ከደ ሮማ 4

1እኽላ ኣሤ ከምከሎኳ ከፄ ኣብራሃም፥ ኤተ በደካ በበ ሾካለምላ። ኣሤ ዳ ቤዸብ አኳ? 2ኤተ ቤከጦ አረባ አ ከመዪዥሠማ በምኢ ከመደዳለማ፥ በምጨካ ዳ ኤተ በከምሾጓ። ነደንኳ፥ አፈለከሸንኼ መሾጓ ነታሰ ረባኼ። 3በከለካ አመዪዥሥ ሎርጋ፥ "ኣብራሃም በገምኪል ረባ፥ ከለአ በዪርካ አረባ አ ከመዪዥሠማ።" 4ጸጋ ኤተ ከምዳ ዳ፥ ከምኹካ በነ መደዳለማ፥ ከምኹካኼ ኤደ መኻ መገ ኼ። 5ጸጋ ኤተ ባንዢገካ ገሸል መደዳ፥ በገምኪል ከረባኸን ኤተ በዪዥከሥ ጸጋ ደ በደካ ገንሣ፥ ከምዪርካ አረባ ከመዪዥሣ ከመገሚላለማ። 6በገሸከሠንዥገን ዳዊትኳ፥ ኤባገ ካይል ጸጋ ኤተ በዪርካ አረባ ከመዪዥሠማ በላ መትቶቆን ማቶቋ። 7"ናገይል ጸጋ ደ በከበፀከሽ አረባ መሸ ሠማለማም፥ በካንደከስ እለማ ከገንሣለማምኳ። 8ናገይል ጸጋ፥ ኤተ በበፀካ አረባ መንዘ ከኽ ገንሣለማ።" 9ማገ ላ አለአ ካሥ ከደ ቢሸከሥ ዶጎ ዪሁዳኽ በላ ከሾከ ጸጋ ጃጀንዳኳ? ቢልከለከንዥገን ነገሲቋ፥ "ኣብራሃም በገምኪል ረባ፤ ከለአ በዪርካ አረባ አ ከመዪዥሠማ።" 10ከማሥ ቤዪር አረባ ኣብራሃም ከመዪዥሠማ? ኤቢሸሣኽ በላ መሹሠን ነገሲቋ? ኤቢሸሣኼ፥ በላ መሹሠን ነገሲቋ። 11መሸሣለማኸን ነን። ዳ ቢከሸሣኳ ከመትገሥ ኤቤዪር አረባ አ ከመገሚላ ከመዪዥሠማ ኒከምሸሠን ነገሲቋ። ካ በከደካ ኣብራሃም ከበበ ጸጋ ኮዎማ ከደ በገምኪል በላ መሹሠን። ኤያሥ በዪርካ አረባ ኣብራሃም ከመገሚላ ከመዪዥሠማ፥ ከምዪርካ እማምኳ ከመገሚላ ከመዪዥሠማ። 12በደከንዥገን ኤያሥ ኤያኳ በባ ከደ ቢሸከሣኳ፤ እማም በላ መጩዋን መሸሣ ደ በሁለካ ኤያሥ ኤያ ቾጎ መገሚላ አል ኣብራሃም፥ ኤተ በጭ አ በላ መሹሠን። 13ረባ በኸኬ ማጦዪላ ከኣብራሃም ከሾካለማ ኤከምዳን ኤባ አል እኔያ ካለማም። ኤተ በከዸበካ ማጦዪላ አለኣኳ፥ በላ መዳን ከመትቶቆ ማቶቋ፥ ከፄ ቤከገሚል ከረባ ቤከዪር አኳ ከመዪዥሠማ። 14ዳ ኤተ በካጦኪል ረባ ጸጋ፥ ኤመኢያ ከማኸካሽ ከደ በዜከኽ ማቶቋ፥ መገሚላ አል ጸጋ መገ፥ ከምጫኼ አማጦዪላ አል ረባ በናኼ። 15ማቶቋ ከምሬቆ ማመሠ ረባ፤ ኖጎ በሜካ ማቶቋኸን፥ አኢካንኼ አመምፑቆ ማቶቋኼ። 16ኤከምኸካን ረባ ኤደ መኻ አል መገ ከሾከ ኣብራሃም ኮዎማ ዳ በካጦዪል እማም፥ በከኮካሽ ማጦዪላ ነመገሚላ፤ ሾከ ኣብራሃም አለአ በላ መዳን ኣሥ ደ በጨካ ማቶቋ፥ ኤያሥ ኤያኳ ደ በጨካ መገሚላ ኤያል በቦኳ ኣብራሃም። 17በከለካ አመዪዥሥ ሎርጋ፥ "በርጦከንዥገን አም ከበበ ሾካ በበኽ።" ከለአ ኣብራሃም በበ ኮዎኳ ነታሰ ረባ፥ ኤተ ቤከገሚል አ፥ ረባ፥ ኤተ በኢኮቆ ደ በሸሸካ፥ በጦካ ኤከምኢያን አዳ ኤተ በሜካኳ። 18ቤካጦዪል ኣብራሃም ከመገሚላ ከዳ ኤተ በበፀካ አጸጋ ማጦኪለን። ኤያሥ በከለካ አመዪዥሥ ሎርጋ፥ "ከምፈጋኽ ሾከኡ ኤቢዣ፥" ቤገሚል ኤከምዳ አ ከበበ ሾከ ጸጋ በበኽ። 19ቤዪር ኣብራሃም ጸገማ ኤቤያጋዛሣ፥ ቤድ ግዣለማኳ ግቸማ ማቁስ። ቤገም ኤቤያንድሪንያሥ ሰ መፖቆ ሳራ፤ ነደንኳ፥ ኤሌኤንኼ ነመገሚላለማኼ። 20አ ቤንዥጋሥ ነመገሚላለማ፥ ቤከኽ ገሂን ከረባኳ፤ ኤያጤያይለንኼ ከማንዢግ መገሚላ ነማጦዪላ ኤተ ቤከኽ አረባኼ። 21ቤገሚል ዝንዜን፥ ኤከምፈለሸን አረባ መጦ ዳ ኤተ ቤካጦዪል አ። 22ከለአ በዪርካ አረባ አ ከመዪዥሠማ። 23ሰ ሎርጋ ኤተ በከለካ፥"በዪርካ አረባ አ ከመዪዥሠማ"ካሥ ኣብራሃምኼ፥ 24በቆተካንዥገን ኤያሥ ኤያ ኤከምዪራ አረባ አኳ ከመዪዥሠማ፥ ደ በኮገምኪል ካ፥ ኤተ በፈርኬቆ ኤቶኳ ያሱስ ነመሻ። 25ቢያተገርኮቆ አ ከመሻ ከፄ መምፑቆማሎኳ። ኤከምዶኳን አኳ ነታሰ ረባ ከመዪዥሠማ፥ ባፈርካዬቆ ነመሻ።

will be added

X\