ከደ ሮማ 15

1አኳ ደ በኮዥገካ ነመገሚላ ከምዳ ካኳ አመቀሞቆ መሌአ ደ በሌኤካ፤ ከምዳኼ ኤከምሻምቦኳ ካሥ ማገ ል እልቆኳኼ። 2ኤከምዥጋን አገሙንፀ ደ ገዴራ፥ ኣገ ኲል ኮዎኳ ኢዴቦኳ ደ ገዴራ ኤከምዳ ከማም ከገሸለማ። 3አኢካንኼ ክርስቶስ ከማገ ል ኣሥ እልቆማኼ፤ በቆተካንዥገን ነመዪዥሥ ሎርጋ ኤተ በከለካ፥ "ገ ያ አል ደ በ ካ አም፥ በደከንዥገን ነጸገም።" 4ዳ ኤተ ቢቆተካ ነመዪዥሥ ሎርጋ ነገሲቋ ኮዎማ በቆተካንዥገን ከመትገሠማ ካኳ፤ ዳ ቢከቆተከሥ እማም፥ ከገቀማ ከመንዥገሣ ከኤተ በኸኬ አመዪዥሥ ሎርጋ ኤከምዸቦኮካን ማጦዪላ። 5ረባ ኤተ በኸካ ገቀማ ከመንዥገሣ ከጸጋ ነኸ ካኻ ኤከምጨኻ ቁንዛ ሜተል፥ ኤከምሁለኻን መኳ ኤተ በኸኬ ያሱስ ክርስቶስኳ። 6ኖካ ና ከምኸኻ ከእላ ሜተም ከሳ ሜተልኳ መገ ላ ከረባ ኤተ በደካ ኤቶኳ ያሱስ ክርስቶስኳ። 7ካ ኤያሥ በራቆከኽ አክርስቶስ አኳ ከጸገማ፥ ኣራቆኸሥ አኽኳ ኣሥ እልኸኻ። ደኻ አለኣኳ ከገሂን አል ረባ። 8ከመገሸርሥ ካኻ፥ በከደካ ክርስቶስ ኤተ መደዳ አል ዶጎ ዪሁዳ፥ ከመትገሥ ኤበደካ አረባ መገሚለማ። ከንዶጎማ በትተኮቆ ረባ ማጦዪላ ኤተ ቤኽ ከምበፈገማም። 9በደከንዥገን ኤያሥ ኤያ ከኤተ መደዳ አል ደ በበፀካ መዳ ሾከ ዪሁዳኳ፥ ኤከምኹዋን እማም መገ ላ ከረባ ከፄ ማገለማ። ኤያሥ በቆተካንዥገን ነመዪዥሥ ሎርጋ በከለካ፥ "ካ ከምኸራ መገ ላ ካም ኖጎ ጸጋ ደ በበፀካ መዳ ሾከ ዪሁዳ፥ ከሜኤርከሥ ከፄኡ ጌአ መገ ላ።" 10በከለካ እኽላኳ፥ "አኻ ደ በበፀካ መዳ ሾካ አል ረባ፥ ኣገ ኻይል ደ ኮዎኻ ከሾካለማኳ።" 11እኽላኳ፥ "አኻ ደ በኸበፀካ መዳ ሾከ ዪሁዳ፥ ኸኻ መገ ላ ከረባ፥ ነከኽ አሾካ ኮዎማኳ መገ ላ ካ።" 12እኽላኳ ቤከል ኢሳያስ፥ "ከምዌ ኤተ ከምፖቁዋ ነሾከ እሴይ፥ ከምፈርሥ ኤከምሙቾቆ ሾካ ደ በበፀካ መዳ አል ረባ፥ ከምጦዉሥ እማምኳ ማጦዪላለማም ነጸገማ።" 13ረባ ኤተ በኸካ ማጦዪላ ከጸጋ፥ ነጦ ኤከምዪጮቆን አመገሚላለኻ ከማገ ጓ ከመገማ ከኮዎማ፥ ኤከምረከሸን አማጦዪላለኻ ከመፈጋቋ ከመዥግ መዪዥሥ ገፉጫ። 14ኢዴበም፥ በርገምኪል ዝንዜን ኤበኸከዪጨካቆ ከገሸለማ፥ በኸጨካ ማምባለሠማ ኮዎማ፥ ኤበኸፈለከሻ አኽ መገሸሣኳ። 15ኤከምሳንዘኸሠን አኽ ነዳ ነሜተም ሜተም በርቆተካ ነሎርጋ ነለአ ካኻ ከመንዢቆ እታ። ዳ ኤተ በርከጦካ አለአ፥ ከፄ ባኸካዬሽ መገ ኖጎ ረባ ካራ፥ 16ኤከምደራ ኤተ መደዳ አል ያሱስ ክርስቶስ ከሾካ ደ በበፀካ መዳ አል ረባ። ከማቲስ ሰ ማገ ላ አል ረባ በርደካ ኤጸጋ ኤተ ናኽ ደ መኻ ከረባ፥ ኤከማራቆን ነታሰማ ሾካ ደ በበፀካ መዳ አል ረባ ኤደ መኻ፥ ደ በዪዥካሥ ከመዪዥሥ ገፉጫ። 