሣለኻ፥ ነመርሸማኳ ከመኢያ አል ግዢ ግዥ። 23በነ ገንሣኳ መሻ፥ ደ መኻ ኤተ በኸካ አረባኸን፥ መኢያ አል ግዢ ግዥ ከንዶጎ ኤቶኳ ያሱስ ክርስቶስ።

will be added

X\