ከደ ሮማ 3

1ካ ናሤ በሙቸኮቆ አዶጎ ዪሁዳ ደ በበፀካ መዳ ሾከ ዪሁዳ? በነ መሸሣኳ ኣሤያ? 2ከንዶጎ ዳ ኮዎማ በጨካ በና በበኽ፤ ነመሲቆማ በዪርካ አረባ ዶጎ ዪሁዳ ኤመገሚለማ በከኸኬ እገሻለማ ኤከምዜዉኸን። 3ኤከምበፁዋ ነማም ና ሜታ ሜታ መዱዋ መገሚለማ፥ ከማሸኸን አማንዢግ መገሚላለማምኳ ኤበደካ ረባ መገሚለማኽ? 4እምበአ፥ ከምዳኼ ሜተል ኤለኣኼ፤ ኤከምዳን ጸጋ ኮዎማ ደ ጎልጎዛኳ፥ ከማትጋሥ ኤበደካ ረባኸን ኤተ ኸገሻ። ኤያሥ በከለካ አመዪዥሥ ሎርጋ፥ "ከገሻሉ ኮዎማ ከምዸባካ ኸገሻ፥ ኖከ ከምተምብቆ አምኳ፥ ከመሙቻቆ ተምባ።" 5ኤበትገከሥ አመሸ ሠማሎኳ ኤበደካ ረባ መዪዥሠማ፥ ኣሤ ከምከሎኳን አኳ? ከመገሸርሥ አራ አለአ ኤገሳንዘ እል ጸጋ፤ ኖከ ባኦከሥ ረባ ካኳ፥ ከምበፀካ መዪዥካሥ ከለኣኽ? 6እምበአ፥ ከምዳኼ ሜተል ኤለኣኼ። ኤከምበፃ መዳ መዪዥሠማ፥ ኤያበማ ከምኸከሠና  ከኤባ አል እኔያ? 7ኤበካትገካሥ ኸገሸ ረባ ከበቦቆ ከጎልጎዛለም፥ ኤከምዸበካ አረባ ገሂን ከለኣኳ፥ ካሤ በከረን አ በና ካራ ኤያል ደ ገንሣ? 8ኤከምዳ ኤለአ፥ አኮከለካኼያኽ "ኤከምዌን ገሸለማ፥ ዶኳ ገንሠ ዳ።" ጸጋ ሜታ ሜታ ኤዳ ቤርትገሥ አር ኤለአ ቢከለካ፥ ቢከንዥገን ፄም። መኸሣ ኤተ ከምኸሥ አረባ ከማም፥ መዘረማ። 9አይላ ደ ቢልደካ ዶጎ ዪሁዳ ኢልሙቸኮቆ ሾከ ጸጋ ጃጀንዳኽ? እምበአ፥ ኢልሙቸኮቆኼ። በርትገከሠንዥገን ነገሲቋ ኤቢኢካ አዶጎ ዪሁዳ ከሾከ ጸጋ ጃጀንዳ ኮዎማኳ ኒል ኤለ መዥግ ገንሣ። 10ኤያሥ በቆተካንዥገን ነመዪዥሥ ሎርጋ፥ "አኢካንኼ መዪዥሥ ጸጋኼ፥ አኢካንኼ ሜተል ኤለኣኼ። 11አኢካንኼ ኤተ ባምባለከሣ፥ ኤተ በደረካ ረባኳ ሜተልኼ። 12በበከኸንዥገን ጸጋ ኮዎማ ረባ፥ ቢደከንዥገን ኮዎማም ከደ ባንዢገካ በና፤ አኢካንኼ ኤተ በደካ ገሸል ዳ፥ አኢካንኼ ሜተል ኤለኣኼ። 13ሰማም በርኮቆ ጸጋ ኮጎ ሆ መሻ ቢንጠከኽ ከጠጠማምኳ፤ በኢካ ማንጨ ሆላኳ ኖቆ ቤሰማም። 14ሰማምኳ በከዪጨካቆ ከጎታ ከማንጨ ዳ፥ 15ቢሲከቾጎ ከማርከኽ መሃ ጸጋኳ። 16በኢካን ነንዶዋለማምኳ አመቴማ ከማምብማ፥ 17ኢገምካኼ እንዶ መገማኼ። 