ከደ ሮማ 16

1በራኣጎካ ኤከምገመኻ ዱዌበምላ እገፋ ፌቤ፥ ኤተ መደዳ መገሚለማ ነገሙንፀ ደ ገዴራ አል ከንሬያ። 2ሄኸሽ አ ከፄ ኤታ ኤያሥ በደካ ከጸጋ አል ረባ አመሄሽ ኮዶ። እገፋ አንኳ ከፄ በተጸከሥ ኤማንጀ ጸጋ በተጸከሥ አራኳ፥ ተጸኸሥ አ ካሥ ዳ ኤተ ከማኣጓ ነጸገኻ። 3ኸኸካ ዳገለም ከምጵሪስቂላ ከኣቂላ፥ ደ ቢለንተጸከሥ ነመደዳ ከያሱስ ክርስቶስኳ። 4እማም ቢኽ ጺማም ከፄም፤ በላ መዳን ኣሥ አራ፥ ገሙንፀ ደ ገዴራ ነሾከ ደ በበፀካ መዳ ዶጎ ዪሁዳ ኮዎማኳ፥ ቢኸካ መገ ላ ከማም። 5ኸኸካ ዳገለም ከገሙንፀ ደ ገዴራ ደ ባሙንፀኮቆ ነመፃለማም። ኸኸካ ዳገለም ከመዠም ኤጳኔጦስ፥ ኤተ ቤሲቆ መገሚላ ከክርስቶስ ነኤበ እሲያ። 6ኸኸካ ዳገለም ከማሪያም፥ ኤተ በሻምበካ ነመደዳ ካኻ። 7ኸኸካ ዳገለም ከኣንድሮኒኮስ ከዩንያስ፥ ደ በደካ ሾከም፥ ቢፉንጨካ ከአራ። እማም መሂንቆማ ነሰ ገትገ ክርስቶስ፥ ቢሲቆ ካራ ነመገሚላ ከአ። 8ኸኸካ ዳገለም ከኣምጵሊያጦስ፥ ኤተ በርሄከሽ ከኤታ ያሱስ። 9ኸኸካ ዳገለም ከኡርባኖስ፥ ኤተ ቢለንተጸከሥ ነመደዳ ከክርስቶስ፥ ከመዠም ከእስጣኪስኳ። 10ኸኸካ ዳገለም ከኣጴሌስ፥ ኤተ ቢዻምበካ ቢያምባለከሠን ኤበደካ መገሚለማ ከክርስቶስ። ኸኸካ ዳገለም ከደ መፀ ኣርስጦብሎስ። 11ኸኸካ ዳገለም ከሾከም ከሄሮዲዮን። ኸኸካ ዳገለም ከደ በርኮቆ ኤታ ያሱስ ነደ መፀ ናርክሶስ። 12ኸኸካ ዳገለም ከትሪፌኔ ከትሪፋሴ፥ ጋፋ ደ ቢሌኤካ ነመደዳ ከኤታ። ኸኸካ ዳገለም ከማሄሽ እገፋ ጰርስስ፥ ኤተ በሌኤካ ዝንዜን ነመደዳ ከኤታ። 13ኸኸካ ዳገለም ከሩፎስ፥ ኤተ በሽለካሥ አኤታ፥ ከኤዬማ ኤተ በደካ ካራኳ ኤያዩ። 14ኸኸካ ዳገለም ከኣሲንክሪጦስ፥ ፍሌጎን፥ ሄርሜስ፥ ጳጥሮባስ፥ ከሄርማስ ከኢዴባ ደ ገዴራ ደ በኢካ ኖጎማምኳ። 15ኸኸካ ዳገለም ከፍልሎጎስ፥ ዩልያ፥ ኔርዮስ ከደጎን ኤበማኳ፥ ከኦሊምጳስ ከደ ገዴራ ደ በኢካ ኖጎማምኳ። 16ኣፅምኻ ኤመኢ ደ ገዴራ፥ ኣሎቆኸሥ ዳገ። ደ ገሙንፀ ደ ገዴራ አል ክርስቶስ ኮዎማ ቢኸካ ዳገ ካኻ። 17ከመገሸራ ካኻ ኢዴበም፥ ዜኸኽ ጸገኻ ነጸጋ ደ በጦካ መንሰ ከመንቴያኻ ነንዶዋ፥ ደ በንሰካ መትገሣ ኤተ በኸገምከሻ አኽኳ። ሃተኻሥ ነጸገማም። 18ሾከ ጸጋ አለአ ቢከደካ ከመአጀባ አል እለማም፥ ኢደካኼ ከኤቶኳ ከክርስቶስኼ። እማም ቢንጠከኽ መሌእል ጸጋ ከገሻ ኤተ በገ ኪል ፄ ጸጋ በኢካ ኤገሸለማኳ። 19በገሰኮቆንዥገን ጸጋ ኮዎማ ኤበኻገሰካሥ ከሰ ማገ ላ አል ረባ። ከለአ በራገ ካይል ከፄኻ፥ በራኣጎካ ኤከምጨኻ መገመኻ ከገሸል ዳ፥ ከገንሠ ዳኸን ኤከምሌአኻይል። 20ረባ ኤተ መኸ መገማ ከመንፂሥ ሴጠና ፈላ ኒል ቾጎኻ። መገ አል ኤቶኳ ያሱስ ነድ ከአኻ። 21ጢሞቴዎስ ኤተ ቢላተጸከሥ ነመደዳ በኸካ ዳገ ካኻ፤ ኤያሥ ኤያኳ ጀንዶኳ ሾከ ዪሁዳ ሉኪዮስ፥ ያሶን፥ ከሶሲጳጥሮስኳ ቢትገካ ዳገ ካኻ። 22አራ ጤርጢዮስ፥ ኤተ በርተጸከሥ ነመቆት ገትጋ አለአ በርትገካ ዳገ ካኻ ከፄ ኤታ። 23ጋዮስ፥ ኤተ በሄከሽ አራ ከገሙንፀ ደ ገዴራ ኮዎማ ነመፃለማ፥ በትገካ ዳገ ካኻ። ኤራስጦስ ኤተ መጹር ለማና አል ኤዬባ አለአ፥ ከዱዌበምላ ኳርጦስ ቢትገካ ዳገ ካኻ። 24[መገ አል ኤቶኳ ያሱስ ክርስቶስ ነድ ከአኻ ከኮዎማ። ኣሜን።] 25ነድ ገሂን ከረባ ኤተ ከምፈለሽ መንዥገሥ መገሚላለኻ ከሰ ማገ ላለማ ኤተ በራቲከስ አር። ሰ ማገ ላ አለአ ከፄ ያሱስ ክርስቶስ፥ በትገከሥ ኸማ ኤተ ቤያጸፃቆ ገፀ ገፀኳ። 26ገ ጸፃ አኳ ባትገካሥ እኽላ ከኸ መዪዦጓ ከመቆታ አል ደ መዪርጓ፤ በርኪለንዥገን ረባ ኤተ በኢካ ግዢ ግዥኳ፥ ኤከማገማይለን ኖጎ ሾካ አል ኤበ እኔያ ኮዎማ፥ ኤከማገሱዋሠን እማም ከመገሚላ። 27ካ ካሥ ከኤተ በጨካ መገመኻ፥ ከረባ ሜተም፥ ነከድ ገሂን አል ግዢ ግዥ ከንዶጎ ያሱስ ክርስቶስኳ። ኣሜን።

will be added

X\