ከደ ሮማ 1

1አራ ጳዉሎስ ኤተ መደዳ አል ያሱስ ክርስቶስ፥ ኤተ በኦካ አረባ ከመዳ ሰ ገትገ ክርስቶስ፥ በሽለከሥ አረባኳ ከማቲስ ሰ ማገ ላለማ፥ 2ኤተ ቤካጦዪል ነገሲቋ ከንዶጎ ደ መዪርጓለማ ነመዪዥሥ መቆታ። 3ሰ ማገ ላ አል ረባ አለአ ከፄ ዱማ ኤቶኳ ያሱስ ክርስቶስ፥ ኤተ ቢፖቆካ ከበጫ ነሾከ ዳዊት። 4ኤከምዪርኳ መዌያለማ ኖጎ ረባ፥ መዳለማኳ ከመዪዥሠማ፥ ባትገካሠንዥገን ከመዥጋ ከንዶጎ መፈርሣለማ ነመሻ ኤበደካ ዱ ረባ። 5ከንዶጎማ በርዸበካ መገ ከመዳ ሰ ገትጋለማ፥ ኤከምርዼቆ ነሾከ ጸጋ ደ በበፀካ መዳ አል ረባ ነኮዎማ ጸጋ ሜታ ሜታ ኮጎ መገሚላ ከማገሳሣ ከክርስቶስ። 6በኽኢከን አኽኳ ነደ በኦካ አረባ ከመዳ ካል ያሱስ ክርስቶስ። 7ካኻ ደ በኢካ ነሮማ ኮዎኻ፥ ደ በኸሄከሽ አረባ፥ ደ በኦካ አ ኤከምደኻ ጸጋለማኳ፥ ነድ ከአኻ መገ ከመገማ አል ረባ በቦኳ፥ ካል ኤታ ያሱስ ክርስቶስኳ። 8ከፄ ባገምካይል መገሚላለኻ ነኤባ ናል እኔያ ኮዎማ፥ በርሲኮቆ በርኸካ መገ ላ ከረባለም ከንዶጎ ያሱስ ክርስቶስ ከኮዎኻ። 9ረባ፥ ከማቲስ ሰ ማገ ላ ከፄ ዱማ ኤተ በርከደካ ከትጭ እለም፥ በደካ ኸገሻ ካራ ኤበርሳንዘከሥ አኻ በላ ማረረሸን። 10በርሎቆከሥ ነገዴራለም መዱጎክ፥ ኤከምዳ ማሄሽ ረባ ኤከምዸበራን እንዶዋ ኤተ ከምዎርኬ ኮጎኻ እል ሜታቆኳ። 11በርአጀበካ መገመሥ አኻ፥ ኤከመንዘ ራ ካኻ ደ መኻ አል ገፉጫ፥ ኤከምዥገኸካን አኽኳ። 12መከላለምኳ፥ አራ ከመገሚላለኻ፥ አኻኳ ከመገሚላለም፥ ኤከመንዥገኮኳሠን ከመገሚላሎኳኳ። 13ኢዴበም፥ በርሄከሽ ኤከምገመኻ ኤበራኣጎካ መዌያ ኮጎኻ ኦኪል በበኽ፥ በራዸካዬስ ከደኽላኳ። ኤያሥ በርደካ ኖጎ ሾካ ጃጀንዳ ደ በበፀካ መዳ አል ረባ፥ ኤያሥ ኤያ በራኣጎካ መደራ ዳ ኤታ በጨካ ኸማ ኖጎኻ። 14በኢካ አበና ነጸገም ከመትገሠማ ከጸጋ ደ በጨካ ገሂን ከደ ባንዢገካ ገሂንኳ፥ ከደ መገመሸማ ከደ መኤመሸማኳ። 15ከለአ በረገ ከሠንዥገን ከማቲስ ሰ ማገ ላ አል ረባ ካኻ፥ ከደ በኢካ ነሮማኳ። 16ካ ከምዪፀራቆኼ ከሰ ማገ ላ አል ረባኼ፤ አ መዥጋ አል ረባ ኤተ ከምብዶቆ ደ በከገምኪላ ኮዎማ፥ ነመሲቆማ ጸጋ አል ዪሁዳ፥ ኤያሥ ኤያ ሾከ ጸጋ ጀንዳኳ። 17ባትገካሥ ከንዶጎ ሰ ማገ ላ አል ረባ፥ ኤበከጦካ አረባ ጸጋ ከመዪዥሠማ፤ ኤተ ከምደካ አለአ፥ ነማጦሸማ ካሥ መርሸማኳ፥ ከመገሚላ። ኤያሥ በቆተካንዥገን ነመዪዥሥ ሎርጋ፥ "ከምኢያ ጸጋ ኤተ በጦካ አረባ ከመዪዥሠማ ከመገሚላ።" 18ባገምካሠንዥገን ማመሣ አል ረባ። በዎኬ ነጎዛ ነጸገ ደ በደካ መሸ ሠማ ከገንሣ ኮዎማ፥ ደ በቱፐከኽ ኸገሻ ከመኢያለማም ነገንሠኽ እንዶዋ። 