ከደ ሮማ 5

1ከለኣኳ፥ ኤበጦካ አረባ አኳ ከመዪዥሠማ ከመገሚላ፥ በኮጨካ መገማ ከረባ ከንዶጎ ኤቶኳ ያሱስ ክርስቶስ። 2ከንዶጎማኳ በኮርካሰንዥገን እንዶማ ካኳ [ከመገሚላ] ከመገ ኤተ በኮከኢካ እኽላ ነመኢያ፥ በኳገ ካይልኳ ከፄ በኮጨካ ማጦዪላ ከመንዘ ል ገሂን ረባ። 3በላ መዳን ኣሥ አለአ፥ በኳገ ካይል ከማኣንሠሣሎኳኳ፤ በኮገምካ፥ አከምሬቆ አማኣንሠሣ ገቀማ። 4ገቀማ ከምታኤ ማሮቋ ከረባ፥ ማሮቋ ከረባኳ ከምታኤ ማጦዪላ። 5ዳ በኮኮጨካ ማጦዪላ፥ ከምርኮሠኼ እልኳኼ። በዪጨኪለንዥገን ማሄሽ ረባ አኳ ከንዶጎ መዪዥሥ ገፉጫ ኤተ በኸኬ አ ካኳ። 6ኖከ ቤያኮድ ደ ገማዋ፥ ደ ገንሣኳ፥ ቤሽ ክርስቶስ ካኳ ነአንጅ ኤተ ቤር አረባ። 7ኢገም ከምዳ ከምሸከሥ ጸጋ ከመዣ ከገሸለማ፤ አኢካኼ ኤዳ ከምሸከሥ አ ከጸጋ ከኤተ በኣጎካ መዪዣሣ ከመዜኽ ማቶቋኼ። 8ኖከ ቤያኮድ አኳ ደ ገንሣኸን፥ ቤሽ ክርስቶስ ካኳ፤ ከለአ በከትገካሥ፥ እንዘሥ በቦቆ ኤበሄከሽ አረባ አኳ። 9ከለኣኳ፥ እኽላ ከመሃ ክርስቶስ ኤበከጦካ አረባ አኳ ከመዪዥሠማ፥ በኮገምካ ዝንዜን ኤከምፐኮኽ ነማመሣ አል ረባ ከንዶጎ ክርስቶስ። 10ኖከ ቤያኮድ ብታለማ፥ ቤያኳገ  ከረባ ከመሸ ዱማ። ካ፥ ኤበኳገ ካ እኽላ በኮገምካ ከበቦቆ፥ ኤከምብዶቆ ክርስቶስ አኳ ከመኢያለማ። 11በላ መዳን ኣሥ አለአ፥ ከፄ ባገ ከኽ አኤቶኳ ያሱስ ክርስቶስ አኳ ከረባ፥ በኳገ ካይል ከበቦቆ ከንዶጎ ኤቶኳ። 12ኤያሥ ቤኩ አገንሣ ከኤባ ካል እኔያ ከንዶጎ ጸጋ ሜተል፥ ቤዌ መሻኳ ከንዶጎ ገንሣ፥ ኤያሥ ኤያ ከፄ ቤድ አጸጋ ኮዎማ ገንሣኳ፥ ቤካቆ አመሻ ጸጋ ኮዎማ። 13በላ መኼን ረባ ማቶቋ፥ ቤኢን ገንሣ ነኤባ ናል እኔያ። ነደንኳ፥ ኖጎ በሜካ ማቶቋ፥ እንዘ ካኸኼ ገንሣኼ። 14ነደንኳ፥ ከኤተ ቤካጦሽ ነአንጅ ኣዳም ካሥ አል ሙሴ ቤሙቾቆ አመሻ ጸጋ፤ በላ መዳን ናሥ ኣዳም ኤተ ቤድ ገንሣ፥ ቤሙቾቆ ኤያሥ ኤያኳ ነደ በበፀካ መዳ ገንሣ ኤያለማ። ኣዳምኸን መኮሥ ክርስቶስ፥ ኤተ ቤኢ ከመዌያ። 15በንተርኮቆንዥገን መገ አል ረባኸን ነገንሣ ናል ኣዳም። ኤበሸሸካ ኤማንጀ ጸጋ ከገንሣ አል ጸጋ ሜታ፥ ባኸካዬሸንዥገን ከበቦቆ መገ አል ረባ ከደ መኻለማ ከኤማንጀ ጸጋ። ባኸካዬሸንዥገን አኳ ከንዶጎ ጸጋ ሜታ፥ ኤተ በደካ ያሱስ ክርስቶስ። 16ዳ ኤተ በርኬቆ አመገ ኤዳ ኤተ በርኬቆ አገንሣ አል ጸጋ ሜታ አኼ። ነገንሣ አል ጸጋ ሜታ አ በርካ አረባ መኸሣ። ነበበኽ ገንሣኸን በደካ መገ፥ በርኬቆ አመገኳ መዳ ነታሰ ረባ ከመዪዥሠማ። 17ከመምፑቆማ አል ጸጋ ሜታ፥ ከፄ ጸጋ ሜታ፥ ኤቤሙቾቆ መሻ ነጸጋ ነኮዎማ፥ በኮገምካ ኤከምሙቹቆ ከበቦቆ አደ በርኮቆ በበኽ መገ ከደ መኻ ከኤተ በከዪርካ አረባ እማም ከመዪዥሠማ። ከምኢዋ እማምኳ ከንዶጎ ጸጋ ሜታ፥ ኤተ በደካ ያሱስ ክርስቶስ። 18ኤያሥ በኸካሥ መኸሣ ከጸጋ ከኮዎማ ከመምፑቆማ አል ጸጋ ሜታ፥ ኤያሥ ኤያኳ በጦካ አረባ ከመዪዥሠማ ጸጋ ኮዎማ ከገሸል መደዳ አል ጸጋ ሜታ። ከምኻ አመዳ ነታሰ ረባ መዪዥሠማኳ መኢያ። 19ኤያሥ በደካ አበበኽ ጸጋ ደ ገንሣ ከምኮዎቆ ማቶቋ አል ጸጋ ሜታ፥ ኤያሥ ኤያኳ ከምዳ ጸጋ ኮዎማ ከመዪዥሠማ ከማገሳሣ አል ጸጋ ሜታ። 20ኤከምፈጋኸን መምፑቆማኳ፥ ቤከዌሥ አማቶቋ፤ ኖጎ በፈገካኽ ገንሣኳ፥ በፈገካኽ በንተርኮቆ አመገኳ። 21ኤያሥ ቤሙቾቆ ገንሣ ከንዶጎ መሻ፥ ከምሙቾቆ ኤያሥ ኤያኳ መገ አል ረባ ከመጦ አኳ ከመዪዥሠማ። ከምሮቆ አመዳሎኳ ከመዪዥሠማኳ አኳ ከመኢያ አል ግዢ ግዥ ከንዶጎ ኤቶኳ ያሱስ ክርስቶስ።

will be added

X\