ከደ ሮማ 14

1ናኻ ኤከምኢያን ዱዌባ ኤተ ገዴራ ኤተ በሌኤካኽ ነመገሚላ፥ ራቆኸኽ ከጸገኻ፥ መንሰኻኼ ገሳንዛለማኼ። 2በገምኪል አጸጋ ሜታ ኤበበፀካ ማጻንዳቆ መሰ ዳ ኮዎማ፤ ኤተ በሌኤካኽ ነመገሚላኸን አሰካኼ በጫኼ። 3ካ ጸጋ ኤተ በሰካ ዳ ኮዎማ፥ መሠኼ ኤተ በበፀካ መሳ በጫ፤ ኤተ በበፀካ መሳ በጫኳ፥ መኸከሠኼ ከኤተ በሰካ ዳ ኮዎማኼ። በርኮቆንዥገን አረባ መዣ አኳ። 4ዎዴ አም ኤተ ባከኸከሥ ከኤተ መደዳ አል ጸጋ ጀንዳ? ኤበደካ ገሸለማ ከገንሠማኳ፥ አኤተማ ከምራ፥ ኣጨከሠንኼ አምኼ። ከፄ ከምተጸሥ ኤተማኳ ኤከምጦዋ ገሸለማ፥ ከማራቆ መዣ አ። 5በኦከሥ ጸጋ ሜታ ኤበንተርኮቆ ኦካ ሜታ ኖካ ነጀንዳ፥ በዪርካ ጸጋ ጃጀንዳኸን ኦካ ኮዎማ ካሥ ሜተም። ከፄ አለአ በጦከሥ ጸጋ ኮዎማ እለማ ናሥ ዳ ኤተ በሳንዘከሣ። 6ኤተ በሂንከሥ ኦካ ሜተም ነጃጀንዳ፥ በከጦካ አለአ ከገሂን ረባ፤ ኤተ በሰካ ዳ ኮዎማኳ፥ ከፄ በደካ መገ ላ ከረባ ነደ መሳ፥ በሰካ ከገሂን ረባ። ኤተ በበፀካ መሳ ዳ ኮዎማኳ፥ በጦካ አለአ ከገሂን ረባ በከኸካ መገ ላ ከረባኳ። 7ናኳ አኢካንኼ ኤተ በኢካ ኪልቆማኼ፥ አኢካንኼ ኤተ በሸካ ኪልቆማኼኳ። 8ኤከምኢኳ፥ ከኤታ ከምኢኳ፤ ኤከምሾኳኳ፥ ካሥ አ ከምሾኳ፤ ካ ኤከምኢኳ፥ ኤከምሾኳኳ፥ አኳ ኣሥ አል ኤታ ያሱስ። 9ዳ በከሸካ ክርስቶስ በፈርኬሠን ነመሻ በኢካናኳ፥ ኤከምዳን አ ኤታ ከደ በኢካ ከደ በሸሸካኳ። 10ናኻ ሜታ ሜታ ካሥ በኸከኸከሥ ከኢዴበኻ ደ ገዴራ? ናኻ ጃጀንዳኳ ካሥ በኸከከሥ ኢዴበኻ ደ መገሚላ? ከምዳ ካኳ ኮዎኳ አመኢቾጓ ነታሰ ረባ ከመኸሣ። 11በቆተካንዥገን ነመዪዥሥ ሎርጋ፤ "በከለካ አረባ፥ 'እገሻለም አለአ ኸማ፥ ጸጋ ኮዎማ ከማኩኩና ነታሰም፥ ከጠጠማ ኮዎማኳ ከምዳ ኸገሻ ኤበርደካ ረባ ኸማ።"' 12ካ በኢካ ከሜታ ሜታማሎኳ አመኮሎቆማ ነታሰ ረባ ከፄ መደዳ አል እልቆኳ። 13ካ ዎኼ፥ በፀኮሽ መኸሠማ ካሥ እልኾኳ፤ ርል ኤከምበፀኻ መጦኻ ዳ ኤተ ከምሥኾቆ ኢዴበኻ ነንዶ ረባ ከምሮቆ እማም ከገንሣኳ። 14ከፄ ቢልኢካ ከኤታ ያሱስ ሜተም በርገምካ በርገምኪል ዝንዜንኳ፥ ኤበበፀካ ዳ ሜተል መዳ ከጺማ ከደ መኮዋ። ኤበዪርካ ጸጋ ሜተም ዳ ሜታ ኤመኮዎማኸን፥ ከምደካ ካ ከደ መኮዋ። 15ኤከምቱዋከሥ እል ዱዌበኡ ከዳ ኤተ ባሰካ፥ ከመንዻኣካኼ ከማሄሻኼ፤ መቴያኣከሠኼ ከደ መሳሉ ጸጋ ኤተ በከሸካ ክርስቶስኼ። 16ከለአ፥ አዪርኸካ ኤከምበፃ ጸጋ መሥ ዳ ኤተ በኸዪርካ አኽ ከገሸለማ። 17ኤበገሸካ ጸጋ ከፄ ገፋሌ ረባ፥ ቢገሸካ ከፄ ዳ ኤተ በኦከሽ አረባ፥ ከፄ መገማ ከማገ ጓ ኤተ በኸኬ አመዪዥሥ ገፉጫ፥ እገሸካኼ ከፄ መኮዋ አል ደ መሳ ካል ደ መፋኼ። 18ጸጋ ኤተ በደካ ከክርስቶስ ከንዶጎ አለአ፥ ከማራቆ ኖጎ ረባ ከማሄያሽ ኖጎ ጸጋኳ። 19ከለኣኳ፥ ዎኼ ሁሎኳ ዳ ኤተ ከምሬቆ መገማ፥ ከምተጸሥ ገሙንፀ ደ ገዴራኳ። 20መብኣካኼ መደዳ አል ረባ ከፄ ደ መሳኼ። ደ መሳ ኮዎማ መዪዥሠማ፤ መሰ ዳ ኤተ በሥኮቆ ጸጋ ጀንዳ ነንዶ ረባኸን፥ ገንሠማ። 21መኮዎ በጫ ከምኮዎ መፈ ኬ ባጉዋ፥ ኤያሥ ኤያኳ መበፀሽ መደዳ ኤተ በሥኮቆ ኢዴባ ደ ገዴራ፥ ገሸለማ። 22ካ ዳ ኤተ ባገምኪል ከመዪዥሠማ ባርኮቋ፥ ነኢሽ ነጉ ከረባኳ። ማሄሸማ ጸጋ ኤተ በበፀካ መኸሥ ኪልቆማ ከዳ ኤተ በገምኪል ከገሸለማ በርኮቆናኳ። 23ጸጋ ኤተ በሰካ ዳ ከማጤዪላኸን፥ ከምኸከሥ አረባ ከፄ በበፀካ መሳ ከመገሚላ። መደዳ ኤተ በበፀካ መኢቾጎ ነመገሚላ ኮዎማኳ፥ ገንሣ።

will be added

X\