17ከፄ ቢልደካ ከያሱስ ክርስቶስ ሜተም፥ በርከፈለከሽ መሾጓ ከመደዳ ኤተ በርደካ ከረባ። 18በርገሸካ ከመንዢቆ እታ ካሥ ዳ ኤተ በጦካ አክርስቶስ ከንዶጎም ኤከማራቆ ሾካ ደ በበፀካ መዳ አል ረባ ከማገሳሣ ከአ። በትተኮቆ ክርስቶስ መደዳለማ ከንዶጎም ከሳ ከመደዳኳ፥ 19ከመዥግ ዳ አል ገተምዛ፥ ከበቦቆ ገሸል ዳ፥ ከመዥግ መዪዥሥ ገፉጫኳ። ከለአ በራጦከሽ ነዬሩሳሌም በራንዲካ ካሥ እሊሪቁም፥ በራቲከሰንዥገን ሰ ማገ ላ አል ረባ ኖጎ ኮዎማ። 20ኤከምበፀራ መደርቆን ነሸ ዳ ኤተ ባጦከሽ ጸጋ ጀንዳ፥ በርኦከሸንዥገን ኤከማቲርስ ሰ ማገ ላ አል ረባ ኖጎ በበፀካ ማገሳቆን ፄ ክርስቶስ ሜተልኳ። 21ኤያሥ በቆተካንዥገን ነመዪዥሥ ሎርጋ በከለካ፥ "ከምገመሥ አደ ቢከበፀካ መገሹከሥ ከፄማ፥ ከማምባለሥ አደ በበፀካ መገሶቆን ሜተልኳ።" 22ከፄ አለአ በርከቱነከሥ መዱጎክ መዎሬ ኮጎኻ። 23እኽላኸን ከፄ በራንዢገካ መደዳ ነጋንዲ ኤባ ነለአ፥ ከመተጸማኳ ከፄ በርአጀበካ ግዣ በበኽ መዎሬ ከመዪርቆ አኻ፥ 24በራጦኪል ከመጦ አለአ ነቾጎ መዻለም ከስፓኒያ። ኖከ ከምተር ዻ ኖጎኻ ከስፓኒያ፥ ከመገምኳ በራጦኪል ኤከምፀ ራቆ ከማገራይል ኖጎኻ ዱፀን ነቸቻ፥ ኤከምጦኸቾጎ አራ ነንዶዋ። 25እኽላኸን ከምዸራ ከገሙንፀ ደ ገዴራ ካል ዬሩሳሌም ከምርዾቆ ማተጸሣ ከማም። 26ዳ ከምዸርካ፥ ከፄ ቢርኪል አደ ገዴራ አል ማቀዶኒያ ካል ኣካያ ኤከማሙንፁቆ ማተጸሣ ከደ ዢጋ ደ በኢካን ነዬሩሳሌም ኖጎ ደ ገዴራ። 27ቢርካ አለኣኳ ካሥ ከማሄሻ አል እልቆማም፤ ከንዶጎ ጀንዳኳ መደ ኣሥ አለአ በኢካ ነጸገማም። ኤበንዘኪል አደ በበፀካ መዳ ሾከ ዪሁዳ ነመገሥ ገፉጫ አል ረባ ኤተ በካጦኪል አ ሾካለማ፥ ከምደካ ከጸጋ ደ በበፀካ መዳ ሾከ ዪሁዳኳ ኤከምተጹሥ እማም ዶጎ ዪሁዳ ከዳ ካል ኤበ እኔያኳ። 28ካ ኤከምትተሮቆ መደዳ አለአ፥ ኤከምኸራ ማተጸሣ ኤተ ቢሙንፀኮቆ ከማም ነን፥ ከምዸራ ከስፓኒያ ከምዪርዾቆ አኻ ነቾጎ መዻለም። 29ኖከ ከምዎሬኳ፥ በርገምካ ኤከምርዼቆ መገሣ አል ክርስቶስ ኮዎማ ካኻ። 30ኢዴበም፥ በርሎቆከሥ አኻ ከፄ ኤቶኳ ካል ያሱስ ክርስቶስ ከማሄሻ ኤተ በኸካ አመዪዥሥ ገፉጫኳ፥ ኤከምሻምበኻ ከአራ ከምዴረኻን ረባ ካራኳ። 31ዳ ኤተ ከምዴረኸከሥ አኽ ካራኳ፥ ኤከምብደራን ነኤለ ጸጋ ደ በበፀካ መገሚል ነኤበ ዪሁዳ፥ ኤከማራቆን መደዳለም ነዬሩሳሌም ኖጎ ገሙንፀ ደ ገዴራ ከገሸለማኳ። 32አራኳ ኤመዳ ማሄሻ አል ረባ፥ ከምዎሬ ኮጎኻ ከማገ ላ፥ ከምቤያኽ እለም ከማገመሣ አሎኳኳ። 33ረባ ኤተ በኸካ መገማ ካኳ ነኢ ከአኻ ኮዎኻ። ኣሜን።

will be added

X\