18አኢካንኼ አመጤያ ከረባ ኒለማምኼ።" 19ዳ ኤተ በትገከሥ አማቶቋ አል ሙሴ፥ በኮገምካ ኤበገሸካ ከደ በኢካ ኒል ኤለ ማቶቋ፤ ዳ ከምደካ አለአ፥ ኤከምጻንዶቆ ዳ ኤተ ከመንሸ ኪል አጸጋ ኮዎማ፥ ኤከምጦሥ ኤበ እኔያ ኮዎማ ኒል መኸሣ አል ረባ። 20ካ ከመትቶቆ ማቶቋ አል ሙሴ ከምደካኼ ጸጋ ሜተል ነታሰ ረባ መዪዥሠማኼ። ዳ ኤተ በትገከሥ ማ ቶቋኳ፥ ኤከማምባለሥ ጸጋ ገንሣለማ። 21እኽላ በላ መዳን ከማቶቋ ባገምካሠንዥገን እንዶዋ ኤተ በከጦካ አረባ ጸጋ ከመዪዥሠማ። ከለአ በደካ ኸገሻ አማቶቋ አል ሙሴ ከሎርገ ደ መዪርጓኳ። 22ኤተ በከጦካ አረባ ጸጋ ከመዪዥሠማ፥ ከመገሚላ ከያሱስ ክርስቶስ። ከምደካ አለኣኳ ከደ መገሚላ ኮዎማ፥ አኢካንኼ ማሃቻ ኖጎማምኼ። 23በደከንዥገን አጸጋ ኮዎማ ገንሣ፥ ኢንዘኪለንኼ ነገሂን ረባኼ። 24በላ መኹዋን በና፥ ካሥ መገ አል ረባ ከምዱዋ መዪዥሠማ ከንዶጎ ያሱስ ክርስቶስ፥ ኤተ በካንዠኪል እማም ከጸገማ። 25በጦከንዥገን ረባ አ ከዳ ኤተ ከምዸበካ አጸጋ ማምበፀሽ ገንሣለማም ከመሃለማ ከደ በከገምኪል ካ ኮዎማ። ኤያሥ አለአ ነመበፀሽ ገንሣ ኤተ ቤድ አጸጋ ገፀ ኖከ ቤቀሞቆ አረባ፥ ቤካንደስ እለማ፥ ቤከትገሥ አረባ መዳለማ መዪዥሠማ። 26ነአንጅ ነለኣኸን፥ ኤበከትገከሥ አ መዳለማ ከመዪዥሠማ፥ በላ መቀመኮቆን ገንሣለማም፥ ከመጦ ጸጋ ከመዪዥሠማ። ኤለአ በትገከሥ አረባ ኤበደካ አ ኪልቆማ መዪዥሠማ፥ ኤበጦካ አ ከመዪዥሠማ ደ በከገምኪል ከያሱስ ኮዎማኳ። 27ካ ካሤ ከምሸኮኮጓ? አኢካንኼ ዳ ኤተ ከምሸኮኮጎ ሜተልኼ። ዳ ኤተ ከምበፀኮኳ መሾኮኮጎ ኣሤያ? ከፄ በኮዜከኽ ማቶቋኽ? እምበአ፥ ከፄ ከምዳ ካኳ አመኢያ ከመገሚላ። 28በላ መዳን ካሥ ከመትቶቆ ማቶቋ፥ ቢልገምካ ዝንዜን፥ ኤከምጦዋ አረባ ጸጋ ከመገሚላ ከመዪዥሠማ። 29ረባ ኣሥ ረበ ዶጎ ዪሁዳኽ? ከሾከ ጸጋ ጃጀንዳ ኮዎማኳ ረባኼያኽ? ኣዬ፥ ከሾከ ጸጋ ከኮዎማኳ። 30ከፄ በደካ አረባ ኣሥ ሜተም፥ ከምጦዋ ከመዪዥሠማ ከመገሚላ ዶጎ ዪሁዳ፥ ከሾከ ጸጋ ኮዎማኳ ካሥ ከመገሚላ ከአ። 31ከምብኮካ ከመገሚላ ማቶቋኽ? እምበአ፥ ከምኮኮከሽ ማቶቋ።

will be added

X\