19ዳ በከኸከሥ አረባ ከማም፥ ከፄ ባገምካሥ ኖጎማም ዳ ኤተ በፈለከሽ አጸጋ መገመማ ከፄ ረባ። በትገከሠንዥገን ረባ ኪልቆማ ዳ አለአ ከማም። 20አፈለከሸኼ ጸጋ ሜተል መገመሥ ረባኼ። ነደንኳ፥ በትገከሠንዥገን ረባ ከንዶጎ መደዳለማ መኢያለማ ከጸጋ። ዳ በከዘዘኬ አ ኤባ አል እኔያ፥ በፈለከሽ ጸጋ ማምባለሠማ ከሳምቢርቆማም መዥጋለማ አል ግዢ ግዥ ከመዳለማ ረባኳ። ከለኣኳ ኢጨካንኼ ዳ ኤተ ከመንሸ ኪላኼ። 21ሚከገም ረባ፥ ኢከኸካንኼ ገሂን ከመገ ላ ኤተ ከምደካ ከረባኼ። ከገሳንዛለማም ቢሁለካ ዳ ኤተ በደካ መገ ፥ መነ ኽ እለማምኳ በከዪጨካቆ ከመጓ። 22ሚከከል፥ "አይላ ደ መገመኻኳ፥" ቢያጠካኻ። 23በላ መኹካን ገሂን ከረባ ኤተ በኢካ ካል ግዢ ግዥ፥ ቢዴረካ ከመኮሥ ጸጋ ኤተ ከምቴያ፥ ከመኮሣ አል መት እል ግዚያ፥ ካል ደ ግዚያ ኤቾጎ እንዝኽ፥ ካል ደ በቼኪል ነኔያኳ። 24ካ ኤከመንዱዋን ኣሥ እልኸማም ነጸገማም ዳ ኤተ ከምዪፆቆ ጸጋ፥ ባተገርኮቆ አረባ እማም ከመዦጓ ከንዶጎ መአጀባ አል እለማም። 25እማም ቢያንዠኪለንዥገን ኸገሻ አል ረባ ከጎልጎዛ፥ ቢበፀከሽ ረባ ኤተ በዘዘኬ ዳ ኮዎማ፥ ቢኸካ ገሂን ከደ መዘዛ ቢከደካ ዳ። ነከድ መገ ላ ከረባ ካል ግዢ ግዥ፥ ኣሜን። 26ካ ባተገርኮቆ አረባ እማም ከመአጀባ ኤተ ከምዪፆቆ ጸጋ፤ ቢበፀከሽ ጋፋለማም እንዶዋ ከንዶጎ ከማዸብሥ ከጸጋ ኤመኢያ ኤተ ቢካፖቆኬሥ እማም፥ ቢያንዠኪል ከማዸበሣ ኣሥ እልኸማም። 27ኤያሥ ኤያ ጋጉንዛኳ ቢበፀከሽ እንዶዋ ከንዶጎ ከማዸብሥ ከጋፋ ኤመኢያ ኤተ ቢካፖቆኬሥ እማም፥ ቢከንጥጠካቆ ከመአጀባ ኣሥ እልኸማም። በደካ ጉንዛኳ ነጸገ ጉንዛ ዳ ኤተ በዪፀኮቆ ጸጋ። ካ ቢዸበከንዥገን በና ኤተ በደካ ነመበ ኽ እንዶዋለማም። 28ካ፥ ከፄ በኮዎኮቆ ጸጋ መሳንዘሥ ረባ፥ ባተገርኮቆ አረባ እማም ኪልቋ ኤተ ባንዢገካ ሳምቢርቆማ፥ ኤከምዱዋን ዳ ኤተ በበፀካ መገሸላ ከጸጋ። 29ከለአ በከዪጨኪል እማም አመሸ ሠማ ኮዎማ፥ ገንሠ እልኻ፥ መሲይሣ፥ መሱ እልኻ፥ ገንሠ እላ፥ መሾቆ ጸጋ፥ ማቱሣ፥ መንጠኸማ፥ ከኻንዥዠ መንጠኽ ጸጋኳ፤ እማም ቢቴከሥ ፄ ጸጋ፥ 30ቢያገሸኮቆኳ፥ ቢካቸከካኽ ከረባ፥ ቢጦከኽ ጸገማም ነጸጋ ከምጻ፥ ቢባቸካ፥ ቢሾኮጓ፥ ቢያኣጎካ እንዶዋ ከመደ ገንሠማ፥ ኢያገሰካሠኼ ከዶጎ ኤበማምኼ። 31እማም ኢጨካኼ ማምባለሠማ፥ ቢብካ ማገሲላ፥ ኢጨካኼ ማሄሻ ከመሌአይላኳ። 32ቢገምካ ኤበከለካ ማቶቋ አል ረባ ኤከምደካ መሻ ከደ በደካ ሾከ አለአ። ኪልቆማም ቢደካ ሾከ አለአ፤ በላ መዳን ኣሥ አለአ፥ ቢከመከሽ ከደ በደካ ሾከ አለኣኳ።

will be added